“ജീവിതത്തിൽ മദ്യപിച്ചിട്ടില്ല” എന്ന് മുൻപ് അവകാശപ്പെട്ട റിപ്പോർട്ടർ ടിവി എം.ഡി ആന്റോ അഗസ്റ്റിന്റെ വീട്ടിൽ നിന്ന് എക്സൈസ് പിടിച്ചെടുത്തത് 138 കുപ്പികളിലായി 67 ലിറ്ററോളം വിദേശ മദ്യം! വയനാട്ടിലെ വാഴവറ്റയിലെ വീട്ടിൽ നടത്തിയ റെയ്ഡിൽ അളവിൽ കവിഞ്ഞ മദ്യം സൂക്ഷിച്ചതിന് ആന്റോ അഗസ്റ്റിനെതിരെ അബ്കാരി ആക്ടിലെ ജാമ്യമില്ലാ വകുപ്പുകൾ ചുമത്തി കേസെടുത്തു. നിലവിൽ കൊച്ചിയിലെ ചാനൽ ഓഫീസിലെത്തി എക്സൈസ് സംഘം ആന്റോയെ അറസ്റ്റ് ചെയ്യുകയും വൈദ്യപരിശോധന പൂർത്തിയാക്കുകയും ചെയ്തിട്ടുണ്ട്.
ഫുട്ബോൾ താരം ലയണൽ മെസ്സിയെ കേരളത്തിൽ എത്തിക്കാമെന്ന് വാഗ്ദാനം ചെയ്ത് സാമ്പത്തിക തട്ടിപ്പ് നടത്തിയെന്ന കേസിൽ പ്രത്യേക അന്വേഷണ സംഘം (SIT) നടത്തിയ മാരത്തൺ പരിശോധനയിലാണ് അനാധികൃത മദ്യശേഖരം കണ്ടെത്തിയത്. 43 ലിറ്റർ വിദേശമദ്യവും, വിദേശ നിർമ്മിത വൈനും, വീട്ടിലുണ്ടാക്കിയ നാടൻ വൈനും ഉൾപ്പെടെയാണ് എക്സൈസ് കൈപ്പറ്റിയത്. സംഭവത്തിൽ അബ്കാരി നിയമത്തിലെ 55A, 55I, 58 തുടങ്ങിയ കടുത്ത വകുപ്പുകൾ പ്രകാരമാണ് എഫ്.ഐ.ആർ രജിസ്റ്റർ ചെയ്തിരിക്കുന്നത്.
അതേസമയം, റിപ്പോർട്ടർ ടിവിയുടെ കൊച്ചി ഓഫീസിൽ 20 മണിക്കൂറോളം നീണ്ട വിപുലമായ റെയ്ഡിൽ എസ്.ഐ.ടി നിർണ്ണായക രേഖകൾ കസ്റ്റഡിയിലെടുത്തു. ഓഫീസിൽ നിന്ന് കണക്കിൽപ്പെടാത്ത 6,300 യു.എസ് ഡോളർ പിടിച്ചെടുത്തതോടെ വിഷയം കൂടുതൽ ഗുരുതരമായി മാറിയിരിക്കുകയാണ്. വിദേശനാണ്യ വിനിമയച്ചട്ടം (FEMA) ലംഘിക്കപ്പെട്ടിട്ടുണ്ടോ എന്ന് പരിശോധിക്കാനായി എൽ.ഐ.ടി ഈ വിവരം കേന്ദ്ര അന്വേഷണ ഏജൻസികൾക്ക് കൈമാറുമെന്നും റിപ്പോർട്ടുകൾ വ്യക്തമാക്കുന്നു. മെമ്മറി കാർഡുകൾ, ഹാർഡ് ഡിസ്കുകൾ, സ്റ്റേഡിയം കരാറുകളുമായി ബന്ധപ്പെട്ട ഫയലുകൾ എന്നിവയും പോലീസ് പിടിച്ചെടുത്തിട്ടുണ്ട്.
