ടെല് അവീവ്: പേജര് പൊട്ടിത്തെറിച്ച് ഹിസ്ബുള്ള അംഗങ്ങള് മരിച്ചതിന് പിന്നാലെ ഒരു ഞെട്ടിക്കുന്ന അറസ്റ്റിന്റെ വെളിപ്പെടുത്തലാണ് ഇസ്രായേല് പുറത്തുവിട്ടിരിക്കുന്നത്. പ്രധാനമന്ത്രി ബെഞ്ചമിന് നെതന്യാഹു ഉള്പ്പെടെയുള്ള ഉന്നതരെ വധിക്കാന് ഇറാന്റെ പിന്തുണയോടെ ഗൂഢാലോചന നടത്തിയെന്ന് സംശയിക്കുന്ന ഇസ്രയേലി പൗരനെ അറസ്റ്റ് ചെയ്തിരിക്കുകയാണ്.
തുര്ക്കിയുമായി ബന്ധമുള്ള വ്യവസായി മോതി മാമനെയാണ് ഇസ്രയേലി സുരക്ഷാ സേന അറസ്റ്റ് ചെയ്തത്. ഇസ്രയേല് പ്രധാനമന്ത്രി ബെഞ്ചമിന് നെതന്യാഹു, പ്രതിരോധമന്ത്രി യോവ് ഗാലന്റ്, ആഭ്യന്തര ഇന്റലിജന്സ് ഏജന്സിയായ ഷിന് ബെത്തിന്റെ മേധാവി എന്നിവരെ വധിക്കുന്നതിന്റെ സാധ്യതകള് ചര്ച്ച ചെയ്യാനായി ഇറാനില് നടന്ന രണ്ട് യോഗങ്ങളില് ഇയാള് പങ്കെടുത്തതായി തെളിവുകളുണ്ട്. കഴിഞ്ഞ മാസമാണ് ഇയാളെ അറസ്റ്റ് ചെയ്തതെന്ന് ഷിന് ബെത്തും ഇസ്രയേലി പോലീസും സംയുക്ത പ്രസ്താവനയില് അറിയിച്ചു. രണ്ട് തവണയും അതീവ രഹസ്യമായാണ് ഇയാള് ഇറാനിലേക്ക് പോയത്. ദൗത്യം നടപ്പാക്കാനായി ഇറാന്റെ പക്കല്നിന്ന് ഇയാള് പണം കൈപ്പറ്റിയെന്നും പ്രസ്താവനയില് പറയുന്നു.
ദക്ഷിണ ഇസ്രയേലിലെ നഗരമായ അഷ്കലോണില് നിന്നുള്ള മോതി മാമന് 73 വയസ്സുണ്ട്. ഒരുപാട് കാലം തുര്ക്കിയില് താമസിച്ചിരുന്ന ഇയാള്ക്ക് അവിടെയുള്ള തുര്ക്കിഷ്, ഇറാനിയന് പൗരന്മാരുമായി അടുത്ത ബന്ധമാണ് ഉണ്ടായിരുന്നത്.
ഏപ്രിലില് ഇയാള് ഇറാനില് താമസിക്കുന്ന കോടീശ്വരനായ എഡ്ഡിയുമായി കൂടിക്കാഴ്ചയ്ക്ക് സമ്മതം മൂളി. ഇയാളുടെ പ്രതിനിധികളായ രണ്ടുപേരുമായാണ് മാമന് കൂടിക്കാഴ്ച നടത്തിയത്. തുര്ക്കിയിലെ സിറിയന് അതിര്ത്തിക്ക് സമീപമുള്ള നഗരമായ സമന്ദാഗിലായിരുന്നു കൂടിക്കാഴ്ച. മേയ് മാസത്തില് സമന്ദാഗില് വീണ്ടും കൂടിക്കാഴ്ച നടന്നു.
എഡ്ഡിക്ക് ഇറാനില്നിന്ന് പുറത്തുവരാന് കഴിയാത്തതിനാല് മോതി മാമനെ കിഴക്കന് തുര്ക്കിയിലെ അതിര്ത്തി വഴി രഹസ്യമായി ഇറാനിലെത്തിച്ചുവെന്നും ഇറാനില് വെച്ച് മാമന് എഡ്ഡിയുമായും ഇറാന് സുരക്ഷാ സേനയിലെ അംഗമെന്ന് പരിചയപ്പെടുത്തിയ ഖ്വജ എന്നയാളുമായും കൂടിക്കാഴ്ച നടത്തി. എഡ്ഡിയുടെ വീട്ടില് വെച്ചായിരുന്നു കൂടിക്കാഴ്ച. ഓഗസ്റ്റില് വീണ്ടും കൂടിക്കാഴ്ച നടത്തി. ഈ കൂടിക്കാഴ്ചയിലാണ് നെതന്യാഹു ഉള്പ്പെടെയുള്ളവരെ വധിക്കാനുള്ള ഗൂഢാലോചന നടന്നത്.
ഹിസ്ബുള്ള അംഗങ്ങള് ആശയവിനിമയത്തിനായി ഉപയോഗിച്ചിരുന്ന പേജറുകള് പൊട്ടിത്തെറിച്ച് പത്തിലേറെ പേര് മരിക്കുകയും നിരവധി പേര്ക്ക് പരിക്കേല്ക്കുകയും ചെയ്തതിന് പിന്നാലെയാണ് ഇസ്രായേല് ഈ വാര്ത്ത പുറത്തുവിട്ടിരിക്കുന്നതെന്നുള്ള കാര്യം ശ്രദ്ധേയമാണ്. ഹിസിബുള്ളയുടെ ഈ ചതിക്കുള്ള മറുപടിയാകാം പേജര് സ്ഫോടനം എന്ന തരത്തില് ചര്ച്ചകള് ഉയര്ന്നിട്ടുണ്ട്.
Discussion about this post