കോട്ടയം : കോട്ടയം തിരുവാതുക്കലിൽ വ്യവസായിയേയും ഭാര്യയേയും വെട്ടിക്കൊലപ്പെടുത്തിയതിന്റെ കാരണം വ്യക്തമാക്കി അറസ്റ്റിലായ പ്രതി. വ്യവസായി വിജയകുമാറിനോടുള്ള പകയാണ് കൊലപാതകത്തിന് കാരണമെന്നാണ് പ്രതി പോലീസിനോട് അറിയിച്ചത്. വിജയകുമാറിന്റെ വീട്ടിൽ നിന്നും മോഷ്ടിച്ച മൂന്ന് മൊബൈൽ ഫോണുകളിൽ ഒന്ന് ഇടയ്ക്ക് ഓൺ ആക്കിയതാണ് പ്രതിയെ കുടുക്കിയത്. വൈകാതെ തന്നെ പ്രതിയായ അസം സ്വദേശി അമിത് ഒറാങ്ങിനെ പോലീസ് പിടികൂടുകയായിരുന്നു.
തിരുവാതുക്കൽ സ്വദേശിയും ഇന്ദ്രപ്രസ്ഥം ഓഡിറ്റോറിയം അടക്കമുള്ള വ്യവസായ സ്ഥാപനങ്ങളുടെ ഉടമയുമായ വിജയകുമാറും ഭാര്യ മീരയും ആണ് കഴിഞ്ഞദിവസം കൊല്ലപ്പെട്ടത്. വീടിനുള്ളിൽ മഴുകൊണ്ട് വെട്ടിക്കൊലപ്പെടുത്തിയ നിലയിലാണ് മൃതദേഹങ്ങൾ കണ്ടെത്തിയിരുന്നത്. വിജയകുമാറിന്റെ ഓഡിറ്റോറിയത്തിലും വീട്ടിലും സെക്യൂരിറ്റി ജീവനക്കാരനായി ജോലി നോക്കിയിരുന്ന വ്യക്തിയാണ് അസം സ്വദേശിയായ അമിത് ഒറാങ്.
നേരത്തെ വിജയകുമാറിന്റെ വീട്ടിൽ നിന്നും മൊബൈൽ ഫോണുകൾ മോഷ്ടിച്ചതിന്റെ പേരിൽ പോലീസിൽ നൽകിയ കേസിനെ തുടർന്ന് അമിതിനെ അറസ്റ്റ് ചെയ്തിരുന്നു. ഈ കേസിൽ അഞ്ചുമാസത്തോളം ഇയാൾ ജയിലിൽ കഴിഞ്ഞു. സെക്യൂരിറ്റിയായി ജോലി നോക്കുന്ന കാലയളവിൽ വിജയകുമാറിന്റെ വീട്ടിൽ ജോലി ചെയ്തിരുന്ന അന്യസംസ്ഥാന തൊഴിലാളിയായ ഒരു യുവതിയുമായി ഇയാൾ പ്രണയത്തിലായിരുന്നു. ഈ കാലഘട്ടത്തിൽ ഇവർ ഒരുമിച്ച് ആയിരുന്നു താമസിച്ചുവന്നിരുന്നത്. എന്നാൽ അമിത് മോഷണ കേസിൽപ്പെട്ട് ജയിലിൽ ആയതോടെ യുവതി ഇയാളെ ഉപേക്ഷിച്ചു പോയി.
കാമുകി തന്നെ ഉപേക്ഷിച്ചു പോകാൻ കാരണമായത് വിജയകുമാർ ആണെന്നുള്ള വൈരാഗ്യമാണ് അമിതിനെ ക്രൂരമായ കൊലപാതകത്തിന് പ്രേരിപ്പിച്ചത്. വളരെ ആസൂത്രിതമായിട്ടായിരുന്നു ഇയാൾ കൊലപാതകം നടത്തിയത്. വിജയകുമാറിന്റെ വീട്ടിലെ സിസിടിവിയുടെ ഹാർഡ് ഡ്രൈവും സിസിടിവി ദൃശ്യങ്ങൾ ലഭ്യമാകുമായിരുന്ന മൊബൈൽ ഫോണുകളും ഇയാൾ മോഷ്ടിച്ചിരുന്നു. ഈ മൊബൈൽ ഫോണുകളിൽ ഒന്നിൽ ഗൂഗിൾ അക്കൗണ്ട് സിങ്ക് ചെയ്തിട്ടുള്ള കാര്യം മനസ്സിലാക്കിയ പ്രതി ഇത് ഓഫ് ചെയ്യാനായിട്ടായിരുന്നു മൊബൈൽ ഫോൺ ഓൺ ആക്കിയത്. എന്നാൽ മൊബൈൽ ഫോൺ ഓൺ ആക്കിയതോടെ പോലീസിന് ഇയാളുടെ ലൊക്കേഷൻ മനസ്സിലാക്കുകയായിരുന്നു.
കൊലപാതകത്തിനുശേഷം പ്രതി ബസ്സിൽ കോട്ടയത്തുനിന്നും തൃശ്ശൂരിലേക്ക് ആണ് പോയത്. തൃശ്ശൂരിലെ മാളക്ക് സമീപമുള്ള ഒരു കോഴിഫാമിൽ ആയിരുന്നു ഇയാൾ ഒളിവിൽ കഴിഞ്ഞിരുന്നത്. ഇവിടെ എത്തിയാണ് പോലീസ് ഇയാളെ പിടികൂടിയത്. ഈ ഫാമിൽ ജോലി ചെയ്തിരുന്ന മറ്റു അന്യസംസ്ഥാന തൊഴിലാളികളെയും പോലീസ് ചോദ്യം ചെയ്തു വരികയാണ്.
Discussion about this post