തിരുവനന്തപുരം: പൊതുവേദിയില്‍ നിലവിളക്ക് കൊളുത്താതിരുന്ന വിദ്യാഭ്യാസ മന്ത്രി പി.കെ അബ്ദു റബിനെ വിളക്ക് കൊളുത്തല്‍ ഒരു മതത്തിന്റെയും ആചാരമല്ലെന്ന് ഉപദേശിച്ച് നടന്‍ മമ്മൂട്ടി. തിരുവനന്തപുരത്ത് കഴിഞ്ഞ ദിവസം നടന്ന പി.എന്‍ പണിക്കര്‍ അനുസ്മരണ ദിന ചടങ്ങായിരുന്നു വേദി. ഉദ്ഘാടന വേദിയില്‍ മമ്മൂട്ടി വിളക്ക് കൊളുത്തി, മന്ത്രിയ്ക്ക് നീട്ടിയപ്പോള്‍ മന്ത്രി വിസമ്മതിക്കുകയായിരുന്നു. തുടര്‍ന്ന് സംസാരിച്ച മമ്മൂട്ടി സംഭവം ചര്‍ച്ചയാക്കുകയും, വേദിയിലുണ്ടായിരുന്നുവരുടെ പിന്തുണ നേടുകയും ചെയ്തു.
വിളക്ക് കൊളുത്തുന്നത് ഏതെങ്കിലും ഒരു മതത്തിന്റെ ആചാരമല്ല. മുസ്ലിംലീഗ് ഇത്തരം വിശ്വാസങ്ങള്‍ അവസാനിപ്പിക്കണം-മമ്മൂട്ടി പറഞ്ഞു. താനും ഒരു മുസ്ലിം വിശ്വാസിയാണ്. മതാചാരപ്രകാരമാണ് ജീവിക്കുന്നത്, നോമ്പും എടുക്കുന്നുണ്ട്.-മമ്മൂട്ടി പറഞ്ഞു.
പല ചടങ്ങുകളിലും താന്‍ വിളക്ക് കൊളുത്താറുണ്ട്. അതില്‍ എന്താണ് പ്രശ്‌നമെന്നും മമ്മൂട്ടി ചോദിച്ചു.
തുടര്‍ന്ന് സംസാരിച്ച ഉദ്ഘാടകന്‍ പി.ജെ കുര്യനും മമ്മൂട്ടിയുടെ വാക്കുകളെ പിന്തുണച്ചു. വിളക്ക് കൊളുത്തുന്നത് മതാചാരമല്ലെന്നും, ഭാരത സംസ്‌ക്കാരത്തിന്റെ ഭാഗമാണെന്നും ആയിരുന്നു പി.ജെ കുര്യന്റെ അഭിപ്രായം. ഇക്കാര്യം പാര്‍ലമെന്റില്‍ താന്‍ ഉന്നയിച്ചിട്ടുണ്ടെന്നും കുര്യന്‍ വിശദീകരിച്ചു.
പി.കെ കുഞ്ഞാലിക്കുട്ടി, ഇബ്രാഹിം കുഞ്ഞ് തുടങ്ങി ലീഗ് മന്ത്രിമാരാരും ചടങ്ങുകളില്‍ വിളക്ക് കൊളുത്താറില്ല. വിളക്ക് തെളിയിക്കുന്നതിന് മുസ്ലിം മതാചാരപ്രകാരം അനവാദമില്ലെന്നാണ് ലീഗ് നേതാക്കളുടെ നിലപാട്.
Discussion about this post