ന്യൂഡൽഹി: ഇന്ത്യയിൽ നടക്കുന്ന ആഗോള എഐ ഇംപാക്ട് സമ്മിറ്റിന് മുന്നോടിയായി പ്രധാനമന്ത്രി നരേന്ദ്ര മോദിക്കൊപ്പമുള്ള കൗതുകകരമായ ഒരു ചിത്രം പങ്കുവെച്ച് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. പൂർണ്ണമായും കൃത്രിമബുദ്ധി (AI) ഉപയോഗിച്ച് നിർമ്മിച്ച ചിത്രമാണ് മാക്രോൺ തന്റെ സോഷ്യൽ മീഡിയ അക്കൗണ്ടുകളിലൂടെ പങ്കുവെച്ചത്.
“സുഹൃത്തുക്കൾ ഒന്നിക്കുമ്പോൾ നവീകരണങ്ങൾ സംഭവിക്കുന്നു. എഐ ഇംപാക്ട് സമ്മിറ്റിനായി തയ്യാറെടുക്കുന്നു,” എന്ന കുറിപ്പോടെയാണ് അദ്ദേഹം ചിത്രം പോസ്റ്റ് ചെയ്തത്. ചിത്രത്തിന് താഴെ “അതെ, ഇത് എഐ ആണ്” എന്ന് പ്രത്യേകം രേഖപ്പെടുത്തിയിട്ടുണ്ട്. ഇന്ത്യയും ഫ്രാൻസും തമ്മിലുള്ള ദൃഢമായ സൗഹൃദത്തെയും സാങ്കേതിക വിദ്യയിലുള്ള സഹകരണത്തെയുമാണ് ഈ ചിത്രം അടയാളപ്പെടുത്തുന്നത്.
മൂന്ന് ദിവസത്തെ ഔദ്യോഗിക സന്ദർശനത്തിനായാണ് ചൊവ്വാഴ്ച അർദ്ധരാത്രിയോടെ മാക്രോൺ മുംബൈയിലെത്തിയത്. വിവിധ പരിപാടികളിൽ പങ്കെടുത്ത ശേഷം ബുധനാഴ്ച വൈകുന്നേരത്തോടെ ഡൽഹിയിലെത്തി. ഇന്ന് പ്രധാനമന്ത്രി നരേന്ദ്ര മോദി ഡൽഹിയിൽ ഉച്ചകോടി ഉദ്ഘാടനം ചെയ്യും. ഫ്രഞ്ച് പ്രസിഡന്റിന് പുറമെ ലോകമെമ്പാടുമുള്ള ഇരുപതോളം രാഷ്ട്രത്തലവന്മാർ ഉദ്ഘാടന ചടങ്ങിൽ പങ്കെടുക്കുന്നുണ്ട്.
സന്ദർശനത്തിന്റെ ഭാഗമായി ടാറ്റ-എയർബസ് സംയുക്തമായി കർണാടകയിലെ വേമഗലിൽ നിർമ്മിക്കുന്ന എച്ച്-125 ഹെലികോപ്റ്റർ അസംബ്ലി ലൈൻ ഇരു നേതാക്കളും ചേർന്ന് വെർച്വലായി ഉദ്ഘാടനം ചെയ്തു. ഇന്ത്യയും ഫ്രാൻസും തമ്മിലുള്ള ബന്ധം ‘പ്രത്യേക ആഗോള തന്ത്രപ്രധാന പങ്കാളിത്തമായി’ ഉയർത്താൻ ഇരുരാജ്യങ്ങളും തീരുമാനിച്ചു.
എവറസ്റ്റ് കൊടുമുടിയുടെ ഉയരത്തിൽ പോലും പറക്കാൻ ശേഷിയുള്ള ഹെലികോപ്റ്ററുകൾ ഇന്ത്യയിൽ നിർമ്മിക്കാനാണ് ഈ പുതിയ കരാറിലൂടെ ലക്ഷ്യമിടുന്നത്. ഇന്ത്യയെ എഐ രംഗത്തെ ഒരു പ്രധാന ശക്തിയായി മാറ്റാനുള്ള കേന്ദ്രസർക്കാർ നീക്കങ്ങൾക്ക് ആഗോളതലത്തിൽ ലഭിക്കുന്ന പിന്തുണയുടെ തെളിവുകൂടിയാണ് മാക്രോണിന്റെ സന്ദർശനം.
Discussion about this post