കൊച്ചി: അതിരപ്പിള്ളി ജലവൈദ്യുത പദ്ധതിക്കെതിരെ രൂക്ഷ വിമര്ശനവുമായി നടന് ശ്രീനിവാസന്. നാട്ടിലുള്ളവര്ക്കും നാട്ടുകാര്ക്കും ആവശ്യമില്ലാത്ത അതിരപ്പിള്ളി പദ്ധതിക്ക് വേണ്ടി നിര്ബന്ധം പിടിക്കുന്നത് ഇടതട്ടുകാര്ക്ക് പണം തട്ടാന് വേണ്ടിയെന്ന് അദ്ദേഹം പറഞ്ഞു. ബുദ്ധിയുള്ള ഭരണാധികാരികളുള്ള നാട്ടില് പരിസ്ഥിതിക്ക് ആഘാതമുണ്ടാക്കുന്ന പദ്ധതികള്ക്ക് അനുവാദം നല്കില്ലെന്നും ശ്രീനിവാസന് പറഞ്ഞു. വൈദ്യുതി മന്ത്രി അടക്കമുള്ളവരെ പരോക്ഷമായി അദ്ദേഹം വിമര്ശിച്ചു. അതിരപ്പിള്ളിയില് ജലവൈദ്യുത പദ്ധതിക്കെതിരായി നടക്കുന്ന സമരപരിപാടിയില് പങ്കെടുത്ത് സംസാരിക്കുകയായിരുന്നു അദ്ദേഹം.
ഇടതട്ടുകാര്ക്ക് പണം തട്ടാനുള്ള പദ്ധതി മാത്രമാണ് അതിരപ്പിള്ളി. 138 ഹെക്ടര് വനം ഇല്ലാതാക്കിയിട്ട് സംസ്ഥാനത്തിന് ആവശ്യമായ ഒരു ശതമാനം വൈദ്യുതി പോലും ലഭിക്കാത്ത പദ്ധതിക്ക് വേണ്ടി വാശി പിടിക്കുന്നത് എന്തിനാണെന്ന് അദ്ദേഹം ചോദിച്ചു. ജനങ്ങള്ക്ക് കുറഞ്ഞ ചിലവില് വൈദ്യുതി ലഭ്യമാക്കുക എന്ന ലക്ഷ്യം പദ്ധതിക്ക് പിന്നിലുണ്ടെന്ന് കരുതുന്നില്ല. 1800 കോടി രൂപ മുടക്കി ഹെക്ടറു കണക്കിന് വനം നശിപ്പിച്ച് വൈദ്യുതി ഉത്പാദിപ്പിക്കുന്നതിലും നല്ലതല്ലേ ഈ തുക ഉപയോഗിച്ച് സോളാര് പാനല് വീടുകളില് സ്ഥാപിക്കുന്നതെന്നും അദ്ദേഹം ചോദിച്ചു.
അതിരപ്പിള്ളി പദ്ധതിയുമായി ബന്ധപ്പെട്ട് വിചിത്രമായ കണക്കുകളാണ് കേള്ക്കുന്നത്. പദ്ധതി നിലവില് വരികയാണെങ്കില് 50 പൈസ മാത്രമാണ് ഒരു യൂണിറ്റ് വൈദ്യുതിക്ക് ചിലവാകുകയുള്ളു. സോളാര് ഉപയോഗിക്കുകയാണെങ്കില് ചിലവ് 6 രൂപയ്ക്ക് മുകളിലാണെന്നാണ് കണക്കുകള്. എത്ര ആലോചിച്ചിട്ടും ഇത് എവിടുത്തെ കണക്കാണെന്ന് മാത്രം മനസിലാകുന്നില്ല. ഇവിടെ ജീവിക്കുന്ന ആളുകള്ക്കും ചിന്തിക്കുന്ന മനുഷ്യര്ക്കും പദ്ധതി ആവശ്യമില്ല. നാട്ടിലുള്ളവര്ക്കും നാട്ടുകാര്ക്കും ആവശ്യമില്ലാത്ത പദ്ധതിക്ക് വേണ്ടി നിര്ബന്ധം പിടിക്കുന്നത് ഇടതട്ട്കാര്ക്ക് വേണ്ടിമാത്രമാണെന്നും ശ്രീനിവാസന് വ്യക്തമാക്കി.
നേരത്തെ അതിരപ്പിള്ളി പദ്ധതിയുമായി ബന്ധപ്പെട്ട് വനം നഷ്ടപ്പെടുമെന്ന പരാതികളില് വലിയ കാര്യമൊന്നുമല്ലെന്ന് വൈദ്യുത മന്ത്രി എംഎം മണി പറഞ്ഞിരുന്നു. അതിരപ്പിള്ളി പദ്ധതിയില് നിന്ന് പിന്നോട്ടില്ലെന്ന് പറഞ്ഞാണ് വനം നഷ്ടപ്പെടുമെന്ന തരത്തില് ഉയരുന്ന പരാതികള് ഗൗരവമുള്ളതല്ല വൈദ്യുതിയാണ് പ്രധാനമെന്ന് മന്ത്രി പറഞ്ഞത്.
ശ്രീനിവാസന്റെ പ്രസംഗം പൂര്ണ രൂപത്തില്:
Discussion about this post