ഇനി ഇന്ത്യയുടെയും റഷ്യയുടെയും നാവികസേനകൾ പരസ്പരം വിഭവങ്ങൾ പങ്കുവെയ്ക്കും ; ഇന്ത്യയുമായി ‘റെലോസ്’ സൈനിക കരാറിൽ ഒപ്പുവയ്ക്കാൻ ഒരുങ്ങി റഷ്യൻ പാർലമെന്റ്

മോസ്‌കോ : റഷ്യൻ പ്രസിഡന്റ് വ്‌ളാഡിമിർ പുടിന്റെ ന്യൂഡൽഹി സന്ദർശനത്തിന് മുന്നോടിയായി ഇന്ത്യയുമായി ഒരു നിർണായക സൈനിക ഉടമ്പടിയിൽ ഒപ്പുവയ്ക്കാൻ ഒരുങ്ങുകയാണ് റഷ്യൻ പാർലമെന്റ്. പരസ്പര ലോജിസ്റ്റിക്സ് കൈമാറ്റ കരാർ (RELOS) എന്ന ഒരു സുപ്രധാന നീക്കത്തിനാണ് ഇന്ത്യയും റഷ്യയും തയ്യാറെടുക്കുന്നത്. ഈ കരാർ പ്രകാരം ഇന്ത്യയുടെയും റഷ്യയുടെയും നാവികസേനകൾക്ക് എല്ലാ വിഭവങ്ങളും പരസ്പരം പങ്കുവയ്ക്കാൻ കഴിയുന്നതാണ്.

സംയുക്ത സൈനികാഭ്യാസങ്ങളിലും ദുരന്ത നിവാരണ പ്രവർത്തനങ്ങൾ പോലുള്ള പ്രവർത്തനങ്ങളിലും ഏകോപനം സാധ്യമാക്കാനാണ് ഈ പുതിയ കരാർ ലക്ഷ്യം വയ്ക്കുന്നത്. ഇന്തോ-പസഫിക് മേഖലയിൽ റഷ്യയുമായുള്ള സഹകരണം കൂടുതൽ മെച്ചപ്പെടുത്താൻ ഈ കരാർ വഴി ഇന്ത്യക്ക് കഴിയും. രണ്ട് തന്ത്രപ്രധാന പങ്കാളികൾ തമ്മിലുള്ള സൈനിക സഹകരണം കൂടുതൽ ആഴത്തിലാക്കുക എന്നതിനാണ് റെലോസ് കരാർ.

മോസ്കോയിലെ ഇന്ത്യൻ അംബാസഡർ വിനയ് കുമാറും അന്നത്തെ റഷ്യൻ ഡെപ്യൂട്ടി പ്രതിരോധ മന്ത്രി അലക്സാണ്ടർ ഫോമിനും ഈ വർഷം ഫെബ്രുവരി 18 ന് പരസ്പര വിനിമയ ലോജിസ്റ്റിക്സ് കരാറിൽ (RELOS) ഒപ്പുവച്ചിട്ടുണ്ട്. ഈ സൈനിക കരാറിന് റഷ്യൻ പാർലമെന്റിന്റെ അധോസഭ അംഗീകാരം നൽകുന്നതോടെ കരാർ പ്രാബല്യത്തിൽ വരുന്നതാണ്. പുടിന്റെ ഇന്ത്യാ സന്ദർശനത്തിന് മുന്നോടിയായി റേഷൻ പാർലമെന്റ് ഈ കരാറിന് അന്തിമ അനുമതി നൽകുമെന്നാണ് റഷ്യൻ മാധ്യമങ്ങൾ റിപ്പോർട്ട് ചെയ്യുന്നത്.

റെലോസ് കരാർ പ്രാബല്യത്തിൽ വന്നു കഴിഞ്ഞാൽ, ഇന്ത്യൻ നാവികസേനയുടെ തൽവാർ ക്ലാസ് ഫ്രിഗേറ്റുകളും വിമാനവാഹിനിക്കപ്പലുമായ ഐഎൻഎസ് വിക്രമാദിത്യയ്ക്ക് ആർട്ടിക് മേഖലയിൽ പ്രവർത്തിക്കാനും, റഷ്യൻ നാവിക താവളങ്ങൾ ലോജിസ്റ്റിക്കൽ പിന്തുണയ്ക്കായി ഉപയോഗിക്കാനും കഴിയുന്നതാണ്. അതുപോലെ, ഇൻഡോ-പസഫിക് സമുദ്ര മേഖലയിൽ തങ്ങളുടെ സാന്നിധ്യം ശക്തിപ്പെടുത്തുന്നതിന് ഇന്ത്യൻ സൗകര്യങ്ങൾ ഉപയോഗിക്കാൻ റഷ്യൻ നാവികസേനയ്ക്കും കഴിയും.