വാലൻ്റൈൻസ് ഡേ എന്നാൽ വെറും റോസാപ്പൂക്കളും മെഴുകുതിരി അത്താഴങ്ങളും മാത്രമല്ലെന്ന് ലോകത്തിന് കാണിച്ചുതരികയാണ് അമേരിക്കയിലെ സാൻ അൻ്റോണിയോ മൃഗശാല. പ്രണയനൈരാശ്യത്തിൽ കഴിയുന്നവർക്കും തേപ്പ് കിട്ടിയവർക്കും തങ്ങളുടെ ‘എക്സിനോടുള്ള’ (Ex) ദേഷ്യം തീർക്കാൻ ഒരു വിചിത്രമായ അവസരമാണ് മൃഗശാല അധികൃതർ ഒരുക്കിയിരിക്കുന്നത്. ‘ക്രൈ മീ എ കോക്രോച്ച്’ (Cry Me a Cockroach) എന്ന് പേരിട്ടിരിക്കുന്ന ഈ ക്യാമ്പയിനിലൂടെ നിങ്ങളുടെ മുൻകാമുകൻ്റെയോ കാമുകിയുടെയോ പേര് ഒരു പാറ്റയ്ക്കോ എലിക്കോ നൽകാം. ഈ പാറ്റയെ മൃഗശാലയിലെ മറ്റ് മൃഗങ്ങൾക്ക് ഭക്ഷണമായി നൽകുന്നതാണ് ചലഞ്ച്.
മനസ്സിലെ കനൽ കെടുത്താൻ ഇതിലും നല്ലൊരു വഴി വേറെയില്ലെന്നാണ് സോഷ്യൽ മീഡിയയുടെ പക്ഷം. അഞ്ച് ഡോളർ (ഏകദേശം 400 രൂപ) നൽകിയാൽ ഒരു പാറ്റയ്ക്കോ പച്ചക്കറിക്കോ നിങ്ങളുടെ മുൻപ്രിയതമന്റെ പേര് നൽകാം. 15 ഡോളർ നൽകിയാൽ ഒരു എലിയെ തന്നെ ദത്തെടുത്ത് പേരിടാം. പേരിടൽ ചടങ്ങ് കഴിഞ്ഞാൽ ഇതിന്റെ വീഡിയോയും മൃഗശാല അധികൃതർ നിങ്ങൾക്ക് അയച്ചുതരും. കൂടാതെ സോഷ്യൽ മീഡിയയിൽ പങ്കുവെക്കാൻ പാകത്തിലുള്ള ഒരു വാലൻ്റൈൻസ് ഡേ കാർഡും ലഭിക്കും. വെറും പ്രതികാരം മാത്രമല്ല ഇതിന് പിന്നിലെ ലക്ഷ്യം, ഇതിലൂടെ ലഭിക്കുന്ന തുക മൃഗശാലയിലെ സംരക്ഷണ പ്രവർത്തനങ്ങൾക്കായാണ് ഉപയോഗിക്കുന്നത്.
സാൻ അൻ്റോണിയോ മൃഗശാല മാത്രമല്ല, ന്യൂയോർക്കിലെ ബ്രോങ്ക്സ് സൂ (Bronx Zoo) ഉൾപ്പെടെ അമേരിക്കയിലെ നിരവധി മൃഗശാലകൾ ഈ ട്രെൻഡ് ഏറ്റെടുത്തു കഴിഞ്ഞു. 2011-ൽ ബ്രോങ്ക്സ് സൂ ആരംഭിച്ച ‘നെയിം എ റോച്ച്’ പദ്ധതിയിലൂടെ കഴിഞ്ഞ 15 വർഷത്തിനിടെ 60,000-ത്തോളം പാറ്റകൾക്കാണ് ആളുകൾ പേരിട്ടത്. ഇതിലൂടെ ഏകദേശം 10 ലക്ഷം ഡോളറോളം (എട്ട് കോടിയിലധികം രൂപ) സംഭാവനയായി ലഭിച്ചുവെന്ന് വൈൽഡ് ലൈഫ് കൺസർവേഷൻ സൊസൈറ്റി വ്യക്തമാക്കുന്നു. മുൻ പങ്കാളികളുടെ പേര് മാത്രമല്ല, ചിലർ തങ്ങൾക്ക് ഇഷ്ടമില്ലാത്ത സെലിബ്രിറ്റികളുടെ പേരും ഇത്തരത്തിൽ പാറ്റകൾക്ക് നൽകാറുണ്ട്.
Discussion about this post