ന്യൂസിലൻഡിനെതിരെ നാല് വിക്കറ്റിന്റെ തകർപ്പൻ ജയവുമായി ഇന്ത്യ. 180 റൺസ് വിജയലക്ഷ്യം പിന്തുടർന്ന ഇന്ത്യ 19.5 ഓവറിൽ ആറ് വിക്കറ്റ് നഷ്ടത്തിൽ 181 റൺസെടുത്താണ് വിജയം സ്വന്തമാക്കിയത്. തിലക് വർമ്മയുടെയും നമൻ ധിറിന്റെയും തകർപ്പൻ ബാറ്റിങ്ങും പ്രിൻസ് യാദവിന്റെ നിർണായക ബൗളിങ്ങുമാണ് ഇന്ത്യൻ വിജയത്തിൽ ശ്രദ്ധേയമായത്.
വെറും 26 പന്തിൽ 51 റൺസുമായി പുറത്താകാതെ നിന്ന തിലക് വർമ്മ ഇന്ത്യയുടെ വിജയശിൽപിയായി. ആറ് ഫോറും ഒരു സിക്സും ഉൾപ്പെട്ടതായിരുന്നു താരത്തിന്റെ ഇന്നിങ്സ്. 17 പന്തിൽ 31 റൺസെടുത്ത നമൻ ധിറും വെടിക്കെട്ട് ബാറ്റിങ്ങിലൂടെ ന്യൂസിലൻഡ് ബൗളർമാർക്ക് വെല്ലുവിളിയായി. നിതീഷ് കുമാർ റെഡ്ഡി 13 പന്തിൽ 26 റൺസുമായി പുറത്താകാതെ നിന്നതും ഇന്ത്യയുടെ വിജയത്തിന് കരുത്തായി. കളിയുടെ ഒരു ഘട്ടത്തിൽ തോൽവി ഉറപ്പിച്ച ഇന്ത്യ മിന്നുന്ന തിരിച്ചുവരവ് നടത്തുകയായിരുന്നു.
ആദ്യം ബാറ്റ് ചെയ്ത ന്യൂസിലൻഡ് 20 ഓവറിൽ അഞ്ച് വിക്കറ്റ് നഷ്ടത്തിൽ 180 റൺസെടുത്തു. ഗ്ലെൻ ഫിലിപ്സ് 43 പന്തിൽ 70 റൺസും ബെവൺ ജേക്കബ്സ് 46 പന്തിൽ 58 റൺസും നേടി. ഇന്ത്യൻ നിരയിൽ പ്രിൻസ് യാദവ് ഫിൻ അലനെ പുറത്താക്കി നിർണായക വിക്കറ്റ് സ്വന്തമാക്കി. കൂടാതെ കിവി ബാറ്റ്‌സ്മാന്മാർക്ക് ഒരു പഴുതും കൊടുക്കാതെ പന്തെറിയുകയും ചെയ്തു. അർഷ്ദീപ് സിംഗ് രണ്ട് വിക്കറ്റ് നേടി.ജയത്തോടെ പരമ്പരയിൽ ഇന്ത്യ 2 – 0 ന് മുന്നിലെത്തി.
