കൊച്ചി: പൃഥ്വിരാജും ഇന്ദ്രജിത്തും പ്രധാന കഥാപാത്രങ്ങളായി എത്തുന്ന ‘ടിയാന്‍’ ചിത്രത്തിന്റെ ട്രെയിലര്‍ പുറത്തിറങ്ങി. ഹിന്ദിയുടെ നാട്ടില്‍ സ്പര്‍ദ്ധയുടെ മണ്ണില്‍ ചതിയുടെ തട്ടകത്തില്‍ ചുവട് പാളിയ ഒറ്റപ്പെട്ട മലയാളം എന്ന സബ് ടൈറ്റിലിനെ കൃത്യമായി ചിത്രീകരിക്കുന്ന വിഷ്വലിലൂടെയും നോര്‍ത്തിന്ത്യന്‍ പശ്ചാത്തലത്തില്‍ കഥപറയുന്ന ചിത്രമാണ് എന്ന് വ്യക്തമാക്കിക്കൊണ്ടാണ് ടിയാന്‍ ട്രെയിലര്‍ പുറത്തിറങ്ങിയത്.
മതപരമായ യുദ്ധത്തിന്റെ സാധ്യതകള്‍ തെളിയിക്കുന്നതാണ് ട്രെയിലര്‍. ”രണ്ടുതരം യുദ്ധങ്ങളുണ്ട്: ഒന്ന്, ശരിയായതും മറ്റേത് തെറ്റായതും. ശരിയായ യുദ്ധത്തിന് മുമ്പ് ഏതൊരു പോരാളിക്കും ശക്തിക്ഷയത്തിന്റെ നിമിഷമുണ്ട്. അതിന്റെ കാരണം: അത് അവന്‍ ഒറ്റയ്ക്കാണ് എന്ന തിരിച്ചറിവാണ്.” എന്ന പൃഥ്വിരാജ് ഡയലോഗിലൂടെ ചില സൂചനകള്‍ നല്‍കിക്കൊണ്ടാണ് ട്രെയിലര്‍ പുറത്തിറക്കിയത്.
ജീയെന്‍ കൃഷ്ണകുമാര്‍ ആണ് ചിത്രത്തിന്റെ സംവിധായകന്‍. മുരളി ഗോപിയാണ് തിരക്കഥ തയ്യാറാക്കിയിരിക്കുന്നത്. ചിത്രത്തില്‍ മുരളി ഗോപി ശ്രദ്ധേയമായ ഒരു വേഷവും ചെയ്യുന്നുണ്ട്. ഷൈന്‍ ടോം ചാക്കോ, അനന്യ, പത്മപ്രിയ തുടങ്ങിയവരാണ് മറ്റു കഥാപാത്രങ്ങളെ അവതരിപ്പിക്കുന്നത്.
റെഡ് റോസ് ക്രിയേഷന്റെ ബാനറില്‍ ഹനീഫ് മുഹമ്മദാണ് ചിത്രം നിര്‍മ്മിക്കുന്നത്. ചിത്രം റംസാന് തീയേറ്ററിലെത്തും.
Discussion about this post