ധീരുഭായ് അംബാനി ഇന്റർനാഷണൽ സ്കൂളിലെ 2026 ബാച്ച് ബിരുദദാന ചടങ്ങിൽ ഒരു വിദ്യാർത്ഥി നടത്തിയ പ്രസംഗം ഇപ്പോൾ സമൂഹമാധ്യമങ്ങളിൽ വൈറലാകുകയാണ്. തങ്ങളുടെ ഉടമസ്ഥതയിലുള്ള മുംബൈ ഇന്ത്യൻസ് ഐ.പി.എൽ ടീമിനെ പരിഹസിച്ചുകൊണ്ട് ഹെഡ് ബോയ് നടത്തിയ തമാശ നിറഞ്ഞ പരാമർശം സ്കൂൾ ചെയർപേഴ്സൺ നിത അംബാനിയെപ്പോലും ചിരിപ്പിച്ചു.
സാധാരണയായി ബിരുദദാന ചടങ്ങുകൾ വൈകാരികമായ ഓർമ്മപ്പെടുത്തലുകളും ഭാവിയിലേക്കുള്ള ഉപദേശങ്ങളും നിറഞ്ഞതാകാറുണ്ട്. എന്നാൽ അതിൽ നിന്ന് വ്യത്യസ്തമായി ക്രിക്കറ്റ് തമാശകൾ കൂടി കലർത്തിയതായിരുന്നു ഈ വിദ്യാർത്ഥിയുടെ പ്രസംഗം. സ്കൂൾ ജീവിതത്തെക്കുറിച്ചും ഭാവിയിലെ വെല്ലുവിളികളെക്കുറിച്ചും സംസാരിക്കുന്നതിനിടയിലാണ് താരം അപ്രതീക്ഷിതമായ ആ ‘റിപ്പോർട്ട്’ നടത്തിയത്.
“നമ്മുടെ പ്രിയപ്പെട്ട മുംബൈ ഇന്ത്യൻസിനെപ്പോലെ ജീവിതത്തിലും നമുക്ക് വളരെ കഠിനമായ സീസണുകൾ ഉണ്ടാകും. ഒന്നും ശരിയാകാത്ത, പരിശ്രമങ്ങൾക്ക് ഫലം ലഭിക്കാത്ത, എല്ലാം ചോദ്യം ചെയ്യപ്പെടുന്ന ഒരു അവസ്ഥ. പക്ഷേ, ഈ ടീം നമ്മളെ പഠിപ്പിച്ച ഒന്നുണ്ട്; നിങ്ങൾ ആരാണെന്ന് ഒരിക്കലും മറക്കരുത്. നിങ്ങളുടെ പാരമ്പര്യവും കൂടെ നിൽക്കുന്നവരെയും ഒരിക്കലും വിസ്മരിക്കരുത്.”
ഈ വരികൾ കേട്ടയുടൻ ഓഡിറ്റോറിയത്തിലുടനീളം വലിയ ചിരിയാണ് ഉയർന്നത്. ക്യാമറ നിത അംബാനിയുടെ മുഖത്തേക്ക് തിരിഞ്ഞപ്പോൾ, അവർ പൊട്ടിച്ചിരിച്ചുകൊണ്ട് കൈകൊണ്ട് മുഖം മറയ്ക്കുന്ന ദൃശ്യമാണ് കാണാൻ സാധിച്ചത്. പ്രസംഗം ഗൗരവകരമായി തുടങ്ങിയെങ്കിലും, മുംബൈ ഇന്ത്യൻസിന്റെ പ്രശസ്തമായ മുദ്രാവാക്യമായ “ദുനിയാ ഹിലാ ദേംഗേ ഹം” (Duniya Hila Denge Hum) എന്ന് പറഞ്ഞാണ് വിദ്യാർത്ഥി തന്റെ പ്രസംഗം അവസാനിപ്പിച്ചത്. ഈ വരി കേട്ടതോടെ നിത അംബാനി എഴുന്നേറ്റ് നിന്ന് ചിരിച്ചുകൊണ്ട് വിദ്യാർത്ഥിയെ അഭിനന്ദിക്കുകയും കൈയടിക്കുകയും ചെയ്തു. ബാഡ്മിന്റൺ താരം പി.വി. സിന്ധു ഉൾപ്പെടെയുള്ള പ്രമുഖർ ചടങ്ങിൽ അതിഥികളായി എത്തിയിരുന്നു.
ഇങ്ങനെ ഒരു സന്ദർഭത്തിൽ പോലും ഇത്രയധികം ആത്മവിശ്വാസത്തോടെയും നർമ്മബോധത്തോടെയും സംസാരിച്ച വിദ്യാർത്ഥിയെ സോഷ്യൽ മീഡിയ വാനോളം പുകഴ്ത്തുകയാണ്. നിത അംബാനിയുടെ ഈ നല്ല മനസ്സിനെയും സോഷ്യൽ മീഡിയ അഭിനന്ദിക്കുന്നു.
