കോഴിമുട്ട കാണാത്തവരായി ആരും ഉണ്ടാവില്ല. ദീർഘവൃത്താകൃതിയാണ് മുട്ടകളുടേത്. എന്നാല് 100 കോടിയില് ഒരിക്കല് മാത്രം സംഭവിക്കുന്നത്രയും അപൂര്വ്വതയില് ഗോളാകൃതിയില് ഉണ്ടായ ഒരു മുട്ടയാണ് ചർച്ച.
200 പൗണ്ടിന് അതായത് 21,000 രൂപയ്ക്ക് ആണ് യുകെയില് ലേലത്തിന് വച്ചപ്പോള് ഇത് വിറ്റു പോയത്. സ്കോട്ട്ലൻഡിലെ അയറിലെ ഒരു പ്രാദേശിക സൂപ്പർമാർക്കറ്റിൽ നിന്ന് ഒരു സ്ത്രീക്കാണ് ഈ മുട്ട ആദ്യം ലഭിച്ചത്. ദീർഘവൃത്താകൃതിക്ക് പകരം ഗോളാകൃതിയിലുള്ള മുട്ട കണ്ടപ്പോള് തോന്നിയ കൗതുകത്തിനാണ് അവരത് വാങ്ങിയത്.
പിന്നീട്, ബെർക്ക്ഷെയറിലെ ലാംബോണിൽ നിന്നുള്ള എഡ് പോനെൽ എന്നയാള് സ്ത്രീയില് നിന്നും 150 പൗണ്ടിന് മുട്ട സ്വന്തമാക്കി. തുടര്ന്ന് ഓക്സ്ഫോർഡ്ഷയറിലെ യുവാക്കള്ക്ക് ലൈഫ് കോച്ചിംഗ്, മാനസികാരോഗ്യ സഹായം എന്നിവ വാഗ്ദാനം ചെയ്യുന്ന ചാരിറ്റി സംഘടനയായ ഇയുവെന്റാസ് ഫൗണ്ടേഷനിലേക്ക് ഈ മുട്ട കൈമാറുകയായിരുന്നു.
മുട്ട വില്ക്കാനായി പോണല് നിർദ്ദേശിച്ചതനുസരിച്ച് അവർ ലേലം തീരുമാനിക്കുകയും ചെയ്തു. ലേലത്തിലൂടെ ലഭിക്കുന്ന പണം 13-25 വയസ് പ്രായമുള്ള മാനസികാരോഗ്യ പ്രശ്നങ്ങള് നേരിടുന്നവരെ സഹായിക്കാന് ഉപയോഗിക്കുമെന്ന് ചാരിറ്റി അറിയിച്ചു.
ഇത്തരം മുട്ടകള് നൂറ് കോടിയില് ഒരിക്കല് മാത്രം സംഭവിക്കുന്നതാണെന്ന് ലേല സ്ഥാപനവും അവകാശപ്പെട്ടു. മുട്ടയുടെ ഉള്ളിലെ മഞ്ഞക്കരുവും മുട്ടയുടെ വെള്ളയും നീക്കം ചെയ്തെന്നും ഗോളാകൃതിയുള്ള തോട് അതുപോലെ തന്നെ നിലനിര്ത്തിയാണ് മുട്ട ലേലത്തിനായി എത്തിച്ചത്. തുടര്ന്ന് നടന്ന ലേലത്തിലാണ് മുട്ട 200 പൗണ്ടിന് ലേലം പോയത്.
Discussion about this post