രാഹുൽ ഗാന്ധി ഒരു വൻ തമാശ; രാഹുലിനും കോൺഗ്രസിനുമെതിരെ ആഞ്ഞടിച്ച് ഡിഎംകെ, തമിഴ്‌നാട്ടിൽ സഖ്യം തകർന്നതിന് പിന്നാലെ രാഷ്ട്രീയ പോര് മുറുകുന്നു

പ്രതിപക്ഷ നിരയിലെ പ്രമുഖ നേതാവും മുൻ സഖ്യകക്ഷിയുമായ രാഹുൽ ഗാന്ധിക്കെതിരെ കടുത്ത ഭാഷയിൽ ആക്രമണം നടത്തി തമിഴ്‌നാട്ടിലെ ഭരണകക്ഷിയായ ഡിഎംകെ. പാർട്ടിയുടെ ഐടി വിങ് രാഹുൽ ഗാന്ധിയെ “ഒരു വൻ തമാശ” എന്ന് വിളിച്ച് പരിഹസിച്ചപ്പോൾ, ഡിഎംകെയുടെ ഔദ്യോഗിക മുഖപത്രമായ ‘മുരശൊലി’ പ്രതിപക്ഷ ഐക്യം തകർത്തത് രാഹുൽ ഗാന്ധിയാണെന്ന ഗുരുതരമായ ആരോപണം ഉന്നയിച്ചു. ഇൻഡി മുന്നണിയിലും തമിഴ്‌നാട്ടിലും കോൺഗ്രസ് പുലർത്തുന്ന രാഷ്ട്രീയ നിലപാടുകളെ മുരശൊലി കടുത്ത ഭാഷയിൽ ചോദ്യം ചെയ്തു.

“രാഷ്ട്രീയ നിലനിൽപ്പിനായി കോൺഗ്രസ് പോരാടിയ സമയത്ത് ഞങ്ങൾ അവരെ തോളിലേറ്റിയാണ് നടത്തിയത്, എന്നാൽ തിളങ്ങുന്ന പുതിയൊരു കളിപ്പാട്ടം കണ്ട രണ്ടാം വശത്ത് അവർ ഞങ്ങളെ വഞ്ചിച്ചു” എന്നായിരുന്നു ഡിഎംകെയുടെ ഐടി വിങ് സോഷ്യൽ മീഡിയയിൽ കുറിച്ചത്. ‘രാഹുൽ ഗാന്ധി ഒരു വലിയ തമാശയാണ്’ എന്ന് പറഞ്ഞാണ് ഈ പോസ്റ്റ് അവസാനിക്കുന്നത്.

തമിഴ്‌നാട്ടിൽ അടുത്തിടെയുണ്ടായ വലിയ രാഷ്ട്രീയ മാറ്റങ്ങളുടെ പശ്ചാത്തലത്തിലാണ് ഈ വാക്പോര് കടുക്കുന്നത്. 2026-ലെ നിയമസഭാ തിരഞ്ഞെടുപ്പിൽ ഡിഎംകെ സഖ്യത്തിന്റെ ഭാഗമായി മത്സരിച്ച് അഞ്ച് സീറ്റുകൾ നേടിയ കോൺഗ്രസ്, പിന്നീട് സഖ്യം വിടുകയായിരുന്നു. തുടർന്ന് നടൻ വിജയ് നയിക്കുന്ന തമിഴക വെട്രി കഴകംസർക്കാരിന്റെ ഭാഗമായി അവർ ഭരണത്തിൽ പങ്കാളികളായി. ഇതോടെ തമിഴ്‌നാട്ടിൽ ഡിഎംകെയുടെ നേതൃത്വത്തിലുള്ള പ്രതിപക്ഷ മുന്നണി ശുഷ്കമായി മാറി. ദേശീയ തലത്തിലും ഡിഎംകെ-കോൺഗ്രസ് ബന്ധം വഷളായിരിക്കുകയാണ്. കോൺഗ്രസ് വിളിച്ചുചേർത്ത ഇൻഡി മുന്നണിയുടെ യോഗം ഡിഎംകെ അടുത്തിടെ ബഹിഷ്കരിച്ചിരുന്നു. എങ്കിലും മുന്നണിയിലെ മറ്റ് പ്രതിപക്ഷ പാർട്ടികൾ ഉയർത്തുന്ന വിഷയങ്ങളെ തുടർന്നും പിന്തുണയ്ക്കുമെന്ന് ഡിഎംകെ വ്യക്തമാക്കിയിട്ടുണ്ട്.

രാഹുൽ ഗാന്ധി പ്രതിപക്ഷ ഐക്യത്തെക്കുറിച്ച് പ്രസംഗിക്കുകയാണെന്നും എന്നാൽ വിവിധ സംസ്ഥാനങ്ങളിൽ ആ ഐക്യം തകർത്തത് അദ്ദേഹം തന്നെയാണെന്നും മുരശൊലി പത്രാധിപക്കുറിപ്പിൽ ആരോപിക്കുന്നു. കേരളത്തിലെ ഇടതുപക്ഷ നേതാക്കൾ രാഹുൽ ഗാന്ധിക്കെതിരെ ഉന്നയിച്ച വിമർശനങ്ങൾ മുരശൊലി വിശദമായി എടുത്തുപറയുന്നുണ്ട്. തിരഞ്ഞെടുപ്പ് പ്രചാരണ വേളയിൽ പിണറായി വിജയനെ അറസ്റ്റ് ചെയ്യണമെന്ന് രാഹുൽ ആവശ്യപ്പെട്ടതും, എൽഡിഎഫ് സർക്കാരിന് ബിജെപിയുമായി രഹസ്യ ധാരണയുണ്ടെന്ന് ആരോപിച്ചതും കമ്മ്യൂണിസ്റ്റ് നേതാക്കളെ ചൊടിപ്പിച്ചിരുന്നു. ബിജെപിയെ നേരിടുന്നതിനേക്കാൾ സ്വന്തം സഖ്യകക്ഷികളെ തകർക്കാനാണോ കോൺഗ്രസിന് താല്പര്യം എന്ന് അന്ന് ഇടതുനേതാക്കൾ ചോദിച്ച കാര്യവും മുഖപത്രം ഓർമ്മിപ്പിച്ചു.