ഐ.പി.എൽ 2026-ലെ നിർണ്ണായക മത്സരത്തിൽ ചെന്നൈ സൂപ്പർ കിംഗ്സിന് കനത്ത തിരിച്ചടി. ഗുജറാത്ത് ടൈറ്റൻസിനെതിരെയുള്ള ജീവനമരണ പോരാട്ടത്തിൽ വിക്കറ്റ് കീപ്പറും മലയാളി സൂപ്പർ താരവുമായ സഞ്ജു സാംസൺ പരിക്കേറ്റ് പുറത്തായി. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന മത്സരത്തിന്റെ തുടക്കത്തിൽത്തന്നെയാണ് ചെന്നൈ ക്യാമ്പിനെ നടുക്കിയ ഈ സംഭവം ഉണ്ടായത്.
ഗുജറാത്ത് ടൈറ്റൻസ് ഇന്നിങ്സിന്റെ രണ്ടാം ഓവറിൽ സ്പെൻസർ ജോൺസൺ എറിഞ്ഞ പന്തിലാണ് സഞ്ജുവിന് പരിക്കേൽക്കുന്നത്. സായ് സുദർശനെതിരെ ലെഗ് സൈഡിലേക്ക് പോയ പന്ത് തടുക്കാനായി സഞ്ജു പൂർണ്ണാകൃതിയിൽ ഡൈവ് ചെയ്തു. എന്നാൽ അപ്രതീക്ഷിതമായി ദിശ മാറിയ പന്ത് സഞ്ജുവിന്റെ വിരലുകളിൽ ശക്തമായി വന്ന് ഇടിക്കുകയായിരുന്നു. ഈ പന്ത് തടുക്കാൻ സാധിക്കാത്തതിനെത്തുടർന്ന് അഞ്ച് വൈഡുകളാണ് ഗുജറാത്തിന് ലഭിച്ചത്.
പരിക്കേറ്റ ഉടൻ തന്നെ ചെന്നൈ ടീമിന്റെ ഫിസിയോ മൈതാനത്തെത്തി സഞ്ജുവിനെ പരിശോധിച്ചു. എന്നാൽ കടുത്ത വേദനയെത്തുടർന്ന് താരം കളം വിടാൻ തീരുമാനിക്കുകയായിരുന്നു. സഞ്ജുവിന് പകരം ഉർവിൽ പട്ടേലാണ് തുടർന്ന് ചെന്നൈയ്ക്കായി വിക്കറ്റ് കീപ്പിങ് ചുമതലകൾ ഏറ്റെടുത്തത്.
മത്സരത്തിൽ ടോസ് നേടിയ ചെന്നൈ സൂപ്പർ കിംഗ്സ് നായകൻ ഋതുരാജ് ഗെയ്ക്വാദ് ആദ്യം ബോൾ ചെയ്യാൻ തീരുമാനിക്കുകയായിരുന്നു. സ്ക്വാഡിൽ രണ്ട് മാറ്റങ്ങളുമായാണ് ചെന്നൈ ഇറങ്ങിയത്. പ്രശാന്ത് വീറിന് പകരം മാറ്റ് ഷോർട്ടും, അകീൽ ഹൊസൈന് പകരം ഗുർജപ്നീത് സിംഗും ടീമിലെത്തി. മറുവശത്ത് സായ് കിഷോറിന് പകരം പ്രസിദ്ധ് കൃഷ്ണയെ ഉൾപ്പെടുത്തിയാണ് ഗുജറാത്ത് ഇറങ്ങിയത്.
നിലവിൽ പോയിന്റ് ടേബിളിൽ 13 മത്സരങ്ങളിൽ നിന്ന് 16 പോയിന്റുമായി രണ്ടാം സ്ഥാനത്തുള്ള ഗുജറാത്ത് ടൈറ്റൻസിന് ഈ വിജയം ആദ്യ രണ്ട് സ്ഥാനങ്ങളിൽ ഒന്നിടം ഉറപ്പാക്കാൻ അത്യാവശ്യമാണ്. എന്നാൽ 13 മത്സരങ്ങളിൽ നിന്ന് വെറും 12 പോയിന്റുമായി ആറാം സ്ഥാനത്തുള്ള ചെന്നൈ സൂപ്പർ കിംഗ്സ് പ്ലേ ഓഫ് റേസിൽ നിന്നും ഏതാണ്ട് പുറത്തായ മട്ടാണ്. ഈ മത്സരത്തിൽ ഗുജറാത്തിനെതിരെ വമ്പൻ മാർജിനിൽ വിജയിക്കുകയും മറ്റ് മത്സരങ്ങളുടെ ഫലം അനുകൂലമാവുകയും ചെയ്താൽ മാത്രമേ ചെന്നൈയ്ക്ക് നേരിയ സാധ്യതയെങ്കിലും അവശേഷിക്കൂ. ആ ഘട്ടത്തിലാണ് ടീമിന്റെ ഏറ്റവും പ്രധാന താരങ്ങളിലൊരാളായ സഞ്ജുവിന്റെ ഈ അപ്രതീക്ഷിത പരിക്ക് ചെന്നൈയ്ക്ക് ഇരട്ടപ്രഹരമാകുന്നത്.
