വേനൽ കടുക്കുന്നതോടെ രാജ്യത്തിന്റെ വിവിധ ഭാഗങ്ങളിൽ ചൂട് റെക്കോർഡുകൾ ഭേദിച്ച് മുന്നേറുകയാണ്. കടുത്ത ചൂടിനൊപ്പം അഗ്നിബാധയ്ക്കുള്ള സാധ്യതകളും വർധിക്കുന്നുവെന്നാണ് അഗ്നിശമന സേന നൽകുന്ന മുന്നറിയിപ്പ്. വീടുകളിൽ ഏറ്റവും അപകടകാരിയാകാൻ സാധ്യതയുള്ള ഒന്നാണ് എൽപിജി സിലിണ്ടറുകൾ. ശരിയായ രീതിയിൽ കൈകാര്യം ചെയ്തില്ലെങ്കിൽ വലിയ സ്ഫോടനങ്ങൾക്കും ദുരന്തങ്ങൾക്കും ഇത് കാരണമായേക്കാം. സിലിണ്ടറിനുള്ളിൽ ഉയർന്ന മർദ്ദത്തിൽ ദ്രാവക രൂപത്തിലാണ് പാചകവാതകം സൂക്ഷിക്കുന്നത്. പുറത്തെ താപനില ഉയരുമ്പോൾ സിലിണ്ടറിനുള്ളിലെ മർദ്ദവും വർധിക്കുന്നു. നേരിട്ട് വെയിൽ ഏൽക്കുകയോ തീയുടെ സാമീപ്യമുണ്ടാവുകയോ ചെയ്താൽ സിലിണ്ടർ പൊട്ടിത്തെറിക്കാൻ വരെ ഇത് കാരണമാകും. ഈ സാഹചര്യത്തിൽ എൽപിജി സിലിണ്ടർ ഉപയോഗിക്കുമ്പോൾ ശ്രദ്ധിക്കേണ്ട 5 സുരക്ഷാ മുൻകരുതലുകൾ പരിശോധിക്കാം.
സിലിണ്ടറുകൾ എപ്പോഴും തണലുള്ളതും വായുസഞ്ചാരമുള്ളതുമായ സ്ഥലങ്ങളിൽ മാത്രം സൂക്ഷിക്കുക എന്നതാണ് ഏറ്റവും പ്രധാനപ്പെട്ട കാര്യം. ജനലുകൾ വഴി നേരിട്ട് വെയിൽ അടിക്കുന്ന ഇടങ്ങളിലോ, ഓവൻ പോലുള്ള ചൂട് പുറത്തുവിടുന്ന ഉപകരണങ്ങൾക്ക് അടുത്തോ സിലിണ്ടർ വെക്കരുത്. സിലിണ്ടറുകൾ എപ്പോഴും കുത്തനെ തന്നെ വെക്കാൻ ശ്രദ്ധിക്കണം. രണ്ടാമതായി, റെഗുലേറ്ററും ഹോസ് പൈപ്പും ആഴ്ചയിലൊരിക്കലെങ്കിലും പരിശോധിക്കണം. കടുത്ത ചൂടിൽ റബ്ബർ പൈപ്പുകൾ പെട്ടെന്ന് ദ്രവിക്കാൻ സാധ്യതയുണ്ട്. സോപ്പ് ലായനി ഉപയോഗിച്ച് പൈപ്പിൽ കുമിളകൾ വരുന്നുണ്ടോ എന്ന് നോക്കി ചോർച്ച കണ്ടെത്താം. ഗ്യാസ് സ്റ്റൗവിൽ നിന്നും മറ്റ് ഇലക്ട്രിക്കൽ പോയിന്റുകളിൽ നിന്നും സിലിണ്ടർ കുറഞ്ഞത് അഞ്ചടി ദൂരമെങ്കിലും മാറ്റി സ്ഥാപിക്കണം. പെട്രോൾ, ഏറോസോൾ സ്പ്രേകൾ തുടങ്ങിയ തീപിടിക്കാൻ സാധ്യതയുള്ള വസ്തുക്കൾ സിലിണ്ടറിന് അടുത്തുണ്ടാകരുത്.
ഗ്യാസ് സിലിണ്ടർ ഒരിക്കലും തറനിരപ്പിന് താഴെയുള്ള അറകളിലോ വായുസഞ്ചാരമില്ലാത്ത മുറികളിലോ സൂക്ഷിക്കരുത്. എൽപിജി വായുവിനേക്കാൾ ഭാരമുള്ളതായതിനാൽ ചോർച്ചയുണ്ടായാൽ തറയോട് ചേർന്ന് കെട്ടിക്കിടക്കാൻ സാധ്യതയുണ്ട്. ഇത് വലിയ സ്ഫോടനത്തിന് വഴിവെക്കും. സിലിണ്ടർ എപ്പോഴും സ്റ്റൗവിന് താഴെയുള്ള നിരപ്പിൽ വേണം സൂക്ഷിക്കാൻ. പാചകം കഴിഞ്ഞാലുടൻ സ്റ്റൗവിലെ നോബ് ഓഫ് ചെയ്യുന്നതിനോടൊപ്പം സിലിണ്ടറിലെ റെഗുലേറ്ററും നിർബന്ധമായും ഓഫ് ചെയ്യുക. രാത്രി ഉറങ്ങാൻ പോകുന്നതിന് മുൻപ് റെഗുലേറ്റർ ഓഫ് ആണെന്ന് ഉറപ്പുവരുത്തണം. ഗ്യാസ് മണം അനുഭവപ്പെട്ടാൽ സ്വിച്ചുകളോ തീപ്പെട്ടിയോ ഉപയോഗിക്കരുത്. ഉടൻ തന്നെ ജനലുകളും വാതിലുകളും തുറന്നിടുകയും റെഗുലേറ്റർ ഓഫ് ചെയ്യുകയും വേണം. കുട്ടികളെ ഗ്യാസ് സിലിണ്ടറിന് സമീപം കളിക്കാൻ അനുവദിക്കരുത്. അപകടമുണ്ടായാൽ ഉടൻ തന്നെ ഗ്യാസ് ഏജൻസിയെയോ എമർജൻസി സർവീസിനെയോ വിവരം അറിയിക്കണമെന്നും നിർദ്ദേശമുണ്ട്.
