ഫുട്ബോൾ ലോകത്തെ വീണ്ടും ചർച്ചകളിലേക്ക് നയിച്ചുകൊണ്ട് 2026 ലെ ഫിഫ ലോകകപ്പിൽ ലയണൽ മെസ്സിയുടെ അർജന്റീനയ്ക്ക് അനുകൂലമായി ഫിഫയും റഫറിമാരും ഒത്തുകളിക്കുന്നു എന്ന ആരോപണം പുതിയ തലത്തിലേക്ക്. പോർച്ചുഗീസ് ഇതിഹാസ താരം ക്രിസ്റ്റ്യാനോ റൊണാൾഡോ അർജന്റീനയെ ഫിഫ സഹായിക്കുന്നു എന്ന് ആരോപിക്കുന്ന ഇൻസ്റ്റാഗ്രാം പോസ്റ്റ് ലൈക്ക് ചെയ്തതായുള്ള വാർത്തകൾ പുറത്തുവന്നതോടെയാണ് ഈ തർക്കം കടുത്തിരിക്കുന്നത്. ലോകകപ്പിൽ റൗണ്ട് ഓഫ് 16-ൽ സ്‌പെയിനോട് തോറ്റ് പോർച്ചുഗൽ പുറത്തായതിന് പിന്നാലെയാണ്, അർജന്റീനയ്ക്ക് അനുകൂലമായി വാറും റഫറിമാരും എടുത്ത തീരുമാനങ്ങളെ വിമർശിക്കുന്ന ‘എസ്പെജോ പബ്ലിക്കോ’ എന്ന ഇൻസ്റ്റാഗ്രാം പേജിലെ വീഡിയോ ക്രിസ്റ്റ്യാനോ ലൈക്ക് ചെയ്തതായി ആരാധകർ കണ്ടെത്തിയത്.
സ്പാനിഷ് മാധ്യമപ്രവർത്തക പിലാർ റോഡ്രിഗസ് ലോസാന്റോസ് പങ്കുവെച്ച ഈ വീഡിയോയിൽ, അർജന്റീന അഞ്ച് മത്സരങ്ങൾക്ക് മുൻപ് തന്നെ ടൂർണമെന്റിൽ നിന്ന് പുറത്താകേണ്ടതായിരുന്നുവെന്നും ഫിഫ പ്രസിഡന്റ് ജിയാനി ഇൻഫാന്റിനോയ്ക്ക് മെസ്സിയെ ലോകകപ്പ് ജേതാവാക്കാനാണ് താല്പര്യമെന്നും പരസ്യമായി ആരോപിക്കുന്നുണ്ട്. ഈ പോസ്റ്റിന് താഴെ റൊണാൾഡോയുടെ ഔദ്യോഗിക അക്കൗണ്ടിൽ നിന്നുള്ള ലൈക്ക് കണ്ടതായി സോഷ്യൽ മീഡിയയിൽ സ്ക്രീൻഷോട്ടുകൾ പ്രചരിച്ചതോടെ വലിയ രീതിയിലുള്ള വിവാദങ്ങൾക്കാണ് വഴിതുറന്നത്. എന്നാൽ പ്രമുഖ മാധ്യമമായ എൻ.ഡി.ടി.വി നടത്തിയ ഫാക്ട് ചെക്കിൽ റൊണാൾഡോയുടെ അക്കൗണ്ടിൽ നിന്നുള്ള ലൈക്ക് ഈ പോസ്റ്റിൽ കണ്ടെത്താനായിട്ടില്ല. റൊണാൾഡോ ലൈക്ക് ചെയ്ത ശേഷം പിന്നീട് അത് പിൻവലിച്ചതാകാം അല്ലെങ്കിൽ പ്രചരിക്കുന്ന സ്ക്രീൻഷോട്ടുകൾ വ്യാജമാകാം എന്നാണ് ഇതിലൂടെ വ്യക്തമാകുന്നത്.
ഇത്തവണ 48 ടീമുകൾ പങ്കെടുത്ത ലോകകപ്പ് കാമ്പെയ്നിൽ ഉടനീളം അർജന്റീനയ്‌ക്കെതിരെ ഒരൊറ്റ വാർ (VAR) തീരുമാനം പോലും പോയിട്ടില്ല എന്നത് ഈ ഒത്തുകളി ആരോപണങ്ങൾക്ക് ആരാധകർക്കിടയിൽ കൂടുതൽ ശക്തി പകരുന്നു. ഈജിപ്തിനെതിരായ റൗണ്ട് ഓഫ് 16 മത്സരത്തിൽ മുഹമ്മദ് സലായുടെ ടീം രണ്ടാം പകുതിയിൽ നേടിയ ഒരു ഗോൾ, അതിന് പത്ത് സെക്കൻഡുകൾക്ക് മുൻപ് നടന്ന ഒരു ഫൗളിന്റെ പേരിൽ വാർ റദ്ദാക്കിയിരുന്നു. മത്സരത്തിന്റെ അവസാന നിമിഷങ്ങളിൽ ഈജിപ്തിന് അനുകൂലമായ ഒരു വ്യക്തമായ പെനാൽറ്റി അർഹത നിഷേധിച്ചതും വലിയ പ്രതിഷേധങ്ങൾക്ക് കാരണമായി. കൂടാതെ സ്‌പെയിനെതിരായ ക്വാർട്ടർ ഫൈനൽ മത്സരത്തിൽ സ്പാനിഷ് താരം ബ്രീൽ എംബോളോയ്ക്ക് ചുവപ്പ് കാർഡ് നൽകി പുറത്താക്കിയതും അർജന്റീനയുടെ വിജയത്തിൽ വലിയ ഘടകമായിരുന്നു.
ഈ തീരുമാനങ്ങളെല്ലാം മെസ്സിക്ക് ലോകകപ്പ് സമ്മാനിക്കാൻ ഫിഫ ബോധപൂർവ്വം ചെയ്യുന്നതാണെന്നാണ് വിമർശകരുടെ പ്രധാന വാദം. എന്നാൽ ഫിഫ ഈ ആരോപണങ്ങളെല്ലാം പൂർണ്ണമായും തള്ളിക്കളഞ്ഞിട്ടുണ്ട്. കളിക്കളത്തിലെ തീരുമാനങ്ങളെ ആർക്കും സ്വാധീനിക്കാൻ കഴിയില്ലെന്ന് വ്യക്തമാക്കിയ ഫിഫ റഫറിയിംഗ് കമ്മിറ്റി തലവൻ പിയർലൂയിജി കൊളീന, മത്സരത്തിൽ തീരുമാനങ്ങളെക്കുറിച്ചുള്ള ചർച്ചകൾ സ്വാഭാവികമാണെന്നും എന്നാൽ തെളിവുകളില്ലാത്ത ഇത്തരം തരംതാണ ആരോപണങ്ങൾക്ക് ഫുട്ബോളിൽ സ്ഥാനമില്ലെന്നും തുറന്നടിച്ചു. ഫിഫ പ്രസിഡന്റിന് പോലും റഫറിമാരുടെ തീരുമാനങ്ങളെ സ്വാധീനിക്കാൻ കഴിയില്ലെന്നും ലോകകപ്പ് നിയന്ത്രിക്കുന്ന ഉദ്യോഗസ്ഥരുടെ വിശ്വാസ്യതയെ ചോദ്യം ചെയ്യാൻ ആർക്കും അവകാശമില്ലെന്നും അദ്ദേഹം കടുത്ത ഭാഷയിൽ പ്രതികരിച്ചു.
