റോയൽ ചലഞ്ചേഴ്സ് ബെംഗളൂരു വിക്കറ്റ് കീപ്പർ ബാറ്റർ ജിതേഷ് ശർമ്മ, രാജസ്ഥാൻ റോയൽസ് ഓപ്പണർ വൈഭവ് സൂര്യവംശിയെ “അൺപ്രൊഫഷണൽ” എന്ന് വിശേഷിപ്പിച്ചത് അടുത്തിടെ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരുന്നു. എന്നാൽ ഈ പരാമർശത്തിന് പിന്നിലെ യഥാർത്ഥ സാഹചര്യം വിശദീകരിച്ചുകൊണ്ട് ജിതേഷ് തന്നെ ഇപ്പോൾ രംഗത്തെത്തിയിരിക്കുകയാണ്. ആർസിബി പോഡ്കാസ്റ്റിലായിരുന്നു താരം മനസ്സ് തുറന്നത്.
“വൈഭവ് എന്റെ അടുത്ത സുഹൃത്താണ്. ഞങ്ങൾ തമ്മിൽ അത്രയും അടുത്ത ബന്ധമാണുള്ളത്, അതുകൊണ്ട് എനിക്ക് അവനെ എന്തുവേണമെങ്കിലും വിളിക്കാം,” ജിതേഷ് പറഞ്ഞു. എബി ഡിവില്ലിയേഴ്സുമായുള്ള അഭിമുഖത്തിനിടയിലാണ് ജിതേഷ് ഈ പരാമർശം നടത്തിയത്. ഇന്ത്യൻ ക്രിക്കറ്റിലെ അടുത്ത സൂപ്പർ താരം ആരായിരിക്കും എന്ന ചോദ്യത്തിന് വൈഭവ് സൂര്യവംശി എന്നായിരുന്നു ജിതേഷിന്റെ മറുപടി. വൈഭവിന്റെ സാങ്കേതിക തികവും കഠിനാധ്വാനവും മൂന്ന് ഫോർമാറ്റുകളിലും തിളങ്ങാനുള്ള കഴിവും താൻ അവിടെ ചൂണ്ടിക്കാട്ടിയിരുന്നുവെന്നും ജിതേഷ് വ്യക്തമാക്കി.
ഗ്രൗണ്ടിന് പുറത്ത് വൈഭവ് ഇപ്പോഴും ഒരു കൊച്ചു കുട്ടിയാണെന്ന് ജിതേഷ് ഓർമ്മിപ്പിച്ചു. “അവൻ വെറും 15 വയസ്സുള്ള കുട്ടിയാണ്. അവന് ഐസ്ക്രീം കഴിക്കാനും കാർട്ടൂൺ കാണാനും ഇഷ്ടമാണ്. അവൻ എന്റെ മുറിയിൽ വരും, ഞങ്ങൾ ഒരുമിച്ച് ഐസ്ക്രീം കഴിക്കും. എന്റെ ഭാര്യയോട് സംസാരിക്കുകയും യൂട്യൂബിൽ വീഡിയോകൾ കാണുകയും ചെയ്യും. എനിക്ക് അവൻ അനിയനെപ്പോലെയാണ്,” ജിതേഷ് പറഞ്ഞു.
സോഷ്യൽ മീഡിയയിലെ വിമർശനങ്ങളെ താൻ കാര്യമാക്കുന്നില്ലെന്നും ജിതേഷ് കൂട്ടിച്ചേർത്തു. ഈ പ്രായത്തിൽ വൈഭവിൽ നിന്ന് എല്ലാവരും വലിയ പ്രൊഫഷണലിസം പ്രതീക്ഷിക്കുന്നുണ്ടാകാം, എന്നാൽ അവൻ ഇപ്പോഴും ഒരു കുട്ടിയാണെന്ന യാഥാർത്ഥ്യം മറക്കരുത്. എന്റെ കൂടെയുള്ളപ്പോൾ അവന് അവനായി തന്നെ ഇരിക്കാം. “നീ വെറും പതിനഞ്ച് വയസ്സുകാരനാണ്, ടിവി കാണൂ, നിനക്ക് ഇഷ്ടമുള്ളത് കഴിക്കൂ, ബാറ്റിംഗിൽ മാത്രം ശ്രദ്ധിക്കൂ” എന്നാണ് താൻ അവനോട് പറയാറുള്ളതെന്നും ജിതേഷ് വ്യക്തമാക്കി.
യുവതാരത്തിന് അനാവശ്യ സമ്മർദ്ദം നൽകാതെ അവന്റെ സ്വാഭാവികമായ വളർച്ചയ്ക്ക് പ്രാധാന്യം നൽകണമെന്ന ജിതേഷിന്റെ വാക്കുകൾക്ക് വലിയ പിന്തുണയാണ് ക്രിക്കറ്റ് ആരാധകരിൽ നിന്ന് ലഭിക്കുന്നത്.
