ബാലാക്കോട്ട് വ്യോമാക്രമണത്തില് മരിച്ച ഭീകരരുടെ എണ്ണത്തെ ചൊല്ലിയുളള രാഷ്ട്രീയ തര്ക്കത്തില് പ്രതിപക്ഷത്തിന് ചുട്ട മറുപടിയുമായി കേന്ദ്രമന്ത്രി വി കെ സിങ്. ‘കഴിഞ്ഞ രാത്രി 3.30ന് ഭയങ്കര കൊതുകുശല്യം, ഞാന് ഹിറ്റ് ഉപയോഗിച്ചു, ഇനി എത്ര കൊതുകുകള് കൊല്ലപ്പെട്ടു എന്ന് ഞാന് എണ്ണിനോക്കണമോ അതോ തിരിച്ച് പോയി ഉറങ്ങണമോ’ എന്നതായിരുന്നു ബാലാക്കോട്ട് വിവാദത്തില് പ്രതിപക്ഷത്തിനുളള വി കെ സിങിന്റെ മറുപടി.
കഴിഞ്ഞദിവസം പുല്വാമ ഭീകരാക്രമണം ഒരു അപകടമാണ് എന്ന് ആരോപണം ഉന്നയിച്ച കോണ്ഗ്രസിന്റെ മുതിര്ന്ന നേതാവ് ദിഗ്വിജയ സിങിന് അതേനാണയത്തില് വി കെ സിങ് മറുപടി നല്കിയിരുന്നു. രാജീവ് ഗാന്ധിയുടെ കൊലപാതകവും ഒരു അപകടമായിരുന്നോ എന്ന ചോദ്യം ഉന്നയിച്ചാണ് ദിഗ്വിജയ സിങിന് വി കെ സിംഗ് മറുപടി നല്കിയത്.
ബാലാകോട്ട് ഭീകരാക്രമണത്തില് കൊല്ലപ്പെട്ടവരുടെ കണക്കിനെ ചൊല്ലിയുള്ള തര്ക്കത്തില് കോണ്ഗ്രസിന് മറുപടിയുമായി ആഭ്യന്തരമന്ത്രി രാജ്നാഥ്സിങും രംഗത്ത് വന്നിരുന്നു.’കൊല്ലപ്പെട്ട ഭീകരരുടെ കൃത്യമായ സംഖ്യ അറിയിക്കണമെന്നാണ് കോണ്ഗ്രസ് ആഗ്രഹിക്കുന്നതെങ്കില് അവരോടു പറയാനുള്ളത് ഇതാണ്. നിങ്ങള്ക്ക് പാകിസ്ഥാനിലേക്ക് പോകാന് ആഗ്രഹമുണ്ടെങ്കില് പോകുക, അവിടെ ചെന്ന് എണ്ണുക, ഞങ്ങളുടെ വ്യോമസേന എത്രപേരെ കൊന്നിട്ടുണ്ടെന്ന് ജനങ്ങളോടു ചോദിക്കുക,’ എന്നാണ് രാജ്നാഥ് സിങ് പറഞ്ഞത്.
വിദേശകാര്യ സെക്രട്ടറി പ്രസ്താവനയില് അറിയിച്ചതാണ് ബാലാക്കോട്ടിലെ കൃത്യമായ വിവരമെന്നായിരുന്നു പ്രതിരോധമന്ത്രി നിര്മലാ സീതാരാമന്റെ പ്രതികരണം. തെരഞ്ഞെടുപ്പും വ്യോമാക്രമണവും തമ്മില് യാതൊരു ബന്ധവുമില്ലെന്നും മന്ത്രി ഇന്നലെ വ്യക്തമാക്കിയിരുന്നു.
Discussion about this post