ഡൽഹി: ഇന്ത്യയുടെ വികലമായ ഭൂപടം പ്രസിദ്ധീകരിച്ച സംഭവത്തിൽ ട്വിറ്റർ എം ഡിക്കെതിരെ കേസ്. ജമ്മു കശ്മീരും ലഡാക്കും ഇന്ത്യയ്ക്കു പുറത്തു പ്രത്യേക രാജ്യങ്ങളായി ചിത്രീകരിച്ച ഭൂപടം പ്രസിദ്ധീകരിച്ചതിനാണ് കേസ്. ബജ്രംഗ്ദൾ നേതാവിന്റെ പരാതിയിലാണ് ഉത്തർപ്രദേശ് പൊലീസ് കേസെടുത്തിരിക്കുന്നത്.
ട്വിറ്ററിന്റെ നടപടി ശത്രുതയും വിദ്വേഷവും സൃഷ്ടിക്കാനുള്ള ശ്രമമാണെന്ന് പരാതിയിൽ പറയുന്നു. ട്വിറ്ററിനെതിരെ ഐടി നിയമവും ചുമത്തിയിട്ടുണ്ട്.
‘ട്വീറ്റ് ലൈഫ്’ എന്ന വിഭാഗത്തിൽ പ്രത്യക്ഷപ്പെട്ട ഇന്ത്യയുടെ വികല ഭൂപടം കനത്ത പ്രതിഷേധത്തെ തുടർന്ന് തിങ്കളാഴ്ച രാത്രിയോടെ ട്വിറ്റർ നീക്കം ചെയ്തിരുന്നു. ഇതു രണ്ടാം തവണയാണ് ട്വിറ്റർ ഇന്ത്യയുടെ ഭൂപടം വികലമാക്കി ചിത്രീകരിക്കുന്നത്. നേരത്തെ ലേയെ ജമ്മു കശ്മീരിന്റ ഭാഗമാക്കിയും ലഡാക്കിനെ ചൈനയുടെ ഭാഗമാക്കിയും ട്വിറ്റർ ഇന്ത്യയുടെ ഭൂപടം പ്രസിദ്ധീകരിച്ചിരുന്നു.
അതേസമയം ട്വിറ്ററിന്റെ പ്രവൃത്തിക്കെതിരെ ശക്തമായ നടപടി സ്വീകരിക്കുമെന്ന് കേന്ദ്ര സർക്കാർ വൃത്തങ്ങളും മുന്നറിയിപ്പ് നൽകി.
Discussion about this post