ഡല്ഹി: 500, 1000 നോട്ടുകള് പിന്വലിച്ചതിനെ തുടര്ന്ന് ജനങ്ങള് നേരിടുന്ന പ്രയാസങ്ങള് കുറയ്ക്കാനുളള നടപടികള് സ്വീകരിച്ചിട്ടുണ്ടെന്ന് ആര്ബിഐ ഗവര്ണര് ഉര്ജിത് പട്ടേല്. ഓരോ ദിവസത്തെയും സാഹചര്യം റിസര്വ്വ് ബാങ്ക് നിരീക്ഷിക്കുന്നുണ്ടെന്ന് അദ്ദേഹം പറഞ്ഞു. വാര്ത്താ ഏജന്സിയായ പിടിഐയ്ക്ക് അനുവദിച്ച അഭിമുഖത്തിലാണ് ഉര്ജിത് പട്ടേല് ഇക്കാര്യം വ്യക്തമാക്കിയത്. ഇതാദ്യമായിട്ടാണ് വിഷയത്തില് ഉര്ജിത് പട്ടേല് പ്രതികരിക്കുന്നത്.
നിത്യേന ബാങ്കുകളില് നിന്നും റിസര്വ്വ് ബാങ്ക് റിപ്പോര്ട്ട് ശേഖരിക്കുന്നുണ്ട്. ആദ്യദിനങ്ങളെ അപേക്ഷിച്ച് സ്ഥിതിയില് അയവു വന്നതായാണ് ബാങ്കുകള് വ്യക്തമാക്കുന്നത്. ബാങ്കുകളിലെയും എടിഎമ്മുകളിലെയും ക്യൂ കുറഞ്ഞു. വിപണികള് സാധാരണ നിലയിലേക്ക് മടങ്ങി. ബാങ്കുകളിലെ പണലഭ്യത കൂടിയതായും അദ്ദേഹം ചൂണ്ടിക്കാട്ടി.
500, 2000 നോട്ടുകളില് വ്യാജനെ എളുപ്പം തിരിച്ചറിയാനുളള സുരക്ഷാസംവിധാനങ്ങള് ഏര്പ്പെടുത്തിയിട്ടുണ്ടെന്ന് അദ്ദേഹം പറഞ്ഞു. പുതിയ നോട്ടുകളുടെ വ്യാജന് പുറത്തിറക്കാന് പ്രയാസമാണ്. ഉന്നത നിലവാരത്തിലുളള സുരക്ഷാ സംവിധാനങ്ങളാണ് അതില് ഒരുക്കിയിരിക്കുന്നതെന്നും അദ്ദേഹം കൂട്ടിച്ചേര്ത്തു. നികുതി വെട്ടിക്കാന് വേണ്ടിയാണ് ഉയര്ന്ന മൂല്യമുളള കറന്സികള് ജനങ്ങള് പൂഴ്ത്തിവെയ്ക്കുന്നത്. റിയല് എസ്റ്റേറ്റ് മേഖലയിലും നികുതിവെട്ടിപ്പ് വ്യാപകമായിരുന്നതായി ഉര്ജിത് പട്ടേല് ചൂണ്ടിക്കാട്ടി. കറന്സി നോട്ടുകള് പിന്വലിക്കുന്നതിന് മുന്നോടിയായി നികുതി അടച്ചുതീര്ക്കാനുളള സമയം സര്ക്കാര് അനുവദിച്ചിരുന്നു. ഇതടക്കം നിരവധി നടപടികള് സര്ക്കാര് സ്വീകരിച്ചിരുന്നതായി അദ്ദേഹം ചൂണ്ടിക്കാട്ടി.
കറന്സി രഹിത സാമ്പത്തിക ഇടപാടുകള്ക്ക് ജനങ്ങള് തയ്യാറാകണമെന്നും സാമ്പത്തിക വിനിമയം വളരെ എളുപ്പത്തിലാക്കാന് ഇതിലൂടെ സാധിക്കുമെന്നും ഉര്ജിത് പട്ടേല് കൂട്ടിച്ചേര്ത്തു.
Discussion about this post