ആധുനിക വൈദ്യശാസ്ത്രവും ശസ്ത്രക്രിയകളും പാശ്ചാത്യ ലോകത്തിന്റെ മാത്രം സംഭാവനയാണെന്ന് അന്ധമായി വിശ്വസിക്കുന്നവർക്കുള്ള ശക്തമായ മറുപടിയാണ് സ്കോട്ട്ലൻഡിൽ നിന്നും ഇപ്പോൾ പുറത്തുവരുന്ന വാർത്ത. ലോകത്തിലെ ഏറ്റവും പഴക്കമേറിയ സർജിക്കൽ കോളേജായ സ്കോട്ട്ലൻഡിലെ ‘റോയൽ കോളേജ് ഓഫ് സർജൻസ് ഓഫ് എഡിൻബറോ’ പുരാതന ഭാരതത്തിലെ മഹാനായ ഭിഷഗ്വരനും ‘പ്ലാസ്റ്റിക് സർജറിയുടെ പിതാവുമായ’ സുശ്രുതന്റെ വെങ്കല പ്രതിമ അനാച്ഛാദനം ചെയ്ത് ആദരവ് പ്രകടിപ്പിച്ചിരിക്കുന്നു. ഭാരതീയ വൈദ്യശാസ്ത്ര ശാഖയുടെ ആഴവും പരപ്പും ലോകം വീണ്ടും നെഞ്ചേറ്റുന്നതിന്റെ പ്രത്യക്ഷ ഉദാഹരണമാണിത്.
തമിഴ്നാട്ടിലെ കുംഭകോണത്തിനടുത്തുള്ള സ്വാമിമലൈയിലെ പരമ്പരാഗത ശിൽപികളും വെങ്കല നിർമാണ വിദഗ്ദ്ധരും ചേർന്നാണ് 90 കിലോഗ്രാം ഭാരമുള്ള ഈ സുശ്രുത പ്രതിമ പൂർത്തിയാക്കിയത്. ഇതിനുമുമ്പ് മെൽബണിലെ ‘റോയൽ ഓസ്ട്രലേഷ്യൻ കോളേജ് ഓഫ് സർജൻസും’ സമാനമായ രീതിയിൽ സുശ്രുതന്റെ പ്രതിമ സ്ഥാപിച്ച് ഭാരതീയ വൈദ്യശാസ്ത്ര പാരമ്പര്യത്തെ ആദരിച്ചിരുന്നു. സുശ്രുതന്റെ സംഭാവനകളെ പരാമർശിക്കാതെ ലോകത്തിന് ശസ്ത്രക്രിയയുടെ ചരിത്രം എഴുതാൻ കഴിയില്ലെന്ന് ഇരു ആഗോള സ്ഥാപനങ്ങളും അടിവരയിട്ട് സമ്മതിക്കുന്നു.
ക്രിസ്തുവിന് മുൻപ് ആറാം നൂറ്റാണ്ടിൽ ജീവിച്ചിരുന്ന സുശ്രുതൻ ഭാരതീയ ശസ്ത്രക്രിയാ ശാസ്ത്രമായ ‘ശല്യതന്ത്രം’ ലോകത്തിന് സമ്മാനിച്ച യുഗപുരുഷനാണ്. ആധുനിക സൌകര്യങ്ങളോ യന്ത്രങ്ങളോ ഇല്ലാതിരുന്ന രണ്ടായിരത്തിലധികം വർഷങ്ങൾക്ക് മുൻപ്, ഭാരതത്തിൽ ശസ്ത്രക്രിയ കേവലം ഒരു പരിശീലനം മാത്രമായിരുന്നില്ല, മറിച്ച് അത് കൃത്യമായ നിയമങ്ങളോടെയും വ്യവസ്ഥകളോടെയും പ്രൊഫഷണലായി പഠിപ്പിക്കുകയും രേഖപ്പെടുത്തുകയും ചെയ്തിരുന്നു. അദ്ദേഹം രചിച്ച ‘സുശ്രുത സംഹിത’ എന്ന വിഖ്യാത ഗ്രന്ഥമാണ് ഇതിന് തെളിവ്.
‘പൂർവ്വതന്ത്രം’, ‘ഉത്തരതന്ത്രം’ എന്നിങ്ങനെ ഭാഗങ്ങളായി തിരിച്ചിരിക്കുന്ന ഈ ഗ്രന്ഥത്തിൽ ഇന്നത്തെ കാലത്തെ പ്ലാസ്റ്റിക് സർജറി (ഉദാഹരണത്തിന് റൈനോപ്ലാസ്റ്റി അഥവാ മൂക്ക് പുനർനിർമ്മിക്കുന്ന രീതി), മൂത്രാശയക്കല്ല് നീക്കം ചെയ്യൽ, മൃതഭ്രൂണം പുറത്തെടുക്കൽ തുടങ്ങിയ സങ്കീർണ്ണമായ പ്രക്രിയകളെക്കുറിച്ച് വ്യക്തമായി പ്രതിപാദിക്കുന്നുണ്ട്. കൂടാതെ ആയുർവേദത്തിലെ ടോക്സിക്കോളജി, പീഡിയാട്രിക്സ്, ഫാർമക്കോളജി എന്നിവയും ഇതിൽ ഉൾപ്പെടുന്നു.
കേവലം ലളിതമായ ശസ്ത്രക്രിയകൾ മാത്രമല്ല, ഒരു ശസ്ത്രക്രിയാ വിദഗ്ദ്ധൻ എങ്ങനെ ദീർഘകാലം പരിശീലനം നേടണമെന്നും സുശ്രുതൻ നിർദ്ദേശിച്ചിരുന്നു. യഥാർത്ഥ രോഗികളിൽ ശസ്ത്രക്രിയ ചെയ്യുന്നതിന് മുൻപ് പച്ചക്കറികളിൽ കീറലുകൾ ഉണ്ടാക്കിയും, മൃഗങ്ങളുടെ കോശങ്ങളിലും തുകലിലും തുന്നലുകൾ ഇട്ടും വിദ്യാർത്ഥികൾ പരിശീലിക്കണമായിരുന്നു.
അതിശയകരമെന്നു പറയട്ടെ, നൂറിലധികം തരം ശസ്ത്രക്രിയാ ഉപകരണങ്ങളെക്കുറിച്ചാണ് സുശ്രുത സംഹിതയിൽ വിവരിക്കുന്നത്. മൂർച്ചയുള്ളവ (മുറിക്കാൻ ഉപയോഗിക്കുന്ന വൃദ്ധിപത്രം, മണ്ഡലഗ്ര, കരപത്രം തുടങ്ങിയവ), മൂർച്ചയില്ലാത്തവ (മുറിവുകൾ പരിശോധിക്കാനും പിടിച്ചുവെക്കാനും ഉപയോഗിക്കുന്ന ഏഷണി, സന്ദംശം, നാഡീയന്ത്രം തുടങ്ങിയവ) എന്നിങ്ങനെ ഉപകരണങ്ങളെ തരംതിരിച്ചിരുന്നു. ശസ്ത്രക്രിയയ്ക്ക് മുൻപും പിൻപും പാലിക്കേണ്ട ശുചിത്വം, മുറിവുകൾ വൃത്തിയാക്കൽ, രക്തസ്രാവം തടയാൻ കാറ്ററൈസേഷൻ (cauterisation) രീതി ഉപയോഗിക്കൽ എന്നിവയും അദ്ദേഹം പഠിപ്പിച്ചു.
ഒറ്റനോട്ടത്തിൽ സുശ്രുത സംഹിതയുടെ വ്യാപ്തി ഇങ്ങനെയാണ്
രോഗങ്ങൾ: 1,120 തരത്തിലുള്ള രോഗങ്ങൾ
ഔഷധസസ്യങ്ങൾ: 700-ലധികം ഔഷധസസ്യങ്ങൾ
ചികിത്സാ രീതികൾ: 300-ലധികം മെഡിക്കൽ പ്രൊസീജറുകൾ
ഉപകരണങ്ങൾ: 120-ഓളം സർജിക്കൽ ഉപകരണങ്ങൾ
വിഭാഗങ്ങൾ: മുറിക്കൽ, തുളയ്ക്കൽ, തുന്നൽ ഉൾപ്പെടെ ശസ്ത്രക്രിയകളെ എട്ട് പ്രധാന വിഭാഗങ്ങളായി തരംതിരിച്ചിരിക്കുന്നു
പ്രശസ്ത എഴുത്തുകാരനായ ഫ്രാങ്ക് മക്ഡൊവൽ തന്റെ ‘ദി സോഴ്സ് ബുക്ക് ഓഫ് പ്ലാസ്റ്റിക് സർജറി’ എന്ന പുസ്തകത്തിൽ സുശ്രുതനെക്കുറിച്ച് എഴുതിയത് ഇങ്ങനെയാണ്: “പരാജയങ്ങളിൽ തളരാതെയും വിജയങ്ങളിൽ അഹങ്കരിക്കാതെയും അദ്ദേഹം നിരന്തരം സത്യം അന്വേഷിക്കുകയും അത് വരുംതലമുറയ്ക്ക് കൈമാറുകയും ചെയ്തു. ഒരു വഴിയുമില്ലാതിരുന്ന കാലത്ത് അദ്ദേഹം സ്വന്തമായി പുതിയൊരു വഴി വെട്ടിത്തുറന്നു.”
ഇന്ന് ആധുനിക സർജിക്കൽ ഉപകരണങ്ങളുടെയും രീതികളുടെയും പ്രപിതാവ് പുരാതന ഭാരതമാണെന്ന വാദങ്ങൾക്ക് ആഗോളതലത്തിൽ തന്നെ അംഗീകാരം ലഭിച്ചുകൊണ്ടിരിക്കുകയാണ്. സ്കോട്ട്ലൻഡിലെ ഈ ചരിത്രപരമായ ആദരവ് നമ്മുടെ പൂർവ്വികരുടെ വിജ്ഞാനത്തിന്റെ ഉദാത്തമായ സാക്ഷ്യപത്രവും ഓരോ ഭാരതീയനും അഭിമാനിക്കാവുന്ന നിമിഷവുമാണ്!
