കഴിഞ്ഞ കുറച്ച് മാസങ്ങളായി, ഉന്നത പാകിസ്താൻ പ്രതിരോധ ഉദ്യോഗസ്ഥർ ബംഗ്ലാദേശ് സന്ദർശിക്കുന്നത് തുടർക്കഥയാവുകയാണ്. പാക് ജോയിന്റ് ചീഫ്സ് ഓഫ് സ്റ്റാഫ് ചെയർപേഴ്സൺ മുതൽ നാവികസേനാ മേധാവി വരെ, ഐഎസ്ഐ തലവൻ ലെഫ്റ്റനന്റ് ജനറൽ അസിം മാലിക് വരെ ബംഗ്ലാദേശിലെത്തി.
ഇന്ത്യയുമായുള്ള സംഘർഷങ്ങൾ തുടരുന്നതിനിടെ, പാകിസ്കാൻ സൗദി അറേബ്യയുമായി ഒപ്പുവച്ചതിന് സമാനമായ ഒരു പ്രതിരോധ കരാറിൽ പാകിസ്താനും ബംഗ്ലാദേശും ഇപ്പോൾ കെെകോർക്കുകയാണെന്നാണ് വിവരങ്ങൾ. സെപ്റ്റംബറിൽ, സൗദി അറേബ്യ ആണവായുധങ്ങളുള്ള പാകിസ്താൻ തന്ത്രപരമായ പരസ്പര പ്രതിരോധ കരാറിൽ ഒപ്പുവച്ചു . എന്നിരുന്നാലും, ശ്രദ്ധ പിടിച്ചുപറ്റിയത് “ഏതെങ്കിലും രാജ്യത്തിനെതിരെയുള്ള ആക്രമണം ഇരു രാജ്യങ്ങൾക്കുമെതിരായ ആക്രമണമായി കണക്കാക്കും” എന്ന വാചകമാണ്. പാകിസ്താനിൽ, ഈ കരാർ ഇന്ത്യയ്ക്കെതിരായ തന്ത്രപരമായ പ്രതിരോധമായി വാഴ്ത്തപ്പെട്ടു.
ഇപ്പോൾ, പാകിസ്താൻ തങ്ങളുടെ പുതിയ സഖ്യകക്ഷിയായ ബംഗ്ലാദേശുമായി സമാനമായ ഒരു നാറ്റോ ശൈലിയിലുള്ള പ്രതിരോധ കരാറിൽ ഒപ്പുവെക്കാൻ ആഗ്രഹിക്കുന്നുവെന്നാണ് വിവരങ്ങൾ 1971 ലെ ബംഗ്ലാദേശിന്റെ വിമോചനത്തിനുശേഷം ആദ്യമായാണ് ഇത്തരമൊരു കരാർ ഉണ്ടാകുന്നത്. വിരോധാഭാസമെന്നു പറയട്ടെ, യുദ്ധസമയത്ത് ഇതേ പാകിസ്താൻ സായുധ സേന വംശഹത്യ നടത്തുകയും ലക്ഷക്കണക്കിന് ബംഗ്ലാദേശികളെ കൂട്ടക്കൊല ചെയ്യുകയും ചെയ്തു. ബംഗ്ലാദേശിൽ രണ്ട് മാസത്തിനുള്ളിൽ തെരഞ്ഞെടുപ്പ് നടക്കാനിരിക്കെ, കരാർ വേഗത്തിൽ നടപ്പിലാക്കാൻ പാകിസ്താൻ ആഗ്രഹിക്കുന്നു.
റിപ്പോർട്ടുകൾ പ്രകാരം, കരാർ തയ്യാറാക്കുന്നതിനായി രാജ്യങ്ങൾ ഇതിനകം ഒരു സംയുക്ത സംവിധാനം സ്ഥാപിച്ചിട്ടുണ്ട്. കരാർ ഒപ്പുവെക്കുന്നതോടെ, ബംഗ്ലാദേശിനും പാകിസ്താനും രഹസ്യാന്വേഷണ വിവരങ്ങൾ ഔദ്യോഗികമായി പങ്കിടാനും സൈനികാഭ്യാസങ്ങൾ നടത്താനും വഴിയൊരുങ്ങും. എന്നിരുന്നാലും, കരാറിൽ ആണവ സഹകരണം ഉൾപ്പെടുമോ എന്ന് വ്യക്തമല്ല. അങ്ങനെ സംഭവിച്ചാൽ, അത് ഇന്ത്യയെ സംബന്ധിച്ചിടത്തോളം ആശങ്കാജനകമായ ഒരു വശമായിരിക്കും എന്നതിൽ സംശയമില്ല.
റാഡിക്കൽ നേതാവ് ഷെരീഫ് ഒസ്മാൻ ഹാദിയുടെ കൊലപാതകത്തെത്തുടർന്ന് ബംഗ്ലാദേശിൽ തുടരുന്ന അശാന്തി, ഇന്ത്യാ വിരുദ്ധ സ്വരം മൂർച്ഛിച്ചിരിക്കുന്നത്, പ്രതിരോധ കരാർ മുന്നോട്ട് കൊണ്ടുപോകാൻ പാകിസ്താന് ഒരു വേദിയായി മാത്രമാണ് നൽകിയിരിക്കുന്നത്. പാകിസ്താൻ ഭരണകക്ഷിയിലെ ഒരു നേതാവ് രാജ്യങ്ങൾക്കിടയിൽ ഒരു ഔപചാരിക സൈനിക സഖ്യം വേണമെന്ന് ആവശ്യപ്പെട്ടു, ഇത് ഊഹാപോഹങ്ങൾക്ക് വിശ്വാസ്യത വർദ്ധിപ്പിക്കുന്നു. “ഇന്ത്യ ബംഗ്ലാദേശിനെ ആക്രമിച്ചാൽ, പാകിസ്താൻ പൂർണ്ണ ശക്തിയോടെ ധാക്കയ്ക്കൊപ്പം നിൽക്കും… തുറമുഖങ്ങളും കടലുകളും നിയന്ത്രിക്കുന്നവരാണ് ലോകത്തെ ഭരിക്കുന്നത്,” പാകിസ്താൻ മുസ്ലീം ലീഗ് നേതാവ് കമ്രാൻ സയീദ് ഉസ്മാനി പറഞ്ഞു. ഇന്ത്യ ഇക്കാര്യത്തിൽ അഭിപ്രായം പറഞ്ഞിട്ടില്ലെങ്കിലും, സംഭവവികാസങ്ങൾ സൂക്ഷ്മമായി നിരീക്ഷിച്ചുവരികയാണെന്നാണ് വിവരം. അത്തരമൊരു കരാർ ഒപ്പുവെച്ചാൽ, കിഴക്കൻ മേഖലയിൽ, പ്രത്യേകിച്ച് ആണവ സഹകരണം ഉൾപ്പെടുത്തിയാൽ, അത് ഒരു സുരക്ഷാ വെല്ലുവിളിയാകാൻ സാധ്യതയുണ്ട്
Discussion about this post