അമിതമായാൽ അമൃതും വിഷം; ആർട്ടിഫിഷ്യൽ ഇന്റലിജൻസ് നിങ്ങളുടെ തലച്ചോറിനെ വറുത്തെടുക്കുന്നുണ്ടോ? ഞെട്ടിക്കുന്ന പഠനവിവരങ്ങൾ പുറത്ത്

ജോലിഭാരം കുറയ്ക്കാനും വേഗത വർദ്ധിപ്പിക്കാനും നമ്മൾ കൂട്ടുപിടിച്ച ആർട്ടിഫിഷ്യൽ ഇന്റലിജൻസ് (AI) ഇപ്പോൾ മനുഷ്യന്റെ മാനസികാരോഗ്യത്തിന് തന്നെ ഭീഷണിയാകുന്നതായി പുതിയ റിപ്പോർട്ടുകൾ. ഹാർവാർഡ് ബിസിനസ് റിവ്യൂവിൽ പ്രസിദ്ധീകരിച്ച ഏറ്റവും പുതിയ പഠനത്തിലാണ് ‘AI ബ്രെയിൻ ഫ്രൈ’ (AI Brain Fry) എന്ന അവസ്ഥയെക്കുറിച്ച് മുന്നറിയിപ്പ് നൽകുന്നത്. സോഫ്റ്റ്‌വെയർ ഡെവലപ്പർമാർ മുതൽ മാർക്കറ്റിംഗ് പ്രൊഫഷണലുകൾ വരെ എഐ ടൂളുകളെ അമിതമായി ആശ്രയിക്കുന്നവരിലാണ് ഈ ഗുരുതരമായ പ്രതിസന്ധി കണ്ടുവരുന്നത്. അമേരിക്കയിലെ 1,488 തൊഴിൽ മേഖലയിലുള്ളവരിൽ നടത്തിയ സർവ്വേയുടെ അടിസ്ഥാനത്തിലാണ് പഠനം തയ്യാറാക്കിയിരിക്കുന്നത്.

എന്താണ് യഥാർത്ഥത്തിൽ ഈ ‘എഐ ബ്രെയിൻ ഫ്രൈ’? കഠിനമായ മാനസിക തളർച്ച, ശ്രദ്ധ കേന്ദ്രീകരിക്കാനുള്ള ബുദ്ധിമുട്ട്, തീരുമാനങ്ങൾ എടുക്കുന്നതിലെ താമസം, കടുത്ത തലവേദന തുടങ്ങിയവയാണ് ഇതിന്റെ പ്രധാന ലക്ഷണങ്ങൾ. തലച്ചോറിനുള്ളിൽ ഒരു മുഴക്കം അനുഭവപ്പെടുന്നത് പോലെ തോന്നുന്നതിനാലാണ് ഇതിനെ ‘ബ്രെയിൻ ഫ്രൈ’ എന്ന് വിളിക്കുന്നത്. സാധാരണ ജോലി സമ്മർദ്ദം മൂലം ഉണ്ടാകുന്ന ‘ബേൺഔട്ടി’ൽ (Burnout) നിന്നും തികച്ചും വ്യത്യസ്തമാണിത്. വൈകാരികമായ തളർച്ചയാണ് ബേൺഔട്ടിൽ സംഭവിക്കുന്നതെങ്കിൽ, ഒന്നിലധികം എഐ ടൂളുകളെ ഒരേസമയം നിയന്ത്രിക്കേണ്ടി വരുമ്പോൾ തലച്ചോറിന് അനുഭവപ്പെടുന്ന അമിതഭാരമാണ് എഐ ബ്രെയിൻ ഫ്രൈയിലേക്ക് നയിക്കുന്നത്. പഠനത്തിൽ പങ്കെടുത്ത 14 ശതമാനം ആളുകളും തങ്ങൾ ഈ അവസ്ഥയിലൂടെ കടന്നുപോകുന്നതായി സമ്മതിച്ചു.

വിവിധ തൊഴിൽ മേഖലകളെ ഇത് പല രീതിയിലാണ് ബാധിക്കുന്നത്. പഠനമനുസരിച്ച് മാർക്കറ്റിംഗ് മേഖലയിൽ ജോലി ചെയ്യുന്നവരിലാണ് ഏറ്റവും കൂടുതൽ ബ്രെയിൻ ഫ്രൈ (26%) റിപ്പോർട്ട് ചെയ്തിരിക്കുന്നത്. ഹ്യൂമൻ റിസോഴ്‌സ് (19.3%), ഓപ്പറേഷൻസ് (17.9%), സോഫ്റ്റ്‌വെയർ ഡെവലപ്‌മെന്റ് (17.8%) എന്നിവയാണ് തൊട്ടുപിന്നാലെയുള്ളത്. എന്നാൽ നിയമരംഗത്തുള്ളവരിൽ വെറും 5.6 ശതമാനം പേർക്ക് മാത്രമാണ് ഇത്തരം ലക്ഷണങ്ങൾ കണ്ടത്. എഐ ടൂളുകൾ നൽകുന്ന വിവരങ്ങൾ ശരിയാണോ എന്ന് പരിശോധിക്കാനും ഒന്നിലധികം വിൻഡോകളിൽ ഒരേസമയം ഡാറ്റ മാനേജ് ചെയ്യാനും ശ്രമിക്കുമ്പോൾ ജീവനക്കാരുടെ മാനസിക പരിശ്രമം 14 ശതമാനം അധികമാകുന്നുവെന്നും ഇത് ജോലിയിൽ പിഴവുകൾ വരുത്താൻ കാരണമാകുന്നുവെന്നും ഗവേഷകർ ചൂണ്ടിക്കാട്ടുന്നു. ഇത്തരം മാനസിക സമ്മർദ്ദം അനുഭവിക്കുന്നവർ ജോലി രാജിവെക്കാനുള്ള സാധ്യത 39 ശതമാനം കൂടുതലാണെന്നും പഠനം വ്യക്തമാക്കുന്നു. എന്നാൽ ആവർത്തന സ്വഭാവമുള്ള വിരസമായ ജോലികൾ എളുപ്പമാക്കാൻ മാത്രം എഐ ഉപയോഗിക്കുന്നവരിൽ മാനസിക സമ്മർദ്ദം 15 ശതമാനം കുറവാണെന്ന ശുഭവാർത്തയും റിപ്പോർട്ട് പങ്കുവെക്കുന്നുണ്ട്. ചുരുക്കത്തിൽ, എഐയെ ഒരു സഹായിയായി മാത്രം കാണാതെ അമിതമായി നിയന്ത്രിക്കാൻ ശ്രമിക്കുന്നത് മനുഷ്യന്റെ ബുദ്ധിശക്തിയെ തന്നെ തളർത്തിയേക്കാം എന്നാണ് ഈ പഠനം നൽകുന്ന മുന്നറിയിപ്പ്.