തിരുവനന്തപുരം: അങ്കണവാടിയിൽ ഉപ്പുമാവിന് പകരം ബിരിയാണിയും പൊരിച്ച കോഴിയും വേണമെന്ന് ആവശ്യപ്പെട്ടുകൊണ്ടുള്ള കുരുന്നിന്റെ വീഡിയോ സോഷ്യൽ മീഡിയയിൽ വൈറലായിരുന്നു. രസകരമായി സോഷ്യൽ മീഡിയയെ ആകെ ചിരിപ്പിച്ച വീഡിയോയിൽ ഇടപെട്ടിരിക്കുകയാണ് ആരോഗ്യ മന്ത്രി വീണ ജോർജ്. കുഞ്ഞു ശങ്കുവിന്റെ ആവശ്യം പരിഗണിച്ചുകൊണ്ട് അങ്കണവാടിയിലെ ഭക്ഷണ മെനു പരിഷ്കരിക്കാൻ ആവശ്യമായ നടപടികൾ കൈക്കൊള്ളുമെന്ന് മന്ത്രി വീണ ജോർജ് അറിയിച്ചു. ആ കുഞ്ഞു മകൻ വളരെ നിഷ്കളങ്കമായി പറഞ്ഞ ആവശ്യം ഉൾക്കൊള്ളുകയാണെന്നും മന്ത്രി കൂട്ടിച്ചേർത്തു.
കുട്ടികൾക്ക് പോഷകാരോഗ്യം ഉറപ്പ് വരുത്തുക എന്ന ലക്ഷ്യത്തോടെ, വിവിധ തരം ഭക്ഷണങ്ങൾ അങ്കണവാടി വഴി നൽകിവരുന്നുണ്ട്. ഈ സർക്കാരിന്റെ കാലത്ത് കുഞ്ഞുങ്ങൾക്ക് പാലും മുട്ടയും നൽകുക എന്ന പദ്ധതി നടപ്പിലാക്കിയിരുന്നു. അത് ഇപ്പോഴും വിജയകരമായി നടപ്പിലാക്കി വരുന്നു. ഇത് കൂടാതെ, ശിശു വികസനവകുപ്പിന്റെ ഏകോപനത്തിൽ പല തരം ഭക്ഷണങ്ങൾ തദ്ദേശസ്ഥാപനങ്ങൾ സ്വന്തം നിലയിൽ നൽകിവരുന്നുണ്ട്. ശങ്കുവിന്റെ അഭിപ്രായം പരിഗണിച്ചു അങ്കണവാടിയിലെ ഭക്ഷണമെനുവിൽ മാറ്റം വരുത്തുന്നതിനെ സംബന്ധിച്ച് പരിശോധിക്കും. ശങ്കുവിനും അമ്മയ്ക്കും അങ്കണവാടി ജീവനക്കാർക്കും സ്നേഹാഭിവാദ്യങ്ങൾ അറിയിക്കുകയാണെന്നും മന്ത്രി പറഞ്ഞു.
കഴിഞ്ഞ വ്യാഴാഴ്ചയാണ് ഉപ്പുമാവിന് പകരം ബിരിയാണിയും പൊരിച്ച കോഴിയും വേണമെന്ന് ശങ്കു ആവശ്യപ്പെടുന്നതിന്റെ വീഡിയോ സോഷ്യൽ മീഡിയയിൽ പ്രത്യക്ഷപ്പെട്ടത്. വളരെ രസകരമായ ശങ്കുവിന്റെ ആവശ്യം നിമിഷ നേരം കൊണ്ടാണ് വൈറലായത്. ഇൻസ്റ്റഗ്രാമിലും ഫേസ്ബുക്കിലുമൊക്കെയായി ലക്ഷങ്ങളാണ് ഈ വീഡിയോ കണ്ടത്. കുഞ്ഞിന്റെ ആശ്യം ന്യായമാണെന്നും അങ്കണവാടിയിലെ ഭക്ഷണത്തിൽ മാറ്റം വരുത്തണമെന്നും ഉൾപ്പെടെ അഭിപ്രായപ്പെട്ടുകൊണ്ട് നിരവധി പേരാണ് കമന്റുകളുമായി മുന്നോട്ട് വന്നത്. ഇതിന് പിന്നാലെയാണ് വീഡിയോ ശ്രദ്ധയിൽ പെട്ട മന്ത്രിയുടെ ഇടപെടൽ.
Discussion about this post