ഡല്‍ഹി: ആധാര്‍ ഉപഭോക്താക്കളെ തിരിച്ചറിയാന്‍ ഇനി മുഖവും അടയാളം. വിരലടയാളം മാത്രം ഉപയോഗിച്ച് ആധാര്‍ ഉടമയെ തിരിച്ചറിയുന്നത് പഴങ്കഥയാകുകയാണെന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്‍ഡ്യ അറിയിച്ചു. ജൂലൈ ഒന്ന് മുതലാണ് പുതിയ സംവിധാനം നിലവില്‍ വരിക. തിരിച്ചറിയല്‍ സംവിധാനത്തില്‍ പുതിയ നാഴികക്കല്ല് സൃഷ്ടിക്കുകയാണ് യുഐഡിഎഐ, ഫേസ് ഓഥന്റിക്കേഷന്‍ എന്ന സാങ്കേതികതയിലൂടെ. വിരലടയാളം ഉപയോഗിച്ചുള്ള തിരിച്ചറിയല്‍ മാര്‍ഗങ്ങളുടെ പരിമിതികളെ മറികടക്കാന്‍ പുതിയ സംവിധാനം സഹായിക്കും.സംവിധാനം ജൂലൈ 1 മുതല്‍ പ്രാബല്യത്തില്‍ വരുമെന്ന് സിഇഒ അജയ് പാണ്ഡേ ട്വിറ്ററിലൂടെ അറിയിച്ചു.
നിലവില്‍ രേഖപ്പെടുത്തുന്ന ബയോമെട്രിക് അടയാളങ്ങളായ വിരലടയാളത്തിന്റെയോ കൃഷ്ണമണിയുടെയോ രേഖകള്‍ക്കൊപ്പമായിരിക്കും മുഖവും രേഖയായി സൂക്ഷിക്കുക. ആധാറിലൂടെ വ്യക്തിയെ കൃത്യമായി തിരിച്ചറിയാന്‍ ഇതിലൂടെ സാധിക്കും.ഉപയോക്താക്കളുടെ സ്വകാര്യത മാനിക്കുന്നത് സംബന്ധിച്ച പുതിയ ഇരട്ടപ്പാളി സുരക്ഷാ സംവിധാനം കൊണ്ടുവരുമെന്ന് പ്രഖ്യാപിച്ചതിനു പിന്നാലെയാണ് ഫേസ് ഓഥന്റിക്കേഷനെക്കുറിച്ചും യുഐഡിഎഐ അറിയിച്ചിരിക്കുന്നത്. യഥാര്‍ത്ഥ ആധാര്‍ നമ്പര്‍ ഉപയോഗിക്കുന്നതിനു പകരം വ്യക്തികള്‍ക്ക് വെര്‍ച്വല്‍ ഐഡി ഉപയോഗിക്കാനുള്ള സംവിധാനം ഉടന്‍ നിലവില്‍ വരുമെന്നും യുഐഡിഎഐ അറിയിച്ചിരുന്നു.
ആധാര്‍ എന്‌റോള്‍ ചെയ്യുന്ന സമയത്ത് വ്യക്തിയുടെ മുഖത്തിന്റെ ഫോട്ടോയും രേഖയായി റെക്കോഡ് ചെയ്യപ്പെടുമെന്നാണ് സര്‍ക്കുലറില്‍ പറയുന്നത്. നിലവില്‍ ഫോട്ടോ എടുക്കാറുണ്ടെങ്കിലും അത് രേഖയായി സെന്‍ട്രല്‍ ഐഡന്റിറ്റീസ് ഡേറ്റാ റെപ്പോസിറ്ററിയിലേക്ക് (സിഐഡിആര്‍)കൈമാറാറില്ല.
സിഐഡിആര്‍ ആണ് ആധാര്‍ പ്രേജക്ടിലെ രേഖകള്‍ സൂക്ഷിക്കുന്ന സര്‍ക്കാര്‍ ഏജന്‍സി.
Discussion about this post