കുവൈത്തിലെ ഫിലിപ്പീന്‍ വീട്ടുവേലക്കാരെ ഗാര്‍ഹിക പീഢനത്തില്‍ നിന്നും രക്ഷിക്കാന്‍ വേണ്ടി ഫിലിപ്പീന്‍ എംബസിയുടെ നേതൃത്വത്തില്‍ നടത്തിയ രക്ഷാ പ്രവര്‍ത്തനം മൂലം കുവൈത്തും ഫിലിപ്പീന്‍സും തമ്മിലുള്ള നയതന്ത്ര ബന്ധം വഷളായിരിക്കുകയാണ്. രക്ഷാ പ്രവര്‍ത്തനത്തിനെതിരെ വ്യാപക പ്രതിഷേധം ഉയര്‍ന്നിരുന്നു. ഈ പശ്ചാത്തലത്തില്‍ കുവൈത്തിലുള്ള എല്ലാ ഫിലിപ്പിന്‍ സ്വദേശികളും രാജ്യസ്നേഹം കണക്കിലെടുത്തു സ്വന്തം രാജ്യത്തേക്ക് മടങ്ങണമെന്ന് ഫിലിപ്പീന്‍ പ്രസിഡന്റ് റോഡ്രിഗോ ഡ്യൂട്ടെററ്റ് ആവശ്യപ്പെട്ടു. ഏകദേശം 2,60,000 ഫിലിപ്പീന്‍സ്‌കാരാണ് നിലവില്‍ കുവൈത്തിലുള്ളത്.
ഫിലിപ്പീന്‍ എംബസി ഉദ്യോഗസ്ഥരുടെ നേതൃത്വത്തില്‍ വീടുകളില്‍ നിന്നും ഫിലിപ്പീന്‍ വീട്ടുവേലക്കാരെ കടത്തി കൊണ്ടു പോകുന്ന ദൃശ്യങ്ങള്‍ കുവൈത്തില്‍ പ്രചരിച്ചിരുന്നു. പാദേശിക അറബ് ദിന പത്രത്തിനു നല്‍കിയ അഭിമുഖത്തില്‍ കുവൈത്തിലെ ഫിലിപ്പീന്‍ സ്ഥാനപതി സംഭവം സ്ഥിരീകരിക്കുകയും ചെയ്തിരുന്നു. ഇതോടെ ഫിലിപ്പീന്‍ എംബസിക്ക് നേരെ രാജ്യവ്യാപകമായി പ്രതിഷേധം ഉയര്‍ന്നിരുന്നു.
ഫിലിപ്പീന്‍ എംബസി അടച്ചു പൂട്ടണമെന്ന ആവശ്യം ഉയര്‍ന്ന വന്നിരുന്നു. രക്ഷാ പ്രവര്‍ത്തനത്തിനു നേതൃത്വം നല്‍കിയതായി കണ്ടെത്തിയ എംബസി ഉദ്യോഗസ്ഥരെ മുന്ന് ദിവസത്തിനകം രാജ്യത്ത് നിന്നും പുറത്താക്കണമെന്ന് കുവൈത്ത് വിദേശ കാര്യ മന്ത്രാലയം ഫിലിപ്പീന്‍സ് അധികൃതര്‍ക്ക് മുന്നറിയിപ്പ് നല്‍കുകയും ചെയ്തു. ഫിലിപ്പീന്‍ സ്ഥാനപതി റിനാറ്റോ പെഡ്രോ വില്ലയെ രണ്ടു തവണ വിളിച്ചു വരുത്തിയ വിദേശകാര്യ മന്ത്രാലയം രാജ്യത്തിന്റെ പ്രതിഷേധം അറിയിക്കുകയും സംഭവത്തില്‍ പങ്കെടുത്ത ഉദ്യോഗസ്ഥരെ മുന്നു ദിവസത്തിനകം തിരിച്ചുവിളിക്കണമെന്നും ആവശ്യപ്പെട്ടു. ഈ സാഹചര്യത്തില്‍ ഫിലിപ്പീന്‍സ് സ്വദേശികള്‍ കുവൈത്തില്‍ തുടരുന്നത് ശരിയല്ല എന്ന നിഗമനത്തിലാണ് ഫിലിപ്പീന്‍ പ്രസിഡന്റ് റോഡ്രിഗോ ഡ്യൂട്ടെറെട്ട് സ്വദേശികളോട് തിരികെ വരാന്‍ ആഹ്വാനം ചെയ്തത്.
Discussion about this post