ന്യൂഡൽഹി: ക്രിക്കറ്റ് താരങ്ങളായ എംഎസ് ധോണിയുടെയും വിരാട് കൊഹ്ലിയുടെയും പെൺമക്കൾക്കെതിരെ നടന്ന സൈബർ ആക്രമണത്തിൽ എഫ്ഐആർ രജിസ്റ്റർ ചെയ്ത് ഡൽഹി പോലീസ്. സംഭവത്തിൽ കേസെടുക്കണമെന്ന് ഡൽഹി വനിതാ കമ്മീഷൻ അദ്ധ്യക്ഷ സ്വാതി മാലിവാൾ പോലീസിന് നോട്ടീസ് നൽകിയിരുന്നു. ഇതനുസരിച്ചാണ് നടപടി.
എഫ്ഐആർ രജിസ്റ്റർ ചെയ്ത കാര്യം സ്വാതി മാലിവാൾ തന്നെയാണ് ട്വിറ്ററിലൂടെ അറിയിച്ചത്. ഡൽഹി പോലീസിന്റെ ഇന്റലിജൻസ് ഫ്യൂഷൻ ആൻഡ് സ്ട്രാറ്റജിക് ഓപ്പറേഷൻസ് യൂണിറ്റ് ആണ് എഫ്ഐആർ രജിസ്റ്റർ ചെയ്തത്. എഫ്ഐആറിൽ ആരുടെയും പേരെടുത്ത് പറഞ്ഞിട്ടില്ല. ഇതുവരെ തിരിച്ചറിയാത്ത വ്യക്തികളെന്നാണ് പരാമർശിച്ചിരിക്കുന്നത്.
കഴിഞ്ഞ ആഴ്ചയാണ് സ്വാതി മാലിവാൾ വിഷയം ട്വിറ്ററിൽ ഉന്നയിച്ചത്. രണ്ടും ഏഴും വയസുളള പെൺകുട്ടികളെയാണ് മോശമായി ചിത്രീകരിച്ചതെന്നും ഒരു കളിക്കാരനെ ഇഷ്ടമല്ലെങ്കിൽ അയാളെയാണ് വിമർശിക്കേണ്ടതെന്നും അല്ലാതെ അയാളുടെ മകളെയല്ലെന്നും ട്വീറ്റിലൂടെ അവർ ചൂണ്ടിക്കാട്ടിയിരുന്നു.
വിഷയത്തിൽ എഫ്ഐആർ രജിസ്റ്റർ ചെയ്യാൻ പോലീസിന് നോട്ടീസ് നൽകിയിട്ടുണ്ടെന്നും സ്വാതി മാലിവാൾ പറഞ്ഞിരുന്നു. രോഹിത് ശർമ്മയുടെ മകൾക്ക് നേരെയും സമാനമായ ആക്രമണം ഉണ്ടായതും വലിയ പ്രതിഷേധത്തിന് വഴിവെച്ചിരുന്നു.
Discussion about this post