കേരളം കടുത്ത വേനൽച്ചൂടിലേക്ക് നീങ്ങുമ്പോൾ ദാഹം ശമിപ്പിക്കാൻ പ്രകൃതിദത്ത പാനീയങ്ങളെ ആശ്രയിക്കുന്നവരാണ് നമ്മളിൽ ഭൂരിഭാഗവും. വഴിമുടനീളമുള്ള കരിമ്പിൻ ജ്യൂസ് കടകളും കരിക്കിൻ വിൽപ്പനക്കാരും ഈ സീസണിലെ സജീവ കാഴ്ചയാണ്. എന്നാൽ ദാഹം മാറ്റുന്നതിനൊപ്പം ശരീരത്തെ കൃത്യമായി ഹൈഡ്രേറ്റ് ചെയ്യാൻ കരിക്കിൻ വെള്ളമാണോ അതോ കരിമ്പിൻ ജ്യൂസാണോ ഉത്തമം എന്ന കാര്യത്തിൽ പലർക്കും സംശയമുണ്ട്. ആരോഗ്യപരമായ ഗുണങ്ങൾ പരിശോധിച്ചാൽ ഇവ രണ്ടും ശരീരത്തിൽ പ്രവർത്തിക്കുന്നത് വ്യത്യസ്ത രീതികളിലാണ്.
വേനൽക്കാലത്ത് വിയർപ്പിലൂടെ ശരീരത്തിന് നഷ്ടപ്പെടുന്ന പൊട്ടാസ്യം, സോഡിയം തുടങ്ങിയ പ്രധാന ഇലക്ട്രോലൈറ്റുകളെ തിരികെ എത്തിക്കാൻ കരിക്കിൻ വെള്ളമാണ് ഏറ്റവും മികച്ചതെന്ന് പഠനങ്ങൾ വ്യക്തമാക്കുന്നു. സ്പോർട്സ് ഡ്രിങ്കുകൾക്ക് സമാനമായ ഗുണങ്ങളാണ് കരിക്കിൻ വെള്ളം നൽകുന്നത്. കലോറി കുറവായതിനാലും കൃത്രിമ മധുരം ഇല്ലാത്തതിനാലും ദിവസവും കുടിക്കാൻ ഏറ്റവും അനുയോജ്യമായ പാനീയമാണിത്. കൂടാതെ, ഇത് വയറിന് ഭാരമുണ്ടാക്കാത്തതിനാൽ കടുത്ത വേനൽ സമയത്ത് കുടിക്കുന്നത് ദഹനപ്രശ്നങ്ങൾ ഒഴിവാക്കാൻ സഹായിക്കും.
അതേസമയം, പെട്ടെന്നുള്ള ഊർജ്ജം ആഗ്രഹിക്കുന്നവർക്ക് കരിമ്പിൻ ജ്യൂസ് തിരഞ്ഞെടുക്കാം. കരിമ്പിൻ ജ്യൂസിൽ അടങ്ങിയിരിക്കുന്ന സുക്രോസ് രക്തത്തിലെ പഞ്ചസാരയുടെ അളവ് പെട്ടെന്ന് വർദ്ധിപ്പിക്കുകയും ശരീരത്തിന് ഉന്മേഷം നൽകുകയും ചെയ്യും. എന്നാൽ കരിക്കിൻ വെള്ളത്തെ അപേക്ഷിച്ച് ഇതിൽ പഞ്ചസാരയുടെ അളവ് വളരെ കൂടുതലാണ്. അതിനാൽ പ്രമേഹ രോഗികൾ കരിമ്പിൻ ജ്യൂസ് കുടിക്കുമ്പോൾ പ്രത്യേക ജാഗ്രത പാലിക്കണം. സ്ഥിരമായി കരിമ്പിൻ ജ്യൂസ് കുടിക്കുന്നത് ശരീരഭാരം വർദ്ധിപ്പിക്കാനും ഇടയാക്കിയേക്കാം.
ചുരുക്കത്തിൽ, ശരീരത്തെ ദീർഘനേരം തണുപ്പിക്കാനും ജലാംശം നിലനിർത്താനും കരിക്കിൻ വെള്ളമാണ് മുൻപന്തിയിൽ നിൽക്കുന്നത്. ക്ഷീണം തോന്നുമ്പോൾ ഊർജ്ജം ലഭിക്കാൻ വല്ലപ്പോഴും കരിമ്പിൻ ജ്യൂസ് കുടിക്കുന്നതിൽ തെറ്റില്ലെങ്കിലും ദിവസേനയുള്ള ഉപയോഗത്തിന് കരിക്കിൻ വെള്ളം തന്നെയാണ് ആരോഗ്യകരം. കരിമ്പിൻ ജ്യൂസ് കുടിക്കുന്നവർ അതിൽ ഐസ് ചേർക്കുന്നത് പരമാവധി ഒഴിവാക്കുന്നത് തൊണ്ടവേദനയും മറ്റ് ആരോഗ്യപ്രശ്നങ്ങളും തടയാൻ സഹായിക്കും. ഏത് പാനീയമായാലും വൃത്തിയുള്ള സാഹചര്യത്തിലാണ് നിർമ്മിക്കുന്നതെന്ന് ഉറപ്പുവരുത്തണമെന്നും ആരോഗ്യ വിദഗ്ധർ ഓർമ്മിപ്പിക്കുന്നു.
