ഒരു സെക്കൻഡിൽ വിറ്റഴിക്കപ്പെടുന്നത് 16 കുഞ്ഞൻ കാറുകൾ;ഹോട്ട് വീൽസിന്റെ ആവേശകരമായ ആ യാത്ര

‘ഹോട്ട് വീൽസ്’ (Hot Wheels) എന്ന് കേട്ടിട്ടില്ലേ… ഇന്ന് കുട്ടികൾക്കിടയിൽ മാത്രമല്ല മുതിർന്നവരും ഏറെ ആവേശത്തോടെ വാങ്ങിക്കൂട്ടുന്ന  കളിപ്പാട്ട കാറാണിത്.  ഹോട്ട് വീൽസിൻ്റെ കമനീയ ശേഖരം വരെ ഉണ്ടാക്കി മറ്റുള്ളവരെ അത്ഭുതപ്പെടുത്തുന്നവരുണ്ട്. അപൂർവ്വമായി ലഭിക്കുന്ന പീസുകൾക്കായി കടകൾ പുതിയ സ്റ്റോക്ക് എത്തിക്കുന്നതിന് മുൻപേ ക്യൂ നിൽക്കുന്നവരുണ്ട്. വിചിത്രമായ ഭ്രമം തന്നെ. എന്നാൽ ഈ കൊച്ചു കളിപ്പാട്ട കാറുകൾക്ക് പിന്നിൽ ലോകത്തെ ഞെട്ടിച്ച ഒരു വലിയ ബിസിനസ്സ് തന്ത്രത്തിന്റെ കഥയുണ്ട്. 1960-കളിൽ ലോകപ്രശസ്ത കളിപ്പാട്ട കമ്പനിയായ മാറ്റലിന്റെ (Mattel) സഹസ്ഥാപകൻ എലിയറ്റ് ഹാൻഡ്‌ലർ (Elliot Handler) കുറിച്ച ഒരു വലിയ സ്വപ്നമാണത്.

ഇതാ ഹോട്ട് വീൽസിന്റെ ആവേശകരമായ ആ യാത്ര…

1960-കളുടെ അവസാനം. മാറ്റൽ കമ്പനി അന്ന് ‘ബാർബി’ (Barbie) പാവകളിലൂടെ പെൺകുട്ടികളുടെ വിപണി കീഴടക്കിയിരുന്നു. പക്ഷേ, ആൺകുട്ടികൾക്ക് വേണ്ടി അത്തരത്തിൽ ഒരു ബ്രാൻഡ് അവർക്കുണ്ടായിരുന്നില്ല. അന്ന് വിപണിയിലുണ്ടായിരുന്ന മാച്ച്‌ബോക്സ് (Matchbox) കാറുകൾക്ക് ഒരു കുറവുണ്ടായിരുന്നു—അവ കാണാൻ നല്ലതാണെങ്കിലും വേഗതയിൽ വളരെ പിന്നിലായിരുന്നു. എലിയറ്റ് ഹാൻഡ്‌ലർക്ക് ഒരു ആഗ്രഹമുണ്ടായിരുന്നു: “സത്യത്തിൽ റോഡിലൂടെ ഓടുന്ന കാറുകളെപ്പോലെ വേഗതയുള്ളതും സ്റ്റൈലിഷുമായ കാറുകൾ കുട്ടികൾക്ക് നൽകണം.” തന്റെ ഡിസൈനർമാരോട് അദ്ദേഹം പറഞ്ഞു: “എനിക്ക് വേണ്ടത് സാധാരണ കാറുകളല്ല, മറിച്ച് തീ തുപ്പുന്ന ‘ഹോട്ട് റോഡ്’ (Hot Rods) സ്റ്റൈൽ കാറുകളാണ്.” അങ്ങനെയാണ് ഇതിന് ‘ഹോട്ട് വീൽസ്’ എന്ന പേര് വീണത്.

ഹോട്ട് വീൽസിനെ ലോകപ്രശസ്തമാക്കിയത് അതിന്റെ ഡിസൈനായിരുന്നു.കാർ ഡിസൈനർമാർ: എലിയറ്റ് വെറും കളിപ്പാട്ട ഡിസൈനർമാരെയല്ല വിളിച്ചത്, മറിച്ച് ജനറൽ മോട്ടോഴ്‌സ് (GM) പോലുള്ള വലിയ കമ്പനികളിലെ യഥാർത്ഥ കാർ ഡിസൈനർമാരെയാണ് അദ്ദേഹം ജോലിക്കെടുത്തത്.
ഈ കാറുകൾക്ക് വളരെ വേഗത്തിൽ ഓടാൻ കഴിയുന്ന പ്രത്യേക തരം  ചക്രങ്ങളും, Axles, അദ്ദേഹം വികസിപ്പിച്ചെടുത്തു. ഇത് കളിപ്പാട്ട ലോകത്തെ ഒരു അത്ഭുതമായിരുന്നു.കാറുകൾ ഓടിക്കാൻ മാത്രമായി അദ്ദേഹം നിർമ്മിച്ച ‘ഓറഞ്ച് ട്രാക്കുകൾ’ കുട്ടികൾക്കിടയിൽ ഒരു തരംഗമായി മാറി.

ഇന്ന് ഹോട്ട് വീൽസ് വെറുമൊരു കളിപ്പാട്ടമല്ല, അതൊരു വലിയ ബിസിനസ്സ് സാമ്രാജ്യമാണ്. ഓരോ സെക്കന്റിലും ലോകത്ത് എവിടെയെങ്കിലും 16 ഹോട്ട് വീൽസ് കാറുകൾ വീതം വിറ്റഴിക്കപ്പെടുന്നു!ഇന്ന് ഇതൊരു ഇൻവെസ്റ്റ്‌മെന്റ് കൂടിയാണ്. 1969-ൽ ഇറങ്ങിയ ചില അപൂർവ്വ കാറുകൾക്ക് ഇന്ന് $1.5 ലക്ഷം (1.2 കോടി രൂപ) വരെ വിലയുണ്ട്. കളിപ്പാട്ടത്തിൽ നിന്ന് മാറി സിനിമകൾ, വീഡിയോ ഗെയിമുകൾ, വലിയ റേസിംഗ് ഇവന്റുകൾ എന്നിങ്ങനെ മാറ്റൽ കമ്പനിയുടെ ഏറ്റവും വലിയ വരുമാന മാർഗ്ഗമായി ഹോട്ട് വീൽസ് മാറി. എല്ലാവരും ചെയ്യുന്നതിനേക്കാൾ അല്പം കൂടി വ്യത്യസ്തമായി എന്ത് ചെയ്യാൻ കഴിയും?” എന്ന എലിയറ്റ് ഹാൻഡ്‌ലറുടെ ചിന്തയാണ് ഇന്ന് ലോകമെമ്പാടുമുള്ള കോടിക്കണക്കിന് കുട്ടികളുടെയും മുതിർന്നവരുടെയും സ്വപ്ന വാഹനമായി ഹോട്ട് വീൽസിനെ മാറ്റിയത്.