എറണാകുളം: കൊച്ചി നഗരത്തിന്റെ അന്തരീക്ഷത്തിൽ ഇപ്പോഴും തങ്ങി നിൽക്കുന്നത് ബ്രഹ്‌മപുരം മാലിന്യ പ്ലാന്റിലെ തീ പിടുത്തതെ തുടർന്നുണ്ടായ പുകയാണോ എന്ന് ചോദിച്ച് നടി സജിത മഠത്തിൽ. ഫ്‌ളാറ്റിന് പുറത്തുള്ള പുകമയമായ അന്തരീക്ഷത്തിന്റെ ചിത്രം പങ്കുവച്ചായിരുന്നു നടിയുടെ ചോദ്യം. വിവരമുള്ളവർ ഇതിനെക്കുറിച്ച് പറഞ്ഞുതരണമെന്നും നടി പറഞ്ഞു.
ബ്രഹ്‌മപുരത്തെ തീയും പുകയും സർക്കാർ പൂർണമായും അണച്ചല്ലോ, പിന്നെ അന്തരീക്ഷത്തിൽ കാണുന്നത് എന്താണ് എന്നാണ് നടിയുടെ ചോദ്യം.
ഇങ്ങിനെയാണ് ഫ്‌ലാറ്റിന്റെ പുറത്തേക്ക് നോക്കുമ്പോൾ കാണുന്നത്. ഇത് ബ്രഹ്‌മപുരത്തു നിന്നുള്ള പുകയാണോ? അവിടെ തീ കെടുത്തി, പുക ഒഴിഞ്ഞു എന്നാണ് മാദ്ധ്യമങ്ങളിൽ നിന്ന് മനസ്സിലായത്. പിന്നെ ഇതെന്തു പ്രതിഭാസമാകും ? വിവരമുള്ളവർ പറഞ്ഞു തരണേ. ജനലും വാതിലുമൊക്കെ തുറന്നു കിടക്കുകയാണെന്നും നടി പറയുന്നു. അതേസമയം കഴിഞ്ഞ ഏതാനും ദിവസങ്ങളായി അന്തരീക്ഷത്തിൽ കാണപ്പെട്ടത് ബ്രഹ്‌മപുരത്ത് നിന്നും ഉയർന്ന പുകയല്ലെന്ന് വരുത്തീ തീർക്കാനും സമൂഹമാദ്ധ്യമത്തിൽ ഇതുമായി ബന്ധപ്പെട്ടുള്ള ചർച്ചയ്ക്ക് തുടക്കം കുറിക്കാനുമാണ് നടിയുടെ ശ്രമമെന്നാണ് സൂചന.
എന്നാൽ ചോദ്യം ഉന്നയിച്ചുകൊണ്ടുള്ള ഫേസ്ബുക്ക് പോസ്റ്റിന് താഴെ വലിയ പരിഹാസമാണ് ഉയരുന്നത്. പുകയല്ലെന്നും കെ- മഞ്ഞ് അഥവാ കോടമഞ്ഞ് ആണ് ഇതെന്നുമാണ് ആളുകൾ പറയുന്നത്. അമേരിക്കയിലെ അലബാമയിൽ നിന്നുള്ള മഞ്ഞാണെന്നും ആളുകൾ പറയുന്നു. സജിത ഇടതു പക്ഷം ആണ് എങ്കിൽ ഇത് മൂടൽ മഞ്ഞാണ്, വലത് പക്ഷമാണെങ്കിൽ ഇത് വിഷപ്പുകയാണെന്നും ആളുകൾ പ്രതികരിക്കുന്നുണ്ട്.
