കാനഡ ഇനി ഭരിക്കാൻ പോകുന്നത് ഇന്ത്യക്കാരി!: ആരാണ് അനിത ആനന്ദ്? നിലവിൽ ട്രൂഡോ മന്ത്രിസഭയിലെ പ്രമുഖ

ഒട്ടാവോ: കനേഡിയൻ പ്രധാനമന്ത്രി ജസ്റ്റിൻ ട്രൂഡോ രാജിവച്ചിരിക്കുകയാണ്. ഇന്ത്യയുമായുള്ള നയതന്ത്രബന്ധം മോശമായി തുടരുന്നതിനിടെയാണ് രാജി എന്നത് ട്രൂഡോയുടെ പിൻഗാമി ആരാണെന്ന ചോദ്യം ബലപ്പെടുത്തിയിട്ടുണ്ട്. ഓഗസ്‌റ്റോടെ പൊതുതിരഞ്ഞെടുപ്പ് നടക്കാനിരിക്കെയായിരുന്നു ട്രൂഡോയുടെ രാജി. കാനഡയിൽ ട്രൂഡോയുടെ ജനപ്രീതി നാൾക്കുനാൾ ഇടിയുകയാണ്. പ്രതിപക്ഷമായ കൺസർവേറ്റിവ് പാർട്ടി തിരഞ്ഞെടുപ്പിൽ ഗംഭീരവിജയം നേടുമെന്നാണ് അഭിപ്രായസർവേ ഫലങ്ങൾ. കനേഡിയൻ സ്ഥാപനമായ ആങ്കസ് റീഡ് ഡിസംബർ 24-ന് പുറത്തുവിട്ട അഭിപ്രായസർവേ ഫലമനുസരിച്ച് 68 ശതമാനം പേർക്ക് ട്രൂഡോയോട് താത്പര്യമില്ല. ഈ പശ്ചാത്തലത്തിലാണ് ട്രൂഡോയുടെ പടിയിറക്കം.

ട്രൂഡോയുടെ പടിയിറക്കത്തോടെ അദ്ദേഹത്തിന്റെ പിൻഗാമിയായി താത്ക്കാലികമായി എങ്കിലും ആ സ്ഥാനത്തേക്ക് വരിക ഒരു ഇന്ത്യൻ വംശജ ആയിരിക്കുമെന്ന് അഭ്യൂഹങ്ങൾ ഉയരുന്നുണ്ട്. ട്രൂഡോ മന്ത്രിസഭയിലെ ആഭ്യന്തരവ്യാപാര മന്ത്രിയായ അനിത അനന്ദിന്റെ പേരാണ് സജീവം. പിയറി പൊയിലീവ്രെ, ക്രിസ്റ്റിയ ഫ്രീലാൻഡ്, മാർക്ക് കാർണി തുടങ്ങിയ പ്രധാന പേരുകൾക്കൊപ്പം ശക്തമായ മത്സരാർത്ഥിയായി അനിത ആനന്ദ് വേറിട്ടുനിൽക്കുന്നു.

കനേഡിയൻ അഭിഭാഷകയും രാഷ്ട്രീയക്കാരിയുമാണ് അനിത ആനന്ദ്, നിലവിൽ ഗതാഗത, ആഭ്യന്തര വ്യാപാര മന്ത്രിയായി സേവനമനുഷ്ഠിക്കുന്നു. 57 കാരിയായ മുൻ പ്രതിരോധ മന്ത്രി, ടൊറന്റോയുടെ പ്രാന്തപ്രദേശമായ ഓക്ക്വില്ലെയെ പ്രതിനിധീകരിച്ച് 2019 ൽ ആദ്യമായി രാഷ്ട്രീയത്തിൽ പ്രവേശിച്ചതുമുതൽ പാർട്ടിയിലെ പ്രധാന വ്യക്തികളിൽ ഒരാളായി തുടരുന്നു. കഴിഞ്ഞ അഞ്ച് വർഷങ്ങളിൽ, ഇന്ത്യൻ വംശജയായ ഗതാഗത മന്ത്രി അനിത ആനന്ദ് പൊതു സേവനങ്ങളും സംഭരണവും ഉൾപ്പെടെ നിരവധി വകുപ്പുകൾ കൈകാര്യം ചെയ്തിട്ടുണ്ട്; പ്രതിരോധം; ട്രഷറി ബോർഡ് പ്രസിഡന്റ് സ്ഥാനങ്ങൾ വഹിച്ചിട്ടുണ്ട്. അനിതയുടെ പിതാവ് തമിഴ്‌നാട് സ്വദേശിയും അമ്മ പഞ്ചാബ് സ്വദേശിനിയുമാണ്.

വിദ്യാഭ്യാസ പശ്ചാത്തലം: ക്വീൻസ് യൂണിവേഴ്സിറ്റിയിൽ നിന്ന് പൊളിറ്റിക്കൽ സ്റ്റഡീസിൽ ബാച്ചിലർ ഓഫ് ആർട്സ്, ഓക്സ്ഫോർഡ് യൂണിവേഴ്സിറ്റിയിൽ നിന്ന് ജൂറിസ്പ്രൂഡൻസിൽ ബാച്ചിലർ ഓഫ് ആർട്സ്, ഡൽഹൗസി യൂണിവേഴ്സിറ്റിയിൽ നിന്ന് നിയമ ബിരുദം, ടൊറന്റോ യൂണിവേഴ്സിറ്റിയിൽ നിന്ന് മാസ്റ്റർ ഓഫ് ലോസ്. യേൽ, ക്വീൻസ് യൂണിവേഴ്സിറ്റി, വെസ്റ്റേൺ യൂണിവേഴ്സിറ്റി തുടങ്ങിയ പ്രശസ്ത സ്ഥാപനങ്ങളിൽ അക്കാദമിക് പദവികൾ വഹിച്ചിട്ടുള്ള ആനന്ദ് രാഷ്ട്രീയത്തിൽ പ്രവേശിക്കുന്നതിന് മുമ്പ് ടൊറന്റോ സർവകലാശാലയിൽ നിയമ പ്രൊഫസറായിരുന്നു

കുടുംബ പശ്ചാത്തലം: നോവ സ്‌കോട്ടിയയിലെ കെന്റ്വില്ലിലാണ് ആനന്ദ് ജനിച്ചത്. അവളുടെ മാതാപിതാക്കൾ, അമ്മ സരോജ് ഡി. റാം, അച്ഛൻ എസ്.വി (ആൻഡി) ആനന്ദ് എന്നിവരും ഇന്ത്യൻ ഫിസിഷ്യന്മാരായിരുന്നു. ഗീത, സോണിയ ആനന്ദ് എന്നീ രണ്ട് സഹോദരിമാരുണ്ട്.