ഡല്ഹി: ബലാത്സംഗക്കുറ്റത്തിന് ശിക്ഷിക്കപ്പെട്ട് 20 വര്ഷം ജയിലില് അടക്കപ്പെട്ട ദേരാ സച്ചാ സൌദ തലവന് ഗുര്മീത് റാം റഹിം സിങ് പുതിയ തന്ത്രം പുറത്തെടുക്കുന്നു. തനിക്കെതിരായ ബലാത്സംഗക്കേസില് നിന്ന് ശ്രദ്ധ തിരിക്കുകയാണ് ഗുര്മീതിന്റെ ലക്ഷ്യമെന്നാണ് നിഗമനം. ഗുര്മീതിന്റെ ഉറ്റ സഹായികളും പതിനായിരക്കണക്കിന് വരുന്ന അനുയായികളും കൂട്ടത്തോടെ ഇസ്ലാമിലേക്ക് മതപരിവര്ത്തനം നടത്തുമെന്ന ഭീഷണിയാണ് ഏറ്റവുമൊടുവില് പുറത്തുവിട്ടിരിക്കുന്നത്. ദേരാ വക്താവ് സന്ദീപ് മിശ്ര മതം മാറ്റത്തേക്കുറിച്ച് സംസാരിക്കുന്ന വീഡിയോ പുറത്തുവിട്ടതോടെ ആണ് ഇക്കാര്യം ചര്ച്ചയായിരിക്കുന്നത്.
ഗുര്മീത് ജയിലില് അടക്കപ്പെട്ടതിന് കാരണം അദ്ദേഹം ഒരു ഹിന്ദു ആയതുകൊണ്ടാണെന്നും ഹിന്ദുസ്ഥാനില് ഒരു ഹിന്ദു സംഘടന അനായാസം ലക്ഷ്യംവെക്കപ്പെടുമെന്നും ഗുര്മീതിന്റെ അനുയായികള് പറഞ്ഞു.
മുഖം മറച്ച ഒരു അനുയായിയുമായി സന്ദീപ് സംസാരിക്കുന്നതാണ് വീഡിയോയിലുള്ളത്. സിര്സയില് വെച്ച് സന്ദീപ് സ്വയം തയാറാക്കിയതാണ് വീഡിയോ എന്നാണ് വാദം. കൂട്ട മതംമാറ്റത്തിനായി ദേരാ അനുയായികള് എഐഎംഐഎം അധ്യക്ഷന് അസാദുദ്ദീന് ഉവൈസിയുമായും ഷാഹി ഇമാം സയ്ദ് അഹമ്മദ് ബുഖാരിയുമായും കൂടിക്കാഴ്ച നടത്തി കഴിഞ്ഞതായും വീഡിയോയില് സന്ദീപ് അവകാശപ്പെടുന്നു.
”നിങ്ങള് ഹിന്ദുസ്ഥാനെ സ്നേഹിച്ചാല് അത് നിങ്ങള്ക്ക് കണ്ണീര് മാത്രമാണ് നല്കുക. ഹിന്ദുസ്ഥാന് എന്ന നമ്മുടെ സ്വന്തം രാജ്യത്ത് ഹിന്ദുവായി ജീവിക്കുന്നത് കുറ്റകൃത്യമാണ്. വിശ്വാസം ആക്രമിക്കപ്പെടുമ്പോള് മതപരിവര്ത്തനം നടത്തിക്കൂടേ? സമാന ചിന്താഗതിക്കാരെ ഒരുമിച്ചു കൂട്ടുകയാണിപ്പോള്. ലക്ഷത്തോളം ദേരാ അനുയായികള് കൂട്ടത്തോടെ മതംമാറുമെന്നും സന്ദീപ് പറഞ്ഞു.
”ഞങ്ങളുടെ നേതാക്കള് മുസ്ലിം നേതാക്കളുമായി ചര്ച്ച നടത്തിയ കഴിഞ്ഞു. ഒരു ലക്ഷത്തോളം അനുയായികള് ഇസ്ലാം സ്വീകരിക്കും. മുസ്ലിംകള് കല്ലെറിഞ്ഞാല് പോലും ആരും അവരെ തൊടില്ലെന്നും സന്ദീപിനോട് മുഖം മറച്ച് സംസാരിച്ച അനുയായി വീഡിയോയില് പറയുന്നു. ഹിന്ദു വികാരം ഉണര്ത്താനും കേന്ദ്ര സര്ക്കാരിനെയും ബിജെപി നേതാക്കളെയും പ്രതിരോധത്തിലാക്കാനും വേണ്ടി ഗുര്മീതിന്റെ തലയില് ഉദിച്ച പുതിയ തന്ത്രമാണിതെന്നാണ് നിരീക്ഷകര് വിലയിരുത്തുന്നത്.
Discussion about this post