മോഹന്‍ലാല്‍ നായകനായെത്തിയ ബിഗ് ബജറ്റ് ചിത്രം ‘പുലിമുരുകനെ’തിരെ ആരോപണവുമായി സംവിധായകന്‍ അടൂര്‍ ഗോപാലകൃഷ്ണന്‍ രംഗത്ത്. ചിത്രത്തിന് സെന്‍സര്‍ സര്‍ട്ടിഫിക്കറ്റ് ലഭിച്ചതിന് പിന്നില്‍ സാമ്പത്തിക തിരിമറി നടന്നിട്ടുണ്ടാവാമെന്ന് അടൂര്‍ ആരോപിച്ചു. സെന്‍സര്‍ഷിപ്പ് വാണിജ്യ സിനിമകള്‍ക്കുവേണ്ടിയാണെന്ന് അദ്ദേഹം അഭിപ്രായപ്പെട്ടു. ‘പുലിമുരുകന്’ പോലുള്ള ഒരു ചിത്രത്തിന് എങ്ങനെയാണ് സെന്‍സര്‍ സര്‍ട്ടിഫിക്കറ്റ് ലഭിച്ചതെന്ന് തനിക്ക് മനസ്സിലാകുന്നില്ലെന്നും ചങ്ങനാശ്ശേരി കുരിശുംമൂട് സെന്റ് ജോസഫ് കോളേജ് ഓഫ് കമ്യൂണിക്കേഷനില്‍ നടന്ന ചടങ്ങില്‍ അദ്ദേഹം പറഞ്ഞു.
സെന്‍സര്‍ഷിപ്പിന്റെ പേരില്‍ നടക്കുന്നത് ശുദ്ധ അസംബന്ധമാണെന്നും സെന്‍സര്‍ഷിപ്പ് നിരോധിക്കണമെന്നാണ് തന്റെ അഭിപ്രായമെന്നും അടൂര്‍ വ്യക്തമാക്കി. സെന്‍സര്‍ഷിപ്പ് ബാധിക്കുന്നത് സാധാരണ ചിത്രങ്ങള്‍ ചെയ്യുന്നവരെയാണെന്നും അടൂര്‍ പറഞ്ഞു. ‘ഏതെങ്കിലും സീനില്‍ പൂച്ചയെ കാണിക്കുന്നതിന് പോലും വിശദീകരണം ചോദിക്കുന്നവര്‍ ‘പുലിമുരുകന്’ എന്ന, പുലിയെ കൊല്ലുന്ന ചിത്രത്തിന് സെന്‍സര്‍ സര്‍ട്ടിഫിക്കറ്റ് ന്ല്‍കി,’ അടൂര്‍ പറഞ്ഞു. ഇതിന് പിന്നില്‍ സാമ്പത്തിക തിരിമറി നടന്നിട്ടുണ്ടാകാമെന്നാണ് അടൂരിന്റെ വാദം.
ഇത് കൂടാതെ ആയിരം കോടിയുടെ സിനിമകള്‍ നിരോധിക്കണമെന്നും അടൂര്‍ അഭിപ്രായപ്പെട്ടു. സിനിമ യാഥാര്‍ത്ഥ്യത്തില്‍ നിന്നും എത്രമാത്രം അകന്ന് നില്‍ക്കുന്നുവോ അത്രമാത്രം സാമ്പത്തിക വിജയം നേടും എന്നതാണ് ഇപ്പോഴത്തെ സ്ഥിതിയെന്ന് അടൂര്‍ പറഞ്ഞു. ചിത്രം നിര്‍മ്മിക്കാന്‍ ചിലവാകുന്ന തുകയും ചിത്രത്തിന്റെ മേന്മയും തമ്മില്‍ ഒരു ബന്ധവുമില്ലെന്നും അദ്ദേഹം അഭിപ്രായപ്പെട്ടു.
Discussion about this post