ഇന്ത്യയും ഫ്രാൻസും തമ്മിലുള്ള ദൃഢമായ സൗഹൃദത്തിന്റെ പുതിയ അദ്ധ്യായം രചിച്ച് ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ സന്ദർശനം തുടരുന്നു. ഡൽഹിയിൽ നടക്കാനിരിക്കുന്ന നിർണ്ണായകമായ ‘എഐ ഇംപാക്ട് സമിറ്റിന്’ (AI Impact Summit) മുന്നോടിയായി പ്രധാനമന്ത്രി നരേന്ദ്ര മോദിക്കൊപ്പമുള്ള ഒരു എഐ (AI) നിർമ്മിത ചിത്രം പങ്കുവെച്ചുകൊണ്ടാണ് മാക്രോൺ ലോകത്തിന്റെ ശ്രദ്ധ പിടിച്ചുപറ്റിയത്. “സുഹൃത്തുക്കൾ തമ്മിൽ ബന്ധപ്പെടുമ്പോൾ അവിടെ നൂതനമായ മാറ്റങ്ങൾ സംഭവിക്കുന്നു. എഐ ഇംപാക്ട് സമിറ്റിനായി ഞങ്ങൾ തയ്യാറാണ്” – ചിത്രത്തിനൊപ്പം മാക്രോൺ സോഷ്യൽ മീഡിയയിൽ കുറിച്ചു.
മുംബൈയിലെ മൂന്ന് ദിവസത്തെ സന്ദർശനം പൂർത്തിയാക്കിയാണ് മാക്രോണും പങ്കാളി ബ്രിജിത്ത് മാക്രോണും ബുധനാഴ്ച തലസ്ഥാനത്ത് എത്തിയത്. വ്യാഴാഴ്ച പ്രധാനമന്ത്രി നരേന്ദ്ര മോദി ഉച്ചകോടി ഉദ്ഘാടനം ചെയ്യും. ലോകത്തെ 20-ഓളം രാഷ്ട്രത്തലവന്മാർ പങ്കെടുക്കുന്ന ഈ സമ്മേളനം ആഗോള സാങ്കേതിക വിദ്യയുടെ ഭാവി നിശ്ചയിക്കുന്നതിൽ നിർണ്ണായകമാകും. നേരത്തെ മുംബൈയിൽ വെച്ച് പ്രധാനമന്ത്രി മോദിയുമായി മാക്രോൺ നടത്തിയ കൂടിക്കാഴ്ചയിൽ പ്രതിരോധം, സാങ്കേതികവിദ്യ തുടങ്ങിയ മേഖലകളിൽ ഇരുരാജ്യങ്ങളും തമ്മിലുള്ള തന്ത്രപ്രധാന ബന്ധം കൂടുതൽ ശക്തമാക്കാൻ തീരുമാനിച്ചിരുന്നു.
മുംബൈയിലെ ‘സിറ്റി ഓഫ് ഡ്രീംസ്’ എന്ന് വിശേഷിപ്പിച്ച മാക്രോൺ, ചൊവ്വാഴ്ച രാത്രി പത്തരയോടെ യുനെസ്കോ പൈതൃക സ്മാരകമായ ഛത്രപതി ശിവജി മഹാരാജ് ടെർമിനസ് (CSMT) സന്ദർശിച്ചിരുന്നു. പ്ലാറ്റ്‌ഫോം നമ്പർ ഒന്നിലൂടെ സ്റ്റേഷനുള്ളിൽ പ്രവേശിച്ച അദ്ദേഹം ആറ് മിനിറ്റോളം അവിടെ ചിലവഴിച്ചു. 26/11 ഭീകരാക്രമണം നടന്ന പ്രധാന കേന്ദ്രങ്ങളിൽ ഒന്നായ ഇവിടെ കനത്ത സുരക്ഷയാണ് ഒരുക്കിയിരുന്നത്. മുംബൈ സന്ദർശനത്തിനിടെ ഇന്ത്യൻ സിനിമാ മേഖലയിലെ പ്രമുഖരുമായും മാക്രോൺ ആശയവിനിമയം നടത്തി.
