ന്യൂഡൽഹി : വരാനിരിക്കുന്ന രാജ്യസഭ തിരഞ്ഞെടുപ്പിനുള്ള സ്ഥാനാർത്ഥികളുടെ പട്ടിക പുറത്തിറക്കി ബിജെപി. 11 പേരുടെ പട്ടികയാണ് പുറത്തുവിട്ടിരിക്കുന്നത്. പാർട്ടിക്ക് വേണ്ടി ദീർഘകാലമായി പ്രവർത്തിക്കുന്ന മുതിർന്ന നേതാക്കൾക്ക് പ്രാധാന്യം നൽകിയാണ് സ്ഥാനാർത്ഥികളെ പ്രഖ്യാപിച്ചിരിക്കുന്നത്. രാജസ്ഥാനിൽ നിന്നുള്ള പ്രമുഖ നേതാവ് സതീഷ് പൂനിയ, പാർട്ടി ദേശീയ ജനറൽ സെക്രട്ടറി തരുൺ ചുഗ് എന്നിവർ സ്ഥാനാർത്ഥികളിൽ ഉൾപ്പെടുന്നു.
മുൻ രാജസ്ഥാൻ ബിജെപി അധ്യക്ഷനും നിലവിൽ ഹരിയാനയിലെ പാർട്ടി പ്രവർത്തനങ്ങളുടെ ചുമതലക്കാരനുമാണ് ഡോ. സതീഷ് പൂനിയ. ബിജെപിയുടെ ദേശീയ ജനറൽ സെക്രട്ടറിയായ തരുൺ ചുഗ് അമൃത്സറിൽ നിന്നുള്ള നേതാവാണ്. രാജ്യസഭയിലെ 24 സീറ്റുകളിലേക്കുള്ള തിരഞ്ഞെടുപ്പ് 2026 ജൂൺ 18-ന് നടക്കും. വോട്ടെണ്ണലും അന്നുതന്നെയായിരിക്കും. നിലവിൽ 245 അംഗ സഭയിൽ ബിജെപിക്ക് 113 അംഗങ്ങളും എൻഡിഎ സഖ്യത്തിന് ആകെ 148 അംഗങ്ങളുമുണ്ട്. ജൂൺ മാസത്തിൽ കേന്ദ്രമന്ത്രി ഹർദീപ് സിംഗ് പുരി, മുൻ പ്രധാനമന്ത്രി എച്ച്.ഡി. ദേവഗൗഡ, കോൺഗ്രസ് അധ്യക്ഷൻ മല്ലികാർജുൻ ഖാർഗെ ഉൾപ്പെടെയുള്ള പ്രമുഖരുടെ കാലാവധി അവസാനിക്കുകയാണ്.
ഡോ. സതീഷ് പൂനിയ, ഡോ. അൽക്ക ഗുർജാർ എന്നിവർ രാജസ്ഥാൻ രാജ്യസഭാ സീറ്റിൽ നിന്നും തരുൺ ചുഗ് മധ്യപ്രദേശിൽ നിന്നുമാണ് മത്സരിക്കുന്നത്. തായ് തഗാക്ക് അരുണാചൽ പ്രദേശിൽ നിന്നും രാജുഭായ് ശുക്ല, മുകേഷ് ഭായ് രത്വ, മാൻസിംഗ് പർമർ, ജിതേന്ദ്ര മേഘ്ജിഭായ് കൻസാരിയ എന്നിവർ ഗുജറാത്തിൽ നിന്നും മത്സരിക്കും. മണിപ്പൂരിൽ നിന്നും ബിജെപി സംസ്ഥാന അധ്യക്ഷ എ. ശാരദാ ദേവി ആണ് മത്സരിക്കുന്നത്. ഉപതിരഞ്ഞെടുപ്പ് നടക്കുന്ന ഒഡീഷയിൽ നിന്നും ദേബാശിഷ് സാമന്തറേ മത്സരിക്കും.
