പത്തനംതിട്ട റാന്നിയിൽ വിവാഹ വാഗ്ദാനം നൽകി യുവതിയെ തുടർച്ചയായി ലൈംഗികമായി പീഡിപ്പിച്ച സംഭവത്തിൽ സി പി എം പ്രാദേശിക നേതാവിനെതിരെ പോലീസ് കേസെടുത്തു. റാന്നി സ്വദേശിയും സി പി എം നേതാവുമായ അലൻ മാത്യുവിനെതിരെയാണ് ജാമ്യമില്ലാ വകുപ്പുകൾ പ്രകാരം കേസെടുത്തിരിക്കുന്നത്. പീഡനത്തെത്തുടർന്ന് മാനസികമായി തകർന്ന യുവതി ജീവനൊടുക്കാൻ ശ്രമിച്ചതോടെയാണ് ക്രൂരമായ പീഡനവിവരം പുറംലോകമറിഞ്ഞത്. നിലവിൽ ഗുരുതരാവസ്ഥയിലായ യുവതി ആശുപത്രിയിൽ ചികിത്സയിൽ കഴിയുകയാണ്.
യുവതിയുമായി പ്രണയത്തിലായിരുന്ന അലൻ മാത്യു, വിവാഹം കഴിക്കാമെന്ന് വിശ്വസിപ്പിച്ച് നിരന്തരം ലൈംഗികമായി ദുരുപയോഗം ചെയ്യുകയായിരുന്നുവെന്നാണ് പരാതി. എന്നാൽ പിന്നീട് വിവാഹത്തിൽ നിന്ന് ഇയാൾ പിന്മാറുകയും യുവതിയെ വഞ്ചിക്കുകയും ചെയ്തു. ഇതോടെയാണ് മനംനൊന്ത് യുവതി ആത്മഹത്യയ്ക്ക് ശ്രമിച്ചത്. പെൺകുട്ടിയുടെ മൊഴിയുടെ അടിസ്ഥാനത്തിൽ പോലീസ് അന്വേഷണം ഊർജിതമാക്കിയിട്ടുണ്ട്. സി പി എം പ്രാദേശിക നേതൃത്വത്തിൽ സ്വാധീനമുള്ള വ്യക്തിയായ അലൻ മാത്യുവിനെതിരെ പാർട്ടി ഇതുവരെ നടപടിയെടുക്കാത്തത് വലിയ പ്രതിഷേധത്തിന് കാരണമായിട്ടുണ്ട്.
സ്ത്രീ സുരക്ഷയെക്കുറിച്ച് വാചാലരാകുന്ന സി പി എമ്മിന്റെ നേതാക്കൾ തന്നെ ഇത്തരത്തിൽ പീഡനക്കേസുകളിൽ പ്രതികളാകുന്നത് പാർട്ടിയെ പ്രതിരോധത്തിലാക്കിയിരിക്കുകയാണ്. പ്രതിയെ സംരക്ഷിക്കാൻ രാഷ്ട്രീയ ഇടപെടലുകൾ നടക്കുന്നുണ്ടെന്ന് ആരോപിച്ചു പ്രതിപക്ഷ സംഘടനകൾ രംഗത്തെത്തിയിട്ടുണ്ട്. യുവതിയുടെ ആരോഗ്യനിലയിൽ പുരോഗതിയുണ്ടായാൽ മജിസ്ട്രേറ്റിന് മുന്നിൽ രഹസ്യമൊഴി രേഖപ്പെടുത്തും. അലൻ മാത്യു ഒളിവിലാണെന്നും ഇയാൾക്കായി തിരച്ചിൽ തുടരുകയാണെന്നും റാന്നി പോലീസ് അറിയിച്ചു. സംഭവത്തിൽ വനിതാ കമ്മീഷൻ സ്വമേധയാ കേസെടുക്കണമെന്ന ആവശ്യവും ശക്തമാണ്.
