ഭാഗ്യക്കേട് എന്ന മലയാള വാക്കിന് ഒരുപാട് പര്യായങ്ങൾ ഉണ്ട്. ആ പര്യായങ്ങളുടെ കൂട്ടത്തിലേക്ക് ഇന്ത്യൻ ക്രിക്കറ്റ് ടീം എന്ന പേര് കൂടി ചേർക്കണം എന്നതാണ് ഇപ്പോൾ വരുന്ന പൊതുവായ അഭിപ്രായം. ഇന്ന് ഇന്ത്യയുടെ പുതിയ ടെസ്റ്റ് ക്യാപ്റ്റൻ ശുഭ്മാൻ ഗിൽ ക്യാപ്റ്റനെന്ന നിലയിൽ തുടർച്ചയായി നാലാം തവണയും ടോസ് നഷ്ടപ്പെടുത്തി നിൽക്കുമ്പോൾ മറ്റൊരു അപമാന റെക്കോഡ് കൂടി ടീം നേടി. ജനുവരിയിൽ രാജ്കോട്ടിൽ ഇംഗ്ലണ്ടിനെതിരെ നടന്ന ടി20 മത്സരത്തിലായിരുന്നു ഇന്ത്യ അവസാനമായി പുരുഷ അന്താരാഷ്ട്ര മത്സരങ്ങളിൽ ടോസ് നേടിയത്. അതിനുശേഷം, എല്ലാ ഫോർമാറ്റുകളിലും തുടർച്ചയായി 14 ടോസുകൾ ഇന്ത്യ തോറ്റു.
ഒരുപക്ഷെ ക്രിക്കറ്റ് ചരിത്രത്തിൽ തന്നെ ഇത്രയധികം തവണ ഒരു ടീമിന് ടോസ് നഷ്ടപെട്ടിട്ടുണ്ടോ എന്ന് ചോദിച്ചാൽ ഇല്ല എന്നായിരിക്കും ഉത്തരം. എന്തായാലും ടോസിൽ ഒന്നും കാര്യമില്ല നന്നായി കളിച്ചാൽ മതി എന്നൊക്കെ പറയാം എങ്കിലും ടോസിൽ കാര്യമുണ്ട് എന്ന് ചില മത്സരങ്ങളും അതിന്റെ ഫലവും പോകുമ്പോൾ നമുക്ക് മനസിലാകും.
ടോസ് നഷ്ടപ്പെട്ട് ആദ്യം ബാറ്റിംഗിന് ഇറങ്ങിയ ഇന്ത്യ കരുണിന് പകരം സായ് സുദർശൻ, ആകാശ് ദീപിന് പകരം അൻഷുൽ കംബോജ്, നിതീഷ് കുമാർ റെഡ്ഢിക്ക് പകരം ഷാർദുൽ താക്കൂർ എന്നിവരെ ടീമിൽ എത്തിച്ചു. പരമ്പരയിൽ ജീവൻ നിലനിർത്താൻ ഈ മത്സരം ജയിക്കേണ്ടത് ഇന്ത്യക്ക് അത്യാവശ്യമാണ്.
എന്തായാലും മത്സരം ലഞ്ചിന് പിരിയുമ്പോൾ വിക്കറ്റ് നഷ്ടപ്പെടാതെ 78 റൺ ഇന്ത്യ എടുത്തിട്ടുണ്ട്.
Discussion about this post