രാജസ്ഥാൻ റോയൽസ് ബന്ധം അവസാനിപ്പിച്ച് നിലവിൽ ചെന്നൈ സൂപ്പർ കിങ്സിൻ്റെ ഭാഗമായി കളിക്കുന്ന സഞ്ജു സാംസൺ മനസ്സ് തുറക്കുന്നു. ടീമിലെ അന്തരീക്ഷം മാറിയപ്പോൾ ക്യാപ്റ്റൻസി ഉൾപ്പെടെ എല്ലാം ഉപേക്ഷിക്കാൻ താൻ തയ്യാറായിരുന്നുവെന്ന് താരം വ്യക്തമാക്കുന്നു. “കഴിഞ്ഞ നാല് വർഷം ഞാൻ ക്യാപ്റ്റൻസി നന്നായി ആസ്വദിച്ചിരുന്നു. എന്നാൽ എല്ലാം മാറിമറിഞ്ഞു. ടീം പരിസ്ഥിതി മാറുകയും അത് എന്റെ സ്വഭാവവുമായി ഒത്തുപോകാത്ത രീതിയിലേക്ക് നീങ്ങുകയും ചെയ്തു. അവിടെ എനിക്ക് ഇനിയും തുടരാനാവില്ലെന്ന് ഉറപ്പിച്ചു.”
“ആ സമയത്ത് എനിക്ക് ക്യാപ്റ്റൻസി ഒന്നും വേണ്ടായിരുന്നു. അത് ഉപേക്ഷിക്കാനും ഞാൻ തയ്യാറായിരുന്നു. സമാധാനത്തോടെ മുന്നോട്ട് പോകാനാണ് ഞാൻ ആഗ്രഹിച്ചത്.”സഞ്ജു പറഞ്ഞു. രാജസ്ഥാൻ വിട്ടതിന് ശേഷം മറ്റ് 2-3 ടീമുകൾ തന്നെ സമീപിച്ചിരുന്നുവെങ്കിലും ചെന്നൈയെ തിരഞ്ഞെടുക്കാൻ പ്രധാനമായും രണ്ട് കാരണങ്ങളുണ്ടെന്ന് സഞ്ജു വെളിപ്പെടുത്തി. മുൻ നായകൻ എം.എസ്. ധോണിയുമായുള്ള അടുപ്പമാണ് സഞ്ജുവിനെ സിഎസ്കെയിലേക്ക് ആകർഷിച്ചത്. ധോണിയുടെ കീഴിൽ കളിക്കാനും അദ്ദേഹത്തിൽ നിന്ന് കാര്യങ്ങൾ പഠിക്കാനുമുള്ള അവസരം വലിയൊരു പ്രചോദനമായിരുന്നു.
സിഎസ്കെ നായകൻ ഋതുരാജ് ഗെയ്ക്വാദുമായുള്ള സൗഹൃദവും ടീമിലേക്ക് മാറാനുള്ള തീരുമാനത്തെ സ്വാധീനിച്ചു. “ആവശ്യങ്ങളുമായിട്ടല്ല, വിശ്വാസവുമായാണ് ഞാൻ വന്നത്” സിഎസ്കെ ക്യാപ്റ്റൻസി ഏറ്റെടുക്കുമെന്ന അഭ്യൂഹങ്ങൾക്കും സഞ്ജു മറുപടി നൽകി. പുതിയൊരു ടീമിലേക്ക് പോകുമ്പോൾ വലിയ ആവശ്യങ്ങളുമായി ചെല്ലുന്നതിനേക്കാൾ, ടീമിന് വേണ്ടി തന്റെ ഏറ്റവും മികച്ച പ്രകടനം പുറത്തെടുക്കുകയാണ് പ്രധാനമെന്നും സഞ്ജു വ്യക്തമാക്കി.”എന്റെ ജോലി ഞാൻ നന്നായി ചെയ്യുക, എന്നിട്ട് കാര്യങ്ങൾ മുന്നോട്ട് കൊണ്ടുപോകുക എന്നതാണ് എന്റെ ലക്ഷ്യം,” താരം പറഞ്ഞു.
എന്തായാലും ഇന്നലെ തുടങ്ങിയ അയർലാന്റ് പര്യടനത്തിലെ ആദ്യ മത്സരത്തിൽ നിരാശപ്പെടുത്തിയ സഞ്ജു ഒരു തിരിച്ചുവരവിന് ശ്രമിക്കുകയാണ്.
