മമ്മൂട്ടി ചിത്രമായ ‘അബ്രഹാമിന്റെ സന്തതികളി’ല്‍ വംശീയ അധിക്ഷേപമുണ്ടെന്ന് ചൂണ്ടിക്കാട്ടി വിമര്‍ശനം നടത്തിയ എഴുത്തുകാരി അരുന്ധതി റോയിയുടെ ഫേസ്ബുക്ക് പേജില്‍ മമ്മൂട്ടി ആരാധകര്‍ പരിഹാസവുമായി രംഗത്തെത്തിയിട്ടുണ്ട്. മമ്മൂട്ടി ചിത്രത്തെ വിമര്‍ശിച്ച നടി പാര്‍വ്വതിയ്ക്ക് ലഭിച്ചതെന്താണെന്ന് ഓര്‍മ്മ വേണമെന്ന് സൂചിപ്പിക്കുന്ന കമന്റായിരുന്നു ഒരു ആരാധകന്‍ ഇട്ടത്. ഇവിടെ ഒരു പൊങ്കാല വീഴാന്‍ ചാന്‍സുണ്ടെന്ന് പറയുന്നതായിരുന്നു മറ്റൊരു ആരാധകന്റെ കമന്റ്.
ചിത്രത്തില്‍ കറുത്ത വര്‍ഗക്കാരായ ആഫ്രിക്കക്കാര്‍ക്കെതിരെ വംശീയ അധിക്ഷേപമുണ്ടെന്നായിരുന്നു അരുന്ധതിയുടെ വിമര്‍ശനം. ചിത്രത്തില്‍ വില്ലന്മാരായി എത്തുന്ന ആഫ്രിക്കക്കാരെ ക്രൂരന്മാരും വിഡ്ഡികളുമായാണ് ചിത്രീകരിച്ചിരിക്കുന്നതെന്നും ഉത്തരേന്ത്യക്കാര്‍ നിറത്തിന്റെ പേരില്‍ ദക്ഷിണേന്ത്യക്കാരെ പരിഹസിക്കുന്നത് പോലെത്തന്നെയാണ് ദക്ഷിണേന്ത്യയിലെ ഈ സിനിമയില്‍ ആഫ്രിക്കക്കാരെ പരിഹസിച്ചിട്ടുള്ളതെന്നും അരുന്ധതി അഭിപ്രായപ്പെട്ടിരുന്നു. കേരളത്തില്‍ ആഫ്രിക്കന്‍ വംശജര്‍ ഇല്ലാത്തത് മൂലം വംശീയത പ്രകടിപ്പിക്കാന്‍ വേണ്ടി മാത്രം കറുത്തവരെ ഇറക്കുമതി ചെയ്യുന്ന അവസ്ഥയാണ് ചിത്രത്തില്‍ കാണുന്നതെന്നും അവര്‍ പറഞ്ഞിരുന്നു. ഈ അവസ്ഥയ്ക്ക് കേരളത്തെ മാത്രം കുറ്റപ്പെടുത്താന്‍ സാധിക്കില്ലെന്നും സമൂഹവും, മനുഷ്യരും, കലാകാരന്മാരും, സംവിധാകരും, നടന്മാരും, എഴുത്തുകാരും ഇതുപോലെയാണെന്ന് അരുന്ധതി പറഞ്ഞിരുന്നു.
ഹനീഫ് അദേനി തിരക്കഥ രചിച്ച ‘അബ്രഹാമിന്റെ സന്തതികള്‍’ സംവിധാനം ചെയ്തത് ഷാജി പാടൂരായിരുന്നു. ചിത്രം 2018ലായിരുന്നു പുറത്തിറങ്ങിയിരുന്നത്.
Discussion about this post