ബീജിംഗ്: ജി 20 രാഷ്ട്രത്തലവന്മാരുടെ സമ്മേളനം ഇന്നാരംഭിക്കും. ചൈനയിലെ ഹങ്ഷൂവിലാണ് ജി 20 രാഷ്ട്രത്തലവന്മാരുടെ സമ്മേളനം നടക്കുക. സമ്മേളനത്തില്‍ പങ്കെടുക്കാന്‍ പ്രധാനമന്ത്രി നരേന്ദ്ര മോദി ചൈനയിലെത്തി. പരിസ്ഥിതി അനുകൂലവികസനവും കാലാവസ്ഥാവ്യതിയാനം നേരിടുന്നതിനുള്ള കര്‍മ്മ പരിപാടികള്‍ക്കുമാണ് സമ്മേളനത്തില്‍ ഊന്നല്‍ നല്‍കുക.
പതിനൊന്നാമത് ജി 20 സമ്മേളനത്തില്‍ പങ്കെടുക്കാന്‍ പ്രധാനമന്ത്രി നരേന്ദ്ര മോദി ഹങ്ഷൂവിലെത്തി. സാമ്പത്തിക നവീകരണത്തിലൂന്നിയ വികസന പദ്ധതികള്‍ക്ക് ഇന്ത്യ ജി 20 രാജ്യങ്ങളുടെ സമ്മേളനത്തില്‍ പ്രത്യേക പരിഗണന നല്‍കും. സാമ്പത്തിക നവീകരണത്തിന് ഊന്നല്‍ നല്‍കുന്ന പശ്ചാത്തലത്തില്‍ സമ്മേളനത്തില്‍ നിതി ആയോഗ് വൈസ് ചെയര്‍മാന്‍ അരവിന്ദ് പനഗേറിയയും പങ്കെടുക്കുന്നുണ്ട്.
മാറ്റങ്ങള്‍ക്ക് ഊന്നല്‍ നല്‍കുന്നതും അംഗരാജ്യങ്ങള്‍ക്കിടയിലെ ഗതാഗതമടക്കമുള്ള ഭൗതിക സൌകര്യങ്ങള്‍ വര്‍ദ്ധിപ്പിക്കുന്നതും ലക്ഷ്യം വച്ചുള്ള ചര്‍ച്ചകളാണ് ജി 20 രാഷ്ട്രത്തലവന്മാരുടെ സമ്മേളനത്തില്‍ നടക്കുക. കാലാവസ്ഥാ വ്യതിയാനം സംബന്ധിച്ചും സുസ്ഥിര വികസനം സംബന്ധിച്ചുമുള്ള ചര്‍ച്ചകളും സമ്മേളനത്തിന്റെ അജണ്ടയില്‍ ഉള്‍പ്പെടുന്നു. മില്ലേനിയം വികസന ലക്ഷ്യങ്ങള്‍ നടപ്പാക്കുന്നതും, 2030 വികസന നയരേഖയും സമ്മേളനത്തില്‍ ചര്‍ച്ച ചെയ്യും. ബ്രിക്‌സ് രാഷ്ട്രത്തലവന്മാരുടെ അനുപചാരിക കൂടിക്കാഴ്ചയും സമ്മേളനത്തോടനുബന്ധിച്ച് നടക്കും.
Discussion about this post