അഹമ്മദാബാദ്: പാക്ക് അധിനിവേശ കശ്മീരില്‍ ഇന്ത്യന്‍ സൈന്യം നടത്തിയ മിന്നലാക്രമണത്തിന് തന്നെയും പ്രധാനമന്ത്രി നരേന്ദ്ര മോദിയെയും പ്രചോദിപ്പിച്ചത് ആര്‍എസ്എസ് തത്വശാസ്ത്രമെന്ന് പ്രതിരോധ മന്ത്രി മനോഹര്‍ പരീക്കര്‍. നിര്‍മ യൂണിവേഴ്‌സിറ്റിയില്‍ നടന്ന പരിപാടിയില്‍ സംസാരിക്കുകയായിരുന്നു അദ്ദേഹം.
”മഹാത്മാഗാന്ധിയുടെ നാട്ടില്‍ നിന്നുള്ള ഒരു പ്രധാനമന്ത്രിക്കോ ഗോവയില്‍ നിന്നുള്ള ഒരു പ്രതിരോധ മന്ത്രിക്കോ ഇത്രയും ശക്തമായ ഒരു തീരുമാനമെടുക്കാന്‍ കഴിയില്ല. അതിലേക്ക് ഞങ്ങളെ നയിച്ചത് ആര്‍എസ്എസ് തത്വശാസ്ത്രമാണ്” പരീക്കര്‍ പറഞ്ഞു. ഉറി ഭീകരാക്രമണത്തിനു പിന്നാലെ താനും പ്രധാനമന്ത്രിയും വലിയ വിമര്‍ശനങ്ങള്‍ക്ക് വിധേയരായി. പിന്നീട്, ഇന്ത്യ മിന്നലാക്രമണം നടത്തുന്നത് വരെ ഇത് തുടര്‍ന്നു. മിന്നലാക്രമണത്തിന് തെളിവ് വേണമെന്നാണ് ഇപ്പോള്‍ ചിലര്‍ ആവശ്യപ്പെടുന്നത്. യഥാര്‍ഥ തെളിവ് നല്‍കിയാലും ഇത്തരക്കാര്‍ വിശ്വസിക്കില്ല. ഒരു കാര്യം ഉറപ്പാണ്, ആര്‍ക്കും ഇന്ത്യന്‍ സൈന്യത്തിന്റെ ധൈര്യത്തെ സംശയിക്കാന്‍ സാധിക്കില്ലെന്നും പരീക്കര്‍ പറഞ്ഞു.
സെപ്റ്റംബര്‍ 29ന് ആണ് പാക്ക് അധിനിവേശ കശ്മീരിലെ ഭീകരരുടെ ലോഞ്ച് പാഡുകളില്‍ ഇന്ത്യന്‍ സൈന്യം മിന്നലാക്രമണം നടത്തിയത്. നാല്‍പ്പതോളം ഭീകരര്‍ കൊല്ലപ്പെട്ടുവെന്നാണ് റിപ്പോര്‍ട്ടുകള്‍.
ദേശീയ സുരക്ഷയ്ക്കുമേല്‍ കടന്നാക്രമണമുണ്ടായാല്‍ രാജ്യം പെട്ടെന്നു പ്രതികരിക്കുമെന്നും രാജ്യം മുഴുവന്‍ പിന്തുണയുമായി സൈന്യത്തിന് പിന്നിലുണ്ടാകുമെന്നുമുള്ള രണ്ടു കാര്യങ്ങള്‍ മിന്നലാക്രമണത്തിലൂടെ ഇന്ത്യ തെളിയിച്ചു. ഇന്ത്യന്‍ സുരക്ഷാ സേനയ്ക്കു നേരെയുള്ള പാക്ക് ആക്രമണം വര്‍ഷങ്ങളായി തുടരുന്നതാണ്. എന്നാല്‍ ശത്രുവിന് ഇന്ത്യ തക്കതായ മറുപടി നല്‍കുന്നത് ഇതാദ്യമാണെന്നും അദ്ദേഹം വ്യക്തമാക്കി.
Discussion about this post