അന്താരാഷ്ട്ര ക്രിക്കറ്റിൽ വൻ അട്ടിമറി നീക്കവുമായി മുൻ ഓസ്ട്രേലിയൻ ഓൾറൗണ്ടർ മോയ്സസ് ഹെൻറിക്കസ്. ഓസ്ട്രേലിയൻ ദേശീയ ടീമിൽ നിന്ന് വിരമിച്ച താരം ഇനിമുതൽ പോർച്ചുഗലിനായി പാഡണിയും. 2028-ൽ ഓസ്ട്രേലിയയിലും ന്യൂസിലൻഡിലുമായി നടക്കാനിരിക്കുന്ന ട്വന്റി-20 ലോകകപ്പിലേക്ക് പോർച്ചുഗലിന് യോഗ്യത നേടിക്കൊടുക്കുക എന്ന വലിയ ലക്ഷ്യവുമായാണ് മുപ്പത്തിയൊമ്പതുകാരനായ ഹെൻറിക്കസിന്റെ ഈ അപ്രതീക്ഷിത കൂടുമാറ്റം.
ഓസ്ട്രേലിയക്കായി 4 ടെസ്റ്റുകളും 16 ഏകദിനങ്ങളും 24 ട്വന്റി-20 മത്സരങ്ങളും കളിച്ചിട്ടുള്ള പരിചയസമ്പന്നനായ താരമാണ് മോയ്സസ് ഹെൻറിക്കസ്. ഇന്ത്യയിൽ 2016-ൽ സൺറൈസേഴ്സ് ഹൈദരാബാദ് ഐപിഎൽ കിരീടം ചൂടിയപ്പോൾ ടീമിലെ പ്രധാന സാന്നിധ്യമായിരുന്നു ഇദ്ദേഹം. പോർച്ചുഗലിലെ ഫഞ്ചാലിൽ ജനിച്ച ഹെൻറിക്കസ്, കുഞ്ഞായിരിക്കുമ്പോഴാണ് കുടുംബത്തോടൊപ്പം ഓസ്ട്രേലിയയിലേക്ക് കുടിയേറിയത്. തന്റെ ജന്മനാടിനെ ലോക ക്രിക്കറ്റിന്റെ നെറുകയിൽ എത്തിക്കുകയാണ് ഈ തീരുമാനത്തിന് പിന്നിലെന്ന് ഹെൻറിക്കസ് വ്യക്തമാക്കി.
“ഇത് എന്റെ പോർച്ചുഗീസ് പാരമ്പര്യം ഉയർത്തിപ്പിടിക്കാൻ മാത്രമല്ല, മറിച്ച് ലോകമെമ്പാടും ക്രിക്കറ്റ് എന്ന കളിയുടെ വളർച്ചയ്ക്ക് കൂടെ വേണ്ടിയുള്ള തീരുമാനമാണ്. ലോകത്തെ മറ്റൊരു 10 അല്ലെങ്കിൽ 20 രാജ്യങ്ങളിൽ കൂടി ക്രിക്കറ്റിന്റെ നിലവാരം ഉയർത്താൻ നമുക്ക് സാധിച്ചാൽ, വരും കാലങ്ങളിൽ ലോകകപ്പുകൾ ഏതാനും പാശ്ചാത്യ രാജ്യങ്ങളിലും ഇന്ത്യൻ ഉപഭൂഖണ്ഡത്തിലും മാത്രം ഒതുങ്ങില്ല; ലോകം മുഴുവൻ സ്തംഭിച്ചു നിൽക്കുന്ന വൻ പോരാട്ടങ്ങളായി ക്രിക്കറ്റ് മാറും.”
ട്വന്റി-20 ലോകകപ്പ് യോഗ്യതയുടെ അടുത്ത റൗണ്ടിലേക്ക് കടക്കാൻ പോർച്ചുഗലിന് ഇനി ചെക്ക് റിപ്പബ്ലിക്, ഇസ്രായേൽ, ഗ്രീസ് എന്നീ ടീമുകളെയാണ് നേരിടേണ്ടത്. യൂറോപ്പിൽ നിന്നും ഇംഗ്ലണ്ടും അയർലൻഡും ഇതിനകം ലോകകപ്പിലേക്ക് നേരിട്ട് യോഗ്യത നേടിയിട്ടുണ്ട്. ബാക്കിയുള്ള രണ്ട് സ്ഥാനങ്ങൾക്കായിട്ടാണ് ഹെൻറിക്കസിന്റെ നേതൃത്വത്തിൽ പോർച്ചുഗൽ പോരാട്ടത്തിനിറങ്ങുന്നത്.
അന്താരാഷ്ട്ര ക്രിക്കറ്റ് കൗൺസിലിന്റെ നിലവിലെ നിയമപ്രകാരം, ഒരു താരം തന്റെ അവസാന രാജ്യാന്തര മത്സരം കളിച്ച് 3 വർഷത്തെ ഇടവേള പൂർത്തിയാക്കിയാൽ മറ്റൊരു അസോസിയേറ്റ് രാജ്യത്തിന് വേണ്ടി കളിക്കാൻ യോഗ്യത നേടും. ഹെൻറിക്കസ് അവസാനമായി ഓസ്ട്രേലിയൻ ജേഴ്സി അണിഞ്ഞത് 2021-ൽ ബംഗ്ലാദേശിനെതിരായ ടി20 മത്സരത്തിലാണ്. ഓസീസിനായി എല്ലാ ഫോർമാറ്റുകളിൽ നിന്നുമായി 648 റൺസും 17 വിക്കറ്റുകളും താരം നേടിയിട്ടുണ്ട്.
കഴിഞ്ഞവർഷം മുൻ ഓസ്ട്രേലിയൻ ബാറ്റർ ജോ ബേൺസ് ഇറ്റലിക്ക് വേണ്ടി കളിക്കാൻ തീരുമാനിച്ചതിന് പിന്നാലെയാണ് ഇപ്പോൾ ഹെൻറിക്കസും യൂറോപ്യൻ ലീഗിലേക്ക് ചുവടുമാറ്റുന്നത്.
