ഐപിഎൽ 2026 സീസണിലെ തങ്ങളുടെ ആദ്യ വിജയം കുറിച്ചിരിക്കുകയാണ് ലഖ്നൗ സൂപ്പർ ജയന്റ്സ്. രാജീവ് ഗാന്ധി ഇന്റർനാഷണൽ സ്റ്റേഡിയത്തിൽ ഞായറാഴ്ച നടന്ന ആവേശപ്പോരാട്ടത്തിൽ സൺറൈസേഴ്സ് ഹൈദരാബാദിനെ 5 വിക്കറ്റിനാണ് ലഖ്നൗ പരാജയപ്പെടുത്തിയത്. അവസാന ഓവർ വരെ നീണ്ടുനിന്ന നാടകീയ നീക്കങ്ങൾക്കൊടുവിൽ നായകൻ റിഷഭ് പന്തിന്റെ ബാറ്റിംഗ് മികവിലാണ് ലഖ്നൗ ലക്ഷ്യം കണ്ടത്.
ഹൈദരാബാദ് ഉയർത്തിയ 157 റൺസ് പിന്തുടർന്ന ലഖ്നൗവിന് തുടക്കത്തിൽ തിരിച്ചടികൾ നേരിട്ടെങ്കിലും റിഷഭ് പന്ത് ഒരറ്റം കാത്തുസൂക്ഷിച്ചു. 50 പന്തുകളിൽ നിന്ന് 68 റൺസുമായി പന്ത് പുറത്താകാതെ നിന്നു. അവസാന രണ്ട് പന്തിൽ ഒരു റൺസ് വേണമെന്നിരിക്കെ സെക്കൻഡ് ലാസ്റ്റ് ബോൾ ബൗണ്ടറി പായിച്ച് പന്ത് ടീമിനെ വിജയത്തിലെത്തിച്ചു. എയ്ഡൻ മാർക്രം (27 പന്തിൽ 45) മികച്ച പിന്തുണ നൽകി.
വിജയത്തിന് പിന്നാലെ ലഖ്നൗ ഉടമ സഞ്ജീവ് ഗോയങ്ക അതീവ വികാരാധീനനായി കാണപ്പെട്ടു. ടീമിന്റെ മോശം ഫോമിൽ മുൻപ് വിമർശനങ്ങൾ നേരിട്ട അദ്ദേഹം, വിജയത്തിന് പിന്നാലെ പന്തിനെ മൈതാനത്ത് വെച്ച് കെട്ടിപ്പിടിക്കുകയും അഭിനന്ദിക്കുകയും ചെയ്തു. മുൻപ് ഡൽഹി ക്യാപിറ്റൽസിനോട് തോറ്റപ്പോൾ ഗോയങ്ക പന്തിനോട് ചൂടാകുന്നു എന്ന തരത്തിൽ വന്ന വാർത്തകൾ തെറ്റാണെന്ന് തെളിയിക്കുന്നതായിരുന്നു ഇരുവരും തമ്മിലുള്ള ഈ ഊഷ്മളമായ കൂടിക്കാഴ്ച.
മത്സരത്തിലെ താരം മുഹമ്മദ് ഷമിയായിരുന്നു. ഹൈദരാബാദിന്റെ മുൻനിരയെ തകർത്ത ഷമി 4 ഓവറിൽ വെറും 9 റൺസ് മാത്രം വഴങ്ങി 2 വിക്കറ്റുകൾ വീഴ്ത്തി. അഭിഷേക് ശർമ്മയെയും ട്രാവിസ് ഹെഡിനെയും തുടക്കത്തിലേ പുറത്താക്കിയ ഷമി ഹൈദരാബാദിനെ പ്രതിരോധത്തിലാക്കി. നിതീഷ് കുമാർ റെഡ്ഡിയുടെയും (56) ഹെൻറിച്ച് ക്ലാസന്റെയും (62) അർദ്ധസെഞ്ച്വറികളാണ് ഹൈദരാബാദിനെ 156/9 എന്ന സ്കോറിലെത്തിച്ചത്.
മത്സരശേഷം ബൗളർമാരെ പ്രശംസിക്കാനാണ് പന്ത് താല്പര്യപ്പെട്ടത്. “ബൗളർമാരാണ് ഈ വിജയം ഒരുക്കിയത്. ഷമി, ആവേശ് ഖാൻ, രാഠി, സിദ്ധാർത്ഥ് എന്നിവരെല്ലാം മികച്ച രീതിയിൽ പന്തെറിഞ്ഞു” – പന്ത് പറഞ്ഞു. വ്യാഴാഴ്ച കൊൽക്കത്ത നൈറ്റ് റൈഡേഴ്സിനെതിരെയാണ് ലഖ്നൗവിന്റെ അടുത്ത മത്സരം.
