അബുദാബി: അബുദാബിയിലെ ആദ്യ ഹൈന്ദവ ക്ഷേത്രത്തിന് ഇന്ന് തറക്കല്ലിടും. ശിലാസ്ഥാപന ചടങ്ങില് യുഎഇയിലെ മന്ത്രിമാരടക്കമുള്ള പ്രമുഖര് പങ്കെടുക്കുമെന്നാണ് റിപ്പോര്ട്ട്. ബാപ്സ് സ്വാമിനാരായണ് സന്സ്ഥയുടെ ആത്മീയാചാര്യന് സ്വാമി മഹന്ത് മഹാരാജിന്റെ കാര്മികത്വത്തില് രാവിലെ എട്ടു മണിക്ക് തുടങ്ങുന്ന ചടങ്ങ് ഉച്ചയ്ക്ക് ഒരുമണിവരെ നീളും. ശിലാസ്ഥാപന ചടങ്ങിന് രാജസ്ഥാനില്നിന്ന് പ്രത്യേകം രൂപകല്പന ചെയ്ത ശില അബുദാബിയില് എത്തിച്ചിട്ടുണ്ട്.അബുദാബി-ദുബായ് പാതയില് അബു മുറൈഖയിലാണ് ആദ്യ ഹിന്ദുക്ഷേത്രം ഉയരുന്നത്.
അബു മുറൈഖയിലെ നിര്മാണ മേഖലയില് പ്രത്യേകം സജ്ജമാക്കിയ വേദിയിലായിരിക്കും ചടങ്ങുകള്. ഉച്ചയ്ക്ക് രണ്ട് മുതലാണ് പൊതുജനങ്ങള്ക്കുള്ള പ്രവേശനം.യുഎഇ വിദേശകാര്യരാജ്യാന്തര സഹകരണ മന്ത്രി ഷെയ്ഖ് അബ്ദുള്ള ബിന് സായിദ് അല് നഹ്യാന്, സഹിഷ്ണുതാ മന്ത്രി ഷെയ്ഖ് നഹ്യാന് ബിന് മുബാറക് അല് നഹ്യാന്, യുഎഇയിലെ ഇന്ത്യന് സ്ഥാനപതി നവ്ദീപ് സിങ് സൂരി തുടങ്ങി പ്രമുഖര് പങ്കെടുക്കും.
യുഎഇയിലെ ഏഴ് എമിറേറ്റുകളുടെ പ്രതീകമായി ഏഴ് കൂറ്റന് ഗോപുരങ്ങളോടുകൂടിയാകും ക്ഷേത്രം നിര്മിക്കുക. പൗരാണിക ഗ്രന്ഥങ്ങളുള്പ്പെടെ അപൂര്വങ്ങളായ പുസ്തകങ്ങളുടെ ശേഖരമുള്ക്കൊള്ളുന്ന വിശാലമായ ലൈബ്രറി സമുച്ചയവും ക്ഷേത്രത്തിനോട് ചേര്ന്നുണ്ടാകും. 55,000 ചതുരശ്ര അടിയിലായി സ്ഥാപിക്കുന്ന ക്ഷേത്ര നിര്മാണത്തിന് എഴുന്നൂറു കോടിരൂപയിലേറെയാണ് ചെലവ് പ്രതീക്ഷിക്കുന്നത്. 2020ല് നിര്മാണം പൂര്ത്തിയാകും.
Discussion about this post