ശരീരത്തിലെ ഏറ്റവും പ്രധാനപ്പെട്ട അവയവങ്ങളിൽ ഒന്നായ കരളിന്റെ ആരോഗ്യം പലപ്പോഴും നാം അവഗണിക്കാറാണ് പതിവ്. വിഷാംശങ്ങളെ പുറന്തള്ളാനും ഹോർമോണുകൾ നിയന്ത്രിക്കാനും ഊർജ്ജം സംഭരിക്കാനുമെല്ലാം രാപ്പകൽ അധ്വാനിക്കുന്ന കരളിൽ തകരാറുകൾ സംഭവിക്കുന്നത് പലപ്പോഴും നിശബ്ദമായിട്ടായിരിക്കും. തുടക്കത്തിൽ ചെറിയ ക്ഷീണമോ ദഹനക്കുറവോ ആയി അനുഭവപ്പെടുന്ന ലക്ഷണങ്ങൾ പിന്നീട് സിറോസിസ്, ലിവർ ഫെയിലിയർ, അല്ലെങ്കിൽ ക്യാൻസർ പോലുള്ള മാരകാവസ്ഥകളിലേക്ക് നയിക്കാമെന്ന് ഡോക്ടർമാർ മുന്നറിയിപ്പ് നൽകുന്നു. കരൾ രോഗത്തിന്റെ ലക്ഷണങ്ങളും അവ തടയാനുള്ള മാർഗ്ഗങ്ങളും വിശദമായി പരിശോധിക്കാം.
വിട്ടുമാറാത്ത ക്ഷീണമാണ് കരൾ രോഗത്തിന്റെ പ്രധാന ലക്ഷണങ്ങളിലൊന്ന്. മതിയായ വിശ്രമം ലഭിച്ചിട്ടും എപ്പോഴും തളർച്ച അനുഭവപ്പെടുന്നുണ്ടെങ്കിൽ അത് കരളിലെ വീക്കത്തിന്റെയോ (Inflammation) രാസവസ്തുക്കളുടെ അമിതമായ ശേഖരണത്തിന്റെയോ ഫലമാകാം. മെറ്റബോളിസത്തിന് ആവശ്യമായ രാസവസ്തുക്കൾ ഉൽപ്പാദിപ്പിക്കാൻ കരളിന് സാധിക്കാതെ വരുമ്പോൾ ശരീരത്തിൽ വിഷാംശങ്ങൾ അടിഞ്ഞുകൂടുകയും ഇത് കടുത്ത ക്ഷീണത്തിലേക്ക് നയിക്കുകയും ചെയ്യുന്നു. അതുപോലെ തന്നെ വയറിന് ചുറ്റും അമിതമായി കൊഴുപ്പ് അടിയുന്നതും വയർ വീർക്കുന്നതും (Ascites) ഗൗരവമായി കാണണം. കരളിൽ ദ്രാവകം അടിഞ്ഞുകൂടുന്ന ഈ അവസ്ഥ കരൾ രോഗം ഗുരുതാരാവസ്ഥയിൽ എത്തിയതിന്റെ സൂചനയാണ്.
ലോകജനസംഖ്യയിൽ 30 ശതമാനത്തിലധികം പേരെ ബാധിക്കുന്ന ‘മാസ്ൾഡ്’ (MASLD) അഥവാ നോൺ-ആൽക്കഹോളിക് ഫാറ്റി ലിവർ ഡിസീസ് ഇന്ന് വലിയ ഭീഷണിയാണ്. അമിതവണ്ണവും ടൈപ്പ് 2 പ്രമേഹവുമാണ് ഇതിന് പ്രധാന കാരണമാകുന്നത്. അമിതമായി കൊഴുപ്പുള്ള ഭക്ഷണങ്ങൾ കഴിക്കുന്നതും വ്യായാമമില്ലാത്ത ജീവിതശൈലിയും കരളിൽ കൊഴുപ്പ് അടിയാൻ കാരണമാകുന്നു. മദ്യപാനം മാത്രമല്ല കരളിനെ നശിപ്പിക്കുന്നത്. ഡോക്ടറുടെ നിർദ്ദേശമില്ലാതെ കഴിക്കുന്ന മരുന്നുകളും ഹെർബൽ സപ്ലിമെന്റുകളും കരളിന് ഗുരുതരമായ പരിക്കേൽപ്പിക്കാറുണ്ട്. ക്ലിനിക്കൽ ട്രയലുകൾ പരാജയപ്പെടാനും മരുന്നുകൾ വിപണിയിൽ നിന്ന് പിൻവലിക്കാനും പ്രധാന കാരണം അവ കരളിന് വരുത്തുന്ന ആഘാതമാണ്.
കരളിന്റെ ആരോഗ്യം സംരക്ഷിക്കാൻ മദ്യപാനം പൂർണ്ണമായും ഒഴിവാക്കുകയാണ് ആദ്യ പടി. പുരുഷന്മാരും സ്ത്രീകളും ഒരുപോലെ മദ്യത്തിന്റെ ഉപയോഗം നിയന്ത്രിക്കണം. ഹെപ്പറ്റൈറ്റിസ് എ, ബി എന്നിവയ്ക്കെതിരെയുള്ള വാക്സിനേഷൻ എടുക്കുക എന്നത് അത്യന്താപേക്ഷിതമാണ്. സുരക്ഷിതമായ ലൈംഗിക ബന്ധത്തിലൂടെ ഹെപ്പറ്റൈറ്റിസ് ബി, സി എന്നിവ പകരുന്നത് തടയാം. കൃത്യമായ വ്യായാമവും ആരോഗ്യകരമായ ഭക്ഷണക്രമവും ശീലമാക്കിയാൽ കരളിലെ കൊഴുപ്പ് കുറയ്ക്കാനും ആരോഗ്യം വീണ്ടെടുക്കാനും സാധിക്കും. ഈ ലക്ഷണങ്ങൾ പ്രകടമായാൽ ഉടൻ തന്നെ വിദഗ്ധ ചികിത്സ തേടാൻ ശ്രദ്ധിക്കുക.
