ഡല്‍ഹി: രാജ്യത്തെ കറന്‍സി രഹിത പണമിടപാടുകള്‍ക്കായി ആധാര്‍ കാര്‍ഡ് അടിസ്ഥാനമാക്കിയുള്ള ആപ്പ് ആധാര്‍ പേ നിലവില്‍ വന്നു. ഡെബിറ്റ്, കാര്‍ഡ് വഴിയുള്ള പണമിടപാടുകള്‍ ഇനിമുതല്‍ ബയോമെട്രിക് സ്‌കാനിങ്ങിലൂടെ സാധ്യമാകുമെന്നതാണ് ആപ്പിന്റെ പ്രധാന സവിശേഷത. ആളുകളുടെ വിരലടയാളമോ, കണ്ണോ സ്‌കാന്‍ ചെയ്താല്‍ പണമിടപാട് നടത്തുന്ന വിധമാണ് ആന്‍ഡ്രോയിഡ് ആപ്പിന്റെ പ്രവര്‍ത്തനം. പ്ലേ സ്റ്റോറില്‍ നിന്നും ആധാര്‍ പേ സൗജന്യമായി ഡൗണ്‍ലോഡ് ചെയ്യാം.
2017-18 സാമ്പത്തിക വര്‍ഷത്തില്‍ 2500 കോടിയോളം ഡിജിറ്റല്‍ പണമിടപാട് നടത്തുക എന്ന ലക്ഷ്യത്തോടെയാണ് ആധാര്‍ പേ ആപ്പ് അവതരിപ്പിച്ചിരിക്കുന്നത്. സാധനങ്ങള്‍ വാങ്ങുമ്പോള്‍ കച്ചവടക്കാരന്റെ കയ്യിലുള്ള ആപ്പില്‍ ആധാര്‍ നമ്പര്‍ ടൈപ്പ് ചെയ്ത ശേഷം വിരലടയാളം സ്‌കാന്‍ ചെയ്യുന്നതോടെ പണമിടപാട് നടത്താനുതകുന്ന ലളിതമായ രീതിയിലാണ് ആപ്പ് രൂപകല്‍പ്പന ചെയ്തിരിക്കുന്നത്.
ഡെബിറ്റ്, ക്രെഡിറ്റ് കാര്‍ഡുകള്‍ ഉപയോഗിക്കുമ്പോള്‍ യൂസര്‍മാരില്‍ നിന്നും ഈടാക്കുന്ന സര്‍വീസ് ചാര്‍ജുകള്‍ ആധാര്‍ പേ ഉപയോഗിക്കുമ്പോള്‍ നല്‍കേണ്ടതില്ല. ബാങ്ക് അക്കൗണ്ടുകളെ ആധാര്‍ കാര്‍ഡുമായി ബന്ധിപ്പിച്ചാണ് ഈ ആപ്പ് പ്രവര്‍ത്തിക്കുന്നത്. ഇന്റര്‍നെറ്റ് സൗകര്യമുണ്ടെങ്കില്‍ മാത്രമേ ആപ്പ് പ്രവര്‍ത്തിക്കൂ. എന്നാല്‍ പണം മറ്റൊരു അക്കൗണ്ടിലേക്ക് നല്‍കാന്‍ ഈ ആപ്പ് വഴി സാധിക്കില്ല.
ഡെബിറ്റ്, ക്രെഡിറ്റ് കാര്‍ഡുകളും സ്മാര്‍ട്ട്‌ഫോണുകളും ഇല്ലാത്ത ഗ്രാമീണര്‍ക്കിടയില്‍ ഡിജിറ്റല്‍ പണമിടപാട് വര്‍ധിപ്പിക്കാന്‍ ആപ്പ് പ്രയോജനപ്രദമാകുമെന്നാണ് വിലയിരുത്തല്‍.
ആധാര്‍ പേയുടെ പ്രവര്‍ത്തനം:
ബയോമെട്രിക് സ്‌കാനറുമായോ ഫിംഗര്‍പ്രിന്റ് സ്‌കാനറുമായോ കണക്ട് ചെയ്തിട്ടുള്ള സ്മാര്‍ട്ട്‌ഫോണില്‍ ആപ്പ് ഡൗണ്‍ലോഡ് ചെയ്യുകയാണ് ആദ്യം കച്ചവടക്കാര്‍ ചെയ്യേണ്ടത്. സാധനങ്ങള്‍ വാങ്ങാന്‍ വരുന്നവര്‍ ആധാര്‍ കാര്‍ഡും അക്കൗണ്ടുള്ള ബാങ്കിന്റെ വിവരവും നല്‍കിയാല്‍ മതി. കച്ചവടക്കാരന്‍ ആപ്പില്‍ ആധാര്‍ നമ്പര്‍ ടൈപ്പ് ചെയ്ത് ബയോമെട്രിക് സംവിധാനത്തില്‍ വിരല്‍ സ്‌കാന്‍ ചെയ്യുന്ന പക്ഷം പണമിടപാട് നടന്നിരിക്കും.
സുരക്ഷിതത്വം:
രാജ്യത്ത് നിലവിലുള്ള മറ്റേത് കാഷ്‌ലെസ് പേയ്‌മെന്റിനേക്കാള്‍ സുരക്ഷിതമാണ് ആധാര്‍ പേ എന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ തലവന്‍ അജയ് പാണ്ഡേ അവകാശപ്പെടുന്നു. ‘ മറ്റു പേയ്‌മെന്റ് സംവിധാനങ്ങളെ പോലെ സുരക്ഷിതമാണ് ഈ ആപ്പും. എന്റെ വ്യക്തിപരമായ അഭിപ്രായത്തില്‍ മറ്റേത് കാഷ്‌ലെസ് പേയ്‌മെന്റിനേക്കാള്‍ സുരക്ഷിതവു’മാണെന്ന് അജയ് പറയുന്നു.
ആപ്പ് ഉപകാരപ്രദമാകുന്നത്:
രാജ്യത്തെ 100 കോടി ആധാര്‍ കാര്‍ഡുകളില്‍ 40 കോടിയും ബാങ്ക് അക്കൗണ്ടുകളുമായി ബന്ധിപ്പിച്ചിട്ടുണ്ടെന്നാണ് വിവരം. ഇവര്‍ക്കെല്ലാം ആധാര്‍ പേ ആപ്പിലൂടെ പണമിടപാട് നടത്താം.
Discussion about this post