ന്യൂഡൽഹി : ഇൻസ്റ്റാഗ്രാമിൽ ചരിത്രം കുറിച്ച് പ്രധാനമന്ത്രി നരേന്ദ്ര മോദി. പരീക്ഷാ ചോദ്യപേപ്പർ ചോർച്ചയ്ക്കെതിരായ വീഡിയോയ്ക്ക് 24 മണിക്കൂറിനുള്ളിൽ 30.3 കോടി കാഴ്ചക്കാർ എന്ന ലോക റെക്കോർഡ് നേട്ടമാണ് മോദി സ്വന്തമാക്കിയിരിക്കുന്നത്. വ്യാഴാഴ്ച അർദ്ധരാത്രി പോസ്റ്റ് ചെയ്ത വീഡിയോ കേവലം 24 മണിക്കൂറിനുള്ളിൽ 30.3 കോടിയിലധികം (303 മില്യൺ) ആളുകളാണ് കണ്ടത്. ഫിഫ ലോകകപ്പിനിടെ പ്രശസ്ത യൂട്യൂബർ ഐഷോസ്പീഡും (IShowSpeed) ബിടിഎസ് (BTS) അംഗങ്ങളും ഒന്നിച്ച് പങ്കുവെച്ച റീൽസ് കൈവരിച്ച 30 കോടി (300 മില്യൺ) കാഴ്ചക്കാരുടെ ആഗോള റെക്കോർഡാണ് പ്രധാനമന്ത്രി ഇതിലൂടെ മറികടന്നത്. വീഡിയോ തരംഗമായതോടെ 1.6 കോടിയിലധികം ലൈക്കുകളും 15 ലക്ഷത്തോളം കമന്റുകളും ലഭിച്ചതിനൊപ്പം ഒറ്റരാത്രികൊണ്ട് പത്ത് ലക്ഷത്തോളം പുതിയ ഫോളോവേഴ്സിനെയും പ്രധാനമന്ത്രിക്ക് ലഭിച്ചു.
ചോദ്യപേപ്പർ തട്ടിപ്പുകാർക്കെതിരെ തടവുശിക്ഷ കടുപ്പിക്കുന്നതിനൊപ്പം 10 കോടി രൂപ വരെ പിഴയും വിചാരണയ്ക്ക് അതിവേഗ കോടതികളും വ്യവസ്ഥ ചെയ്യുന്ന പുതിയ നിയമനിർമ്മാണം അടുത്ത ആഴ്ച പാർലമെന്റിൽ അവതരിപ്പിക്കുമെന്ന് വ്യക്തമാക്കിയായിരുന്നു പ്രധാനമന്ത്രിയുടെ വീഡിയോ സന്ദേശം. രാജ്യത്തെ ലക്ഷക്കണക്കിന് വിദ്യാർത്ഥികളുടെയും മാതാപിതാക്കളുടെയും ഭാവി തകർക്കുന്ന തട്ടിപ്പുകാർക്കെതിരെ കടുത്ത നടപടി ഉണ്ടാകുമെന്ന ഉറപ്പ് യുവജനങ്ങളും ഉദ്യോഗാർത്ഥികളും വൻതോതിൽ ഏറ്റെടുത്തതോടെയാണ് ഇൻസ്റ്റാഗ്രാം ചരിത്രത്തിലെ തന്നെ ഏറ്റവും ഉയർന്ന കാഴ്ചക്കാരുള്ള റീലായി ഇത് മാറിയത്. ഡൽഹി ജന്തർ മന്തറിൽ കോക്രോച്ച് ജനതാ പാർട്ടിയുടെയും (സിജെപി) വിദ്യാർത്ഥി സംഘടനകളുടെയും പ്രക്ഷോഭം തുടരുന്ന പശ്ചാത്തലത്തിലാണ് ഇൻസ്റ്റാഗ്രാമിലൂടെയുള്ള പ്രധാനമന്ത്രിയുടെ നേരിട്ടുള്ള ഈ ആശയവിനിമയം.
വീഡിയോയ്ക്ക് ലഭിച്ച വൻ പിന്തുണയ്ക്ക് നന്ദി അറിയിച്ചുകൊണ്ട് വെള്ളിയാഴ്ച രാത്രി പ്രധാനമന്ത്രി രണ്ടാമതൊരു ഇൻസ്റ്റാഗ്രാം വീഡിയോ കൂടി പങ്കുവെച്ചു. തന്റെ മുൻപത്തെ വീഡിയോ കണ്ട് നിർണ്ണായകമായ നിർദ്ദേശങ്ങളും പ്രതികരണങ്ങളും പങ്കുവെച്ച ലക്ഷക്കണക്കിന് യുവാക്കളോടും വിദ്യാർത്ഥികളോടും അദ്ദേഹം നന്ദി രേഖപ്പെടുത്തി. ഇത്തരം പ്രതികരണങ്ങളും ബന്ധങ്ങളും ജനങ്ങളുമായുള്ള ആശയവിനിമയം കൂടുതൽ ശക്തമാക്കാൻ സഹായിക്കുമെന്നും തട്ടിപ്പുകാർക്കെതിരെ വെള്ളിയാഴ്ച ചേർന്ന കേന്ദ്ര മന്ത്രിസഭാ യോഗം അതിശക്തമായ ബില്ലിന് അംഗീകാരം നൽകിയതായും പ്രധാനമന്ത്രി പുതിയ സന്ദേശത്തിലൂടെ അറിയിച്ചു.
