ഗോൾ കീപ്പറായ അലക്സാണ്ടർ ഷ്ലാഗർ ഉൾപ്പടെ അഞ്ചോളം ഓസ്ട്രിയൻ കളിക്കാർ പെനൽറ്റി ബോക്സിൽ ഉണ്ടായിരുന്നു. പക്ഷേ അവർക്കിടയിലൂടെ ലയണൽ മെസി തൻ്റെ രണ്ടാമത്തെ ഗോൾ നേടി. 2-0 എന്ന മാർജിനിൽ അർജൻ്റീനയുടെ വിജയം പൂർത്തിയായി. എത്ര നേർത്ത ഒരു ഗ്യാപ്പാണ് മെസ്സി കണ്ടെത്തിയത്. മഹാഭാരത കഥയിലെ അർജ്ജുനനും ദ്രോണാചാര്യരും തമ്മിലുള്ള സംഭാഷണം പോലെയാണ് മെസ്സിയുടെ ഗെയിം. വില്ലുകുലച്ച് നിൽക്കുന്ന മെസി പക്ഷിയുടെ കണ്ണ് മാത്രമേ കാണുന്നുള്ളൂ.
കളിയുടെ ഒമ്പതാം മിനുറ്റിൽ മെസി ഒരു പെനൽറ്റി പാഴാക്കുന്നുണ്ട്. ആ സമയത്ത് ഷ്ലാഗർ എന്ന ഗോളി വല്ലാത്ത ആനന്ദം പ്രകടമാക്കിയിരുന്നു. ലോകമെമ്പാടും ഉള്ള മെസ്സി ഹേറ്റേഴ്സ് ട്രോളുകൾ തയ്യാറാക്കിത്തുടങ്ങിയിരുന്നു. അധികം വൈകാതെ മെസ്സി ഒരു വലംകാൽ ഷോട്ട് പായിച്ചു. ഷ്ലാഗർ അതും തടുത്തിട്ടു. ഇത് മെസ്സിയുടെ ദിവസമല്ല എന്ന് ചിലരെങ്കിലും വിശ്വസിച്ചുതുടങ്ങി. എന്നാൽ മെസ്സി വിരോധികളുടെ ആഹ്ലാദത്തിന് കളിയുടെ ഫസ്റ്റ് ഹാഫിൽ തന്നെ വിരാമമായി. മുപ്പത്തിയെട്ടാം മിനുറ്റിൽ മെസ്സി ഗോൾ പോസ്റ്റിലേയ്ക്ക് നിറയൊഴിച്ചു.
ബോക്സിങ്ങ് റിങ്ങിലെ ഇതിഹാസമായിരുന്ന മൈക്ക് ടൈസനെ ഈ അവസരത്തിൽ ഓർക്കുകയാണ്. ടൈസൻ ഒരു അമേച്വർ ബോക്സറായിരുന്ന കാലത്ത് ഹെൻറി ടിൽമാൻ ടൈസനെ രണ്ടുതവണ പരാജയപ്പെടുത്തിയിരുന്നു. ഏതാനും വർഷങ്ങൾക്കുശേഷം ടൈസനും ഹെൻറിയും വീണ്ടും മുഖാമുഖം വന്നു. ടൈസൻ അന്ന് നേടിയ വിജയത്തെക്കുറിച്ച് മാദ്ധ്യമങ്ങൾ ഇങ്ങനെ എഴുതി- ”ടൈസൻ എന്ന പോരാളിയുടെ വലതുകൈ ലക്ഷ്യം കണ്ടെത്തി. ഒരു ഇടി ധാരാളമായിരുന്നു. തോക്കിൽ നിന്ന് വെടിയേറ്റത് പോലെയാണ് ഹെൻറി നിലംപതിച്ചത്.”
മെസിയുടെ തിരിച്ചുവരവ് ടൈസൻ നൽകിപ്പോന്നിരുന്ന പഞ്ചുകൾ പോലെയായിരുന്നു. പെനൽറ്റി സേവ് ചെയ്തപ്പോൾ അലറിവിളിച്ച ഷ്ലാഗറിന് കളി അവസാനിച്ചപ്പോൾ നിരാശനായി ഗ്രൗണ്ടിൽ ചുറ്റി നടക്കേണ്ടിവന്നു. മെസിക്ക് അധികം വൈകാതെ 39 വയസ്സ് തികയും. ശരിക്കും നമ്മൾ വിചാരിക്കും. ഊ പ്രായത്തിൽ ഇത്ര വലിയ മികവ് പുലർത്തുന്നത് മനുഷ്യ സാധ്യമാണോ!? 41 വയസ്സുള്ള സമയത്ത് സെറീന വില്യംസ് യു.എസ് ഓപ്പണിൽ ഒരു മത്സരം വിജയിച്ചിരുന്നു. ലോക രണ്ടാം നമ്പർ താരമായിരുന്ന അനെറ്റ് കോൺടാവെയ്റ്റിനെയാണ് സെറീന കീഴടക്കിയത.
മത്സരശേഷം സെറീന ഒരു ചോദ്യം നേരിട്ടു ”ഈ പ്രായത്തിലും നിങ്ങൾ ഇത്ര ഉയർന്ന നിലവാരം പുലർത്തുന്നു! ഇതൊരു സർപ്രൈസ് ആണോ. സെറീനയുടെ മറുപടി വളരെ ലളിതമായിരുന്നു ”No. I’m just Serena…!” ഞാൻ സെറീനയാണെന്നും എനിക്ക് ഇതെല്ലാം നിസ്സാരമാണെന്നുമാണ് അവർ പറഞ്ഞുവെച്ചത്. അതുപോലെയാണ് മെസിയുടെ കാര്യം. മുപ്പത്തിയൊമ്പതാം വയസ്സിൽ ഒരു ഫുട്ബോളർ ഇങ്ങനെ കളിച്ചാൽ അത് മഹാത്ഭുതമായി കണക്കാക്കപ്പെടേണ്ടതാണ്. പക്ഷേ ഇത് മെസിയാണ് അയാൾക്ക് ഇതെല്ലാം പൂ പറിക്കുന്നത് പോലെ എളുപ്പമാണ്
എഴുത്ത്- സന്ദീപ് ദാസ്
