ബംഗളൂരു: ബിജെപിയെ അപകീർത്തിപ്പെടുത്തിയ സംഭവത്തിൽ രാഹുൽ ഗാന്ധിയ്ക്കും കർണാടകയിലെ കോൺഗ്രസ് നേതാക്കൾക്കും നോട്ടീസ്. കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ ശിവകുമാർ എന്നിവർക്കും കെപിസിസിയ്ക്കുമാണ് രാഹുലിന് പുറമേ നോട്ടീസ് ലഭിച്ചിരിക്കുന്നത്. ബിജെപിയുടെ പരാതിയിൽ ബംഗളൂരു അഡീഷണൽ ചീഫ് മെട്രോപോളിറ്റൻ മജിസ്‌ട്രേറ്റ് കോടതിയുടേതാണ് നടപടി.
തിരഞ്ഞെടുപ്പിന്റെ ഭാഗമായി പത്രത്തിൽ നൽകിയ പരസ്യത്തിലൂടെയാണ് കോൺഗ്രസ് ബിജെപിയെ അപമാനിക്കാൻ ശ്രമിച്ചത്. മെയ് 5 ന് നൽകിയ പരസ്യം ബിജെപിയെയും ഭരണത്തിലുണ്ടായിരുന്ന സർക്കാരിന്റെയും പ്രതിച്ഛായ തകർക്കുന്ന തരത്തിൽ ആയിരുന്നു. 40 ശതമാനവും അഴിമതി നടത്തുന്ന ബിജെപി സർക്കാർ 1.5 ലക്ഷം രൂപ കൊള്ളയടിച്ചു എന്നായിരുന്നു പത്രത്തിലെ പ്രചാരണം.
സംഭവം വലിയ ചർച്ചയായതോടെ ബിജെപി സംസ്ഥാന സെക്രട്ടറിയും എംഎൽഎയുമായ എസ്. കേശവപ്രസാദ് ആണ് പരാതി നൽകിയത്. പരസ്യത്തിലൂടെ കോൺഗ്രസ് അപകീർത്തിപ്പെടുത്താൻ ശ്രമിച്ചതായി അദ്ദേഹം നൽകിയ പരാതിയിൽ പറയുന്നു. പരസ്യത്തിൽ പറഞ്ഞിരിക്കുന്നതെല്ലാം കള്ളമാണെന്നും പരാതിയിൽ ചൂണ്ടിക്കാട്ടുന്നുണ്ട്. ഇതിലാണ് കോടതി നോട്ടീസ് നൽകിയത്.
കോടതിയ്ക്ക് മുൻപിൽ നേരിട്ട് എത്തി സംഭവത്തിൽ വിശദീകരണം നൽകാൻ ആണ് നിർദ്ദേശം. അടുത്ത മാസം 27 ന് ഹാജരാകണമെന്ന് ആവശ്യപ്പെട്ടാണ് നോട്ടീസ്.
Discussion about this post