ചെന്നൈ : തൊണ്ടി മുതലായി സൂക്ഷിച്ചിരുന്ന കഞ്ചാവ് കച്ചവടം നടത്തിയ പോലീസ് ഉദ്യോഗസ്ഥന് സസ്പെൻഷൻ. തമിഴ്നാട്ടിലെ കമ്പത്താണ് സംഭവം. ലോവർ ക്യാമ്പിലുള്ള കുമളി പോലീസ് സ്റ്റേഷനിലെ ഹെഡ് കോൺസ്റ്റബിൾ നല്ല തമ്പിയെയാണ് സസ്പെന്റ് ചെയ്തത്.
കഞ്ചാവ് കേസ് പ്രതികളുമായി ബന്ധം സ്ഥാപിച്ചാണ് ഇയാൾ വിൽപ്പന നടത്തിയിരുന്നത്. കുമളി, ഗൂഡല്ലൂർ, കമ്പം എന്നീ പ്രദേശങ്ങളിൽ വച്ച് പിടികൂടുന്ന കഞ്ചാവ് കേസുകളെ പ്രതികളെ കോടതിയിൽ കൊണ്ടു പോകുന്ന ചുമതല തമ്പിക്കായിരുന്നു. തൊണ്ടിമുതലിന്റെ സാമ്പിൾ എടുത്ത ശേഷം അത് മുതൽ സൂക്ഷിക്കുന്നതും ഇയാളുടെ മേൽനോട്ടത്തിലായിരുന്നു. പ്രതികളെ ഹാജരാക്കാൻ കോടതിയിലേക്ക് കൊണ്ടുപോകുന്നതിനിടെയാണ് ഇയാൾ അവരുമായി ചങ്ങാത്തത്തിലാകുന്നത്.
അതുവഴി കഞ്ചാവ് കച്ചവടക്കാരുമായും ബന്ധം സ്ഥാപിക്കുകയും കഞ്ചാവ് കച്ചവടം തുടങ്ങുകയും ചെയ്തു. തൊണ്ടി മുതലായി സൂക്ഷിക്കുന്ന കഞ്ചാവും കച്ചവടക്കാരിൽ നിന്നും വാങ്ങുന്നതുമാണ് ഇയാൾ വിൽപ്പന നടത്തിയിരുന്നത്.
ഇത് ശ്രദ്ധയിൽ പെട്ട ഗൂഡല്ലൂർ സി ഐ പിച്ചൈപാണ്ടി പ്രാഥമിക അന്വേഷണം നടത്തി തെളിവുകൾ ശേഖരിച്ച ശേഷം കമ്പം പോലീസിൽ പരാതി നൽകി. തുടർന്ന് പ്രത്യേക സംഘത്തെ നിയോഗിച്ച് അന്വേഷണം നടത്തി. അന്വേഷണത്തിൽ നല്ല തമ്പി കഞ്ചാവ് കച്ചവടം നടത്തുന്നതായി കണ്ടെത്തിയതിനെ തുടർന്നാണ് അന്വേഷണ വിധേയമായി സസ്പെൻഡ് ചെയ്തത്.
Discussion about this post